Nunanit allanit suliartortitat nunanillu allaneersut aningaasaliineri Inatssartuni marlunngornermi oqallisigineqarput. 

Avatangiisinut, pinngortitamut nukissiornermullu naalakkersuisup inatsisissatut siunnersuusiaa aappassaaneerneqarpoq, inatsisissallu nunatsinni erngup nukinganik atuilluarnerulernissamut nunanit allaneersunik aningaasaliissuteqartitsiniarnissaq ajornannginnerulersissavaa.

- Nunatsinni sumiiffinni arlalinni minguitsumik akikitsumillu nukissiornissatsinnut tunngaviuvoq aammattaaq erngup nukinganik atuilluarnissamut nunanit allanit aningaasaliisinnaasunik orniginarsaanissamut periarfissaavoq, naalakkersuisoq Jørgen Rosbach (D) oqarpoq. 

Siunnersuummut tassunga Pele Brobergillu (N) nunanit allaneersut ukiuni sisamani nunatsinniissinnaanissaat pillugu apeqquteqaataanut tunngasut uani atuarsinnaavatit.

Erngup nukinganik atuinermit aningaasarsiorneq 

Naalakkersuisut Tasersiami Tarsartuullu tasersuani erngup nukinganik nukissiorfissualiassat marluk suliariumannittussarsiuunneqarnissaat maanna piareersaleruttorpaat.

- Inatsisip immikkoortui arlallit naleqqussarneqartariaqarnerat piareersarnitsinni maluginiarparput, taamaalillutik ingerlatseqatigiiffinnut nukissiorfinnut aningaasaliisussanut piumasaqaatit erseqqinnerulissapput  pilerinarsarneqassallutillu, Jørgen Rosbach oqalugiartarfimmit oqarpoq. 

Inatsisissatut siunnersuummi allannguutaanerpaaq tassaavoq, suliffeqarfiit erngup nukinganik nukissiorfiliornissamut suliniutinik aallartitsinissamut akuersissummik, maanna atuuttutut ukiuni 40-ni atuuttussamik tunineqarnatik ukiunili 60-ini atuuttussamik tunineqarsinnaalernissaat.

- Tamanna nunanit allanit aningaasaliisussarsiornissamut periarfissaqartitsinerulissaaq taamaalillutalu erngup nukinganik atuinermit aningaasarsiornissatsinnut periarfissaqarnerulissaagut, Jørgen Rosbach oqarpoq. 

Inatsisartuni oqallinneq erngup nukinganik nukissiorfissuit nunaqavissunik suliffissaqartitsinissaat qanoq qulakkeerneqarnissaanut tunnganeruvoq.

- Tamanna kalaalermut tamaani najugalimmut qanoq iluaqutaassanersoq apeqqutaavoq, Juno Berthelsen (N) oqalugiartarfimmit oqarpoq. 

Nalerarlu siunnersuummut, novembarimi toqqaannartumik pingajussaannik suliarineqartussamut, kisiartaalluni akerliuvoq.  

Nunanit allanit suliartortut

Pele Brobergip nunanit allanit suliartortartut qanoq sivisutigisumik nunatsinniissinnaatitaanerat pillugu marlunngornermi oqallisigaa. 

- Nunanit allanit suliartortinneqartartut killilimmik atorneqartariaqaraluarput ilinniartitaanermullu aamma najugaqareersut atorfinitsinniarneqarnerinut taarsiutitut atorneqartussaanngikkaluarlutik, Pele Broberg oqarpoq. 

Naalakkersuisut nunanit allaneersunut suliassaqarfiup danskit oqartussaasuinit akisussaaffigineqarnera erseqqissaassutigaat, nakkutigineqartariaqarnerarluguli.

- Naalakkersuisut nunanit allanit suliartortut amerliartuinnarnerisa ernumassutigineqarnerat paasivaat nakkutiginnittoqartariaqarnerarlugulu, ilinniartitaanermut, kultureqarnermut, timersornermut ilageeqarnermullu naalakkersuisoq Nivi Olsen (D) oqarpoq. 

Partiit arlaliullutik nunatsinni sulisussaaleqisoqarnerarpaat taamaattumillu najugaqareersut sulinissaasa qulakkeerneqarnissaat nunaniillu allaniit sulisunik pisariaqartitsineq oqimaaqatigiissarneqartariaqarput. 

Nunatsinni saammaateqatigiinnissamik suliaqartussamik saammaateqatigiinnermut aningaasaateqarfiliornissamut nalunaarusiortoqarnissaa marlunngornermi aamma akuerineqarpoq.