Tikeraartut peqqinnissaqarfimmut millionilikkaanik aningaasartuutaasarnerat politikerinit aaqqiiviginiarneqarusuttoq
Nunatsinni peqqinnissaqarfik tikeraartunik katsorsaanermigut 6,5 millionit koruunit missaannik 2025-mi akiligassiissuteqarpoq. Ukiullu siuliani 6,9 millionit koruuninik akiligassiissuteqarluni.
Peqqinnissaqarfiulli nakorsiarnerit piviusumik qanoq akeqarnersut ilisimanngilaa. Aningaasartuutimmi katillugit naatsorsorneqarneq ajorput.
Tamanna peqqinnissaqarfimmi qullersaqarfiup KNR-imut paasissutissiissutigaa. KNR-illu takornariartunik tikeraartunillu katsorsaanermi aningaasartuutaasut pillugit allagaatinik takunnissinnaatitaaneq qinnutigisimavaa.
Peqqinnissaqarfiup tikeraartut nakorsarneqarnerannut aningaasartuutit naatsorsornagit, ataatsimut akiligassiineq aningaasartuutissatut missiliuutitut atortarpaa, qullersaqarfik akissummini allappoq.
Septembari tikillugu nakorsiartut 123-t
Inuit nunatta avataani najugallit 175-it peqqinnissaqarfimmi 2025-mi nakorsiarsimasutut passunneqarsimasutullu nalunaarsoqqapput.
Taakkunannga 139-t toqqaannartumik sillimataannilluunniit akiliisinneqarput, 36-lli nunanit avannarlernit Europamiilluunniit napparsimalernissamut kortimik sillimmateqartutut nalunaarsoqqallutik.
Tikeraat nakorsiartut 2024-mi katillugit 164-iupput. Tikeraat nakorsiartut 123-t peqqinnissaqarfiup 2026-mi septembarip 25-annit nalunaarsorpai.
| Ukioq | Akiligassat katillugit | Nakorsiartut |
|---|---|---|
| 2024 | 6,87 mio. kr. | 164 |
| 2025 | 6,46 mio. kr. | 175 |
| 2026 septembarip 25-ata tungaanut | 3,73 mio. kr. | 123 |
Akiligassiinermi akigititat nalinginnaasut, peqqinnissaqarfiup sullissinerinut akiliuteqartarneq pillugu kaajallaasitaani nr. 17-mi atorneqarput.
Katsorsaanernut ataasiakkaanut aningaasartuutigineqartut pinnagit, nalinginnaasumik aningaasartuutaasartut akigitinneqarput.
Inuit Kalaallit Nunaata avataani najugallit, tassanilu aamma takornariartut inuillu tikeraartut niueqatigiinnermulluunniit tunngatillugu tikeraartut, kisitsisini pineqarput.Taamaattumik kisitsisit takornariartunut aningaasartuutinut tunngatillugu immikkut ittumik naatsorsukkatut atorneqarsinnaanngillat.
Takornariartut akiliisalersikkusukkai
Takornariartut peqqinnissaqarfimmiissimanerminnut tunngatillugu akiliisalernissaat Inatsisartuni tallimanngornermi septembarip 25-anni oqallisigineqarpoq.
Peqqissutsimut Inunnullu Innarluutilinnut Naalakkersuisup Anna Wangenheimip (D) takornariartut nunatsinniinnerminni peqqinnissaqarfimmi katsorsarneqarnertik pillugu akiliisalernissaat siunnersuutigaa.
Kalaallisut innuttaassusillit assersuutigalugu ilinniarnertik imaluunnit sivikinnerusumik najugaqarnertik pissutigalugu nunani allaniittut siunnersuummit eqqugaannginnissaat Atassummit Bentiaraq Ottosenip erseqqissaatigaa.
Anna Wangenheimip oqaluttarfimmit tamanna isumaqatiginerarpaa.
Partiit tamarmik siunnersuut maanna pingajussaanneerneqartussanngortinneqartoq taperserpaat. Sapaatip akunnerata tulliani marlunngornermi pingajussaanneerneqassaaq.
Peqqinnissaqarfiup sillimmasersimanissaq innersuussutigigaa
Nunatsinnut tikeraarnerminni nakorsiartut nunat tamalaat isumaqatigiissutaat malittarisassaallu naapertorlugit katsorsarneqartarput.
Malittarisassat assingusut kalaallit nunanut allanut angalanerminni nakorsamik pisariaqartitsissagunik atuupput.
Taamaammat peqqinnissaqarfimmi aqutsisut takornariartunut tikeraartunullu allanut napparsimalernissamut pisariaqarpallu angerlartinneqarnissamut sillimmasersimanissamik kaammattuuteqarput.
Danmarkimi takornariartut nunami sumi ilaatigut najugaqarnerat isumaqatigiissutillu atuuttut pissutigalugit pisortat peqqinnissaqarfiini katsorsarneqarsinnaasarput. Tikeraartut aaqqissuussinermut tassunga ilaatinneqanngillat, akiliuteqarnissaallu piumasaqaataasinnaalluni.
Siunnersuut takornariartut nunatsinni peqqinnissaqarfimmut akiliuteqartarnerannut malittarisassat qanoq allanngortinneqarnissaat erseqqissarneqannginnerani politikkikkut maanna oqaluuserineqassaaq.
