Tasiilarmiut Tasiilami mittarfittaarnissaq kissaatigaat: Tamanna ineriartornermik qulakkeerinnissutaassaaq

Tasiilarmiut mittarfiliortoqarnissaa kissaatigaat. Taakku tamanna Tasiilamut ineriartortitsisinnaassasoq neriuutigaat. Sulili suliassaqangaatsiarpoq.
Tasiilamukarniaraanni Kulusummi qulimiguulinnut mittarfik ullumikkut aqqutigineqartarpoq. Assi © : Markus Valentin / KNR
Allattoq Markus Valentin
novembarip 07-at 2026 09:02
Nutserisoq Connie Fontain

Kangerluit Tasiilap illuatungaaniittut ersarlukkiartulersimapput. Aputeqarneruleriartorput.

Tasiilarmiut qulimiguullip qangattanngitsoornissaanut aamma Kulusummut ingerlaqqinnissamullu taamaatitsiinnartoqarnissaanut ilimanarneruleriartortoq ilisimavaat.

Angalanissap pilersaarutaasup piviusunngornissaanut sapaatit akunneri ilaannilu qaammat tikillugu kinguaattoorsinnaasarpoq.

Dina Kûitse Pilersuisup saaniippoq. Taassuma Tasiilami mittarfimmik ammaasoqarnissaa kissaatigaa.

- Tunumi Tasiilami ukiukkut timmisartuussiniarneq ajortorujussuusarpoq. Taavalu aamma Kulusuk silarluleraangat timmisartoq missinnaajunnaartarpoq ilaatigut Tunumut Tasiilamut missinnaasaraluartoq.

Tasiilaq pillugu nangeqattaartuliaq

Allaaserisaq una Tasiilami inuuneq pillugu KNR-ip allaaserisaasa ilagaat.

Tusagassiortugut Tasiilami inunnik assigiinngitsorpassuarnik sapaatip-akunnerata ataatsip ingerlanerani oqaloqateqarput.

Ilungersunartut inuiaqatigiinnilu ullutsinni pisimasut nuannersut allaaserisami matumani sammineqassapput.


Piumaneqarluartoq

Attaveqaasersuutinut isorliunerusunullu naalakkersuisup, Iddimanngiiu Biancop (IA) illoqarfini Tunumiittoq qaammatip siuliani tikeraarpaa.

Takornarialerinermik suliaqartup, Rasmus Poulsenip naalakkersuisoq innuttaasunik ataatsimiitsitsinerup nalaani oqaloqatiginissaa periarfissaqarfigaa.

- Oqarfigaara: 'Tasiilami mittarfiliortoqarnissaanut illit aallarniisuussaatit, taamaanngippat assaariarlutit pilersaarut taamaatiinnarsinnaavat'.

Naalakkersuisoqatigiinnissamut isumaqatigiissummi 2025-meersumi Naalakkersuisut Tasiilami mittarfimmik sanaartornissaq qinigaaffimmi matumani aallartinneqarnissaa sulissutiginiaraat allassimavoq. Assi © : KNR / Markus Valentin

Akunnittarfimmik piginnittup, Sulisitsisullu Tasiilami siulittaasuata, Mike Nicolaisenip Tasiilami mittarfeqarnissaa pisariaqartutut aamma isigaa.

- Tasiilami mittarfeqarnissaa siunissamut tunngaviuvoq, taanna oqarpoq.

Mittarfinnik nutaanik ammaasoqaraangat inuit nuunnissaat ajornannginnerulertarmat inuit ikinneruleriartortartut ilisimaneqarpoq. Tamanna ernumassutigaajuk?

- Naamik, pisariaqartinneqartumik inuunermik allaanerusumik pilersitsisoqassasoraara, Mike Nicolaisen oqarpoq.

- Takornariaqarnermi neqeroorutigut pillugit tutsuiginarnerulersitsissaaq. Inuit Tunumukarusullutik oqartarput kisianni ingerlariaqqinnaveerusunngillat. Oqaaseqatigiit immikkoortuata aappaa siunissami oqaatigineqartarunnaassaaq.

Siusinnerusukkut nalunaarutit

Naalakkersuisooqatigiinnissamut isumaqatigiissummi naalakkersuisut Tasiilami mittarfiliornissamik suliaqarneq qinigaaffimmi matumani aallartinniaraat allassimavoq.

Nutaamik mittarfiliornissamut pilersaarusiornissamut politikkikkut aalajangiisoqartoq, attaveqaasersuutinut naalakkersuisuusimasup, Aqqaluaq B. Egedep (IA) Gerth Mikaelsenimut (M) siorna maajimi allappaa.

Tasiilami mittarfimmik pilersitsinissamut suliaqarnissaq aningaasanut inatsimmut ilanngunneqartoq, 2026-mut aningaasanut inatsisissatut isumaqatigiissutip saqqummiunneqarnerani, aningaasaqarnermut akileraartarnermullu naalakkersuisuusimasup, Múte B. Egedep (IA) oqaatigaa. Assi © : KNR

Tasiilami mittarfik aningaasanut 2026-mut inatsisissamut ilanngunneqartoq, Aningaasaqarnermut akileraartarnermullu naalakkersuisuusimasup, Múte B. Egedep (IA) KNR-imut novembarimi oqaatigaa.

- Tamatuma saniatigut Tasiilami mittarfiliornissamik suliap aningaasanut inatsimmut ilanngutitinneqarnissaa ilungersuupparput, taanna oqarpoq.

Aningaasaqarnermik misissuineq

Lars Poulsenip (S) apeqqutaa Iddimanngiiu Jensen Biancop septembarimi akissuteqarfigaa.

Taassuma naalakkersuisut Islandimut angallannikkut attaviup ukiuunerani annaaneqarnera pillugu inuussutissarsiornermi aningaasaqarnermilu kingunissat pillugit naatsorsuisimanersut paaserusuppaa.

- Naalakkersuisut angallaviit niuernermik tunngaveqartut atorunnaarnerini inuiaqatigiit aningaasaqarnerannut kingunerisassanik naatsorsuinissamut inuttatigut aningaasaqarnikkullu isumalluutissaqanngillat. 

- Isumalluutit maannarpiaq aaqqiissutissanik allanik ujartuinermut atorneqarput.

Aaqqiissutissat allat taakku qanoq ilaqarnersut allanngilaa.

Naalakkersuisulli Kulusummut qulimiguulimmik Kulusummut ukiuunerani qaammatini inissiinissaq Air Greenlandimut qaammammi matumani isumaqatigiissutigaat.

KNR-ip ilanngutassiaq Iddimanngiiu Jensen Biancop apersorneranik malitseqartissavaa.