Tunumiut ikioqqusaraluarlutik tusaaneqanngitsut: Taamaattumik Morganip tamanna malitserpassuaminut maanna saqqummiuppaa

Morgan Angaju Josefsen Røjkjær Tunumut siorna siullermeertumik tikikkami taakku angalanerat kinguaattoorfiunngitsoq najukkamiittunit tupigusuutigineqarpoq.

Qaammatilli aappaata affaata kingorna angerlaqqittussanngorami aallarniarnerat sivisuvoq. Morgan Angaju sapaatip-akunnerata ataatsip ingerlanerani tallimariarluni aallariartoraluarpoq.

- Piffissap ilaani mittarfimmiitsilluta timmisartoq kitaani timmisartumik ajornartorsiuteqartoqarnera pissutigalugu tassunga salliunneqartoq paasivarput. Taava uagut najukkamiittorpassuit takornariallu eqqarsarpugut: uagummi?

Morgan Angaju ulluinnarni takornariartitsisuullunilu suleqatini Jørgen Kristensen peqatigalugu takornariartitsivimmik, Dogsled and Ice Academymi Ilulissaniittumik piginneqataavoq.

Taassuma Tunumi pissutsit ajorluinnarnerat nipituuliuutigisariaqarpaa. Taanna Instagramimi quppernermini 15.000-inik malinnaaffigineqartumit videoliaqarluni taamaaliorpoq.

- Tunumi innuttaasut ajornartorsiutit pillugit nipituuliorniartaraluarput, tusaaneqartutulli misigisimaneq ajorput. Taamaammat eqqarsarpunga tamanna pillugu maluginiaasoqarnerulernissaanut ikiuutaasinnaaguma taava soorunami taamaaliussallunga.

‘Inuussutissarsiutaat’ aarlerinartorsiortinneqartut

Morgan Angaju kalaallinik angajoqqaaqartoq Danmarkimi inunngorlunilu peroriartorpoq, taassumalu nunarput 2014-imi tikeraarngaarpaa asannilerfigalugu.

- Kalaallit Nunaannut asannilerluinnarpunga, Tunuli avatangiisimigut allanngujuinneruvoq. Inunnit angalaffigineqarsimanngitsunukarsinnaavutit, Morgan Angaju oqarpoq.

Taassuma qaqqat angakkuakkatut ittutut nassuiaatigai. Inuit tulluusimaartupilussuullutillu nukeqarluinnartuunerarpai.

Nukiillu taakku Kulusuup Tasiilallu akornanni qulimiguullit teknikkikkut ajoquteqarnerat pissutigalugu ingerlannginneranni pisariaqartinneqarput.

- Ajornartorsiut iliuuseqarfigineqanngitsoq misigisimapput. Ilulissani takornariat ukiuunerani takornariartut qimusserniartullu pillugit piffissami matumani ulapilluta ilisimavarput. Tamanna Tasiilamiittorpassuit aamma inuussutigaat, taamaammat tamanna inuit inuussutissarsiutaannut tunngassuteqarpoq. Takornarianik tikisitsisinnaannginnerat ajortoq paasisinnaavara, Morgan Angaju oqarpoq, nangillunilu:

-  Ajornartorsiutit uku sapinngisartik atorlugu qaangerniartarpaat, qulimiguuliullu ajorneranik eqqugaaginnartarput.

Taassuma takornarialerisut ilaat Tasiilamiit sikup killinganut qamuteralattariaqartartut kangerlullu ikaariarlugu qamuteralaqqillutik mittarfimmut takornariat ilaannik aallartariaqartartut oqaatigaa.

- Taakku ajornartorsiutillu tamaasa pillugit uummatikkut annialaarpunga. Tamakkumi tunngaviusumik ingerlasariaqarput.

Kitaanut nunarsuaq nutaaq

Morgan Angajup tunumi ajornartorsiutaasutut nassuiaatigisai ikinngutaanut nutaarluinnaapput.

- Piffissami Tunumiinninni internetimut attavik ulluni arlaqartuni pingasoriarluni sisamariarluniluunniit ajoquteqarpoq. Angerlaqqikkama tamannalu oqaluttuaralugu tupaallaatigineqartorujussuuvoq, Morgan Angaju oqarpoq.

Morgan Angaju Josefsen Røjkjærip suliffeqarfiuterngaani ukiuunerani 600-nik takornariaqarfiusoq oqaatigaa. Taamaammat attaveqaasersuutit takornariat tikitsinnissaannut ajornartorsiutaanerat suliffeqarfeeqqamut qanoq sunniuteqarsinnaanersoq aamma ilisimavaa. Assi © : Privatfoto

Tunumilu piterakulanera Morgan Angajup oqaluttuarisaa taakkunannga aamma ilisimaneqarpallaanngilaq.

- Tunumilu ajornartorsiutaasut amerlavallaarnerat pissutigalugu suliffeqarfippassuit matuinnartarput, inuillu Nuummut nuussinnaasut ilisimatinneqartarput. Tamannali iluarineqanngilaq, inuimmi najugaqarfigisaminnik tulluusimaarutiginnilluinnarput, Morgan Angaju oqarpoq.

Taamaammat Morgan Angajup Tunumi ajornartorsiutaasut saqqumilluinnalersikkusuppai:

- Tunumi ikinngutimma tamanna kisimik oqaluuserigaat takusarpara. Maaniittut oqaluuserineq ajorpaat, taanna oqarpoq, nangillunilu:

- Ikinngutimma saqqummiinera ajornartorsiutaasorlu pillugu oqaaseqarnera qujamasuutigilluinnarpaat. Inuillu ilaasa ajornartorsiutit taama ingasatsiginerat ilisimasimanagu oqaatigalugu allaffigaannga.

Maannakkut ilungersuasoqartoq

Morgan Angajup Tunumi ajornartorsiutaasut pillugit oqaluuserinnilluarnerulernissarput neriuutigaa:

-  Saqqummiussininni ajornartorsiutit ilaat oqaluuseralugit aallartinniarsaraakka. Ajornartorsiutit nalinginnaasumik suaarutigalugit nunatsinni tamarmi oqaluuserinnilersinnaasugut isumaqarpunga.

Politikerillu iliuuseqarnerunissamut akisussaaffeqangaatsiarput.

- Inatsisartunut qineqqusaarnermi Tunumi ajornartorsiortoqaleruttornerata oqaatigineqarnera takuara. Pissutsilli tunngaviusut ajorsiartuinnarmata inuillu inuussutissarsiutaat navianartorsiulereermat ajornartorsiortoqalereersoq isumaqarpunga, Morgan Angaju oqarpoq.