Múte B. Egede Nunat Avannarliit Siunnersuisoqatigiivini allannguinissamut: Siunnersuuteqartoqarsiivara

Múte Borup Egede (IA) upperinnilertigani siunnersuummik takoqqaarusuppoq.

Nunatta Nunat Avannarliit Siunnersuisoqatigiivinut tamakkiisumik atuuttumik ilaasortaalersinnaannissaanut tunngatillugu naalakkersuisut siulittaasuat taamatukanneq nalunaaruteqarpoq.

Tassa Danmark, Sverige, Norge, Finland kiisalu Island assigalugit tamakkiisumik atuuttumik ilaasortaanissamik kissaateqarpoq.

Taanna Nunat Avannnarliit Siunnersuisoqatigiivisa præsidentianit, Bryndís Haraldsdottírimit, sapaatip-akunnera kingulleq tikeraarteqareerluni taama nalunaaruteqarpoq.  

Ataatsimiinneq naalakkersuisut siulittaasuata ´ajunngitsutut´ taavaa, naalakkersuisullu Nunat Avannarliit Siunnersuisoqatigiivinut tunngatillugu qanoq inissisimanerat nassuiaatigaa.

- Naalakkersuisut siulittaasuat peqataasaleqqissappat allannguutissatut siunnersuuteqartoqarnissaa naatsorsuutigineqartoq taamalu nunatta tamakkiisumik atuuttumik ilaasortaalernissaa erseqqissaatigaara, Múte B. Egede KNR-imut allalluni taama akissuteqarpoq.  

Piumasaq: A-nut B-nullu immikkoortiterinnginnissaq

Nunat namminersortut pingasut, tassa nunarput, Savalimmiut aamma Åland Nunat Avannarliit Siunnersuisoqatigiivini tamakkiisuunngitsumik ullumi peqataasarput.  

Nunat pineqartut Nunat Avannarliit Siunnersuisoqatigiivisa ataatsimiititaliaanni peqataasarput taasisinnaatitaallutillu.

Taakku nunat pingasut Nunat Avannaarliit Siunnersuisoqatigiivisa Siulittaasoqarfianni ataatsimiinnernut aamma peqataasarput. Tamannali aatsaat pisarpoq suliani nunatsinnut, Savalimmiunut Ålandimullu pingaarutillit oqallisigineqassatillugit. Takkunannga nunat pingasut aallartitaat oqaaseqarsinnaapput taasisinnaatitaanatilli.

Nunat namminersortut pingasut tamarmik nunani avannarlerni naalakkersuisut pisortatigoortumik suleqatigiiffianni, tassa Nunani Avannarlerni Ministerit Siunnersuisoqatigiiffianni peqataapput. Nunarput tassani taasisinnaavoq, nunalli tallimat tamakkiisumik atuuttumik ilaasortaasut taasineri naggataani aalajangiisuusarput.  

Nunalli assigiinngitsumik, tassa A-nut B-nullu immikkoortiterlugit ilaassusilersorneqassanngitsut, Múte Borup Egede isumaqarpoq.

Sverigep ministeriunerata nunatsinni, Savalimmiuni Ålandimilu naalakkersuisut siulittaasui minillugit nunani avannarlerni ministeriunernik Stockholmimut aasaanerani ataatsimiinnermut maajimi qaaqqusinera immikkoortiterinermik takutitsisoq, Múte B. Egede oqarpoq.

Naapinneq Sverigep kisimi aaqqissuussaraa, Nunat Avannarlerni Siunnersuisoqatigiivilu aaqqissuisuunatik. Immikkoortiterinerli kukkunerusimavoq. Nunat Avannarliit Siunnersuisoqatigiinni præsidenti, Bryndís Haraldsdottír, Nuummut tikeraarnermini KNR-imut taama oqarpoq.  

- Nunat avannarliit akornanni immikoortitaasutut misigisoqarnera ajuusaarnaqaaq.

Isumaqatigiissut Reykjavikkimi ataatsimiinnermi allanngorteqquneqartoq

Helsingforsimi isumaqatigiissut Nunat Avannarliit Siunnersuisoqatigiit tunngavigisaattut taaneqarsinnaavoq, taannalu allanngortinneqassasoq Island siunnersuisoqatigiiffimmi ukioq manna siulittaasuusoq kissaateqarpoq. Taamaaliornikkut nunat tamarmik – aamma nunarput, Savalimmiut Ålandilu – nunat allat ilaasortat assigalugit siunissami ilaasortaalernissaat qulakkeerneqassaaq.

Siunnersuut Nunat Avannarliit Siunnersuisoqatigiivi Reykjavikkimi oktobarip naanerani ataatsimiilerpata oqallisigineqarlunilu taasissutigineqassaaq. Ataatsimiinnermi qulequtarineqassaaq ”Fred og sikkerhed i Arktis”, tassa Issittumi eqqissisimatitsineq isumannaatsuunerlu.

Naalakkersuisullu peqataanissaat Bryndís Haraldsdottírip neriuutigilluinnarpaa.

Taamaattoqassappalli nunatta piumasaanut naapertuuttunik erseqqissumik siunnersuusiortoqaqqaartariaqartoq, Múte B. Egede mailerluni KNR-imut allappoq.  

- Ataatsimiinnermut peqataassaguma nunatta Nunat Avannarliit Siunnersuisoqatigiivini tamakkiisumik atuuttumik ilaasortanngornissaanut siunertaqartumik siunnersuusiortoqarnissaa apeqqutaassaaq, tamanna nangaassutaassanngilaq nunallu allat Nunani Avannarlerniittut naligineqassapput.   

Helsingforsimi isumaqatigiisummik allannguinissamut nunarput Danmarkilu ataatsimoorlutik siunnersuusiaqartut KNR-ip ilisimavaa.

Helsingforsimili isumaqatigiissut allanngortinneqassappat Nunani Avannarlerni Ministerit Siunnersuisoqatigiiffiat naggataani aalajangiisuussaaq