Ullormut nalunaarut: Meeqqat kælkertut biilimit aportittut - ataaseq ajoqusingaatsiartoq

Qasigiannguani biili kælkerlu aqqusinermi aporsimanerat politiinut ataasinngornermi ullup qeqqanut nalunaarutigineqarpoq.

- Nukappiaqqat marluk kælkertut biilimit aporneqarput, Kalaallit Nunaanni Politiini pigaartut pisortaat Jeppe Andsager oqaluttuarpoq.

Nukappiaqqat taakkua marluk qulit missaanni ukioqarput. Nukappiaqqap aappaata saarngisa ilai napisimapput qaratsamigullu sajuppillatsitsisimasinnaammat Dronning Ingridip Napparsimmavissualiaanneqassaaq, Jeppe Andsager oqaluttuarpoq.

Politiit suliaq suli misissorpaat, sulili pasilliuteqanngillat.

Nuussuarmi Blue Waterip eqqaani Qeqertanut ammoniaki ataasinngornermi aniasoorpoq.

Aniasoortoq unitsinneqarpoq, pigaartulli pisortaata Jeppe Andsagerip inuit pingasut ataasinngornermi pisup kingorna misissortissimanerarpai, taakkunanngalu ataaseq ajoqusersimammat Dronning Ingridip Napparsimmavissuani suli uninngasoq oqaluttuaralugu.

Ruujori ammoniakimik suli imalik kipineqarmat ammoniakimik aniasoortoqarpoq.

- Sullivinnik Nakkutilliisoqarfimmeersut ammoniakimik aniasoorfimmukartitaapput, Jeppe Andsager oqarpoq.