Naalakkersuisut: Kulusummi qulimiguulimmik ukiuunerani sillimmateqartitsineq pillugu isumaqatigiissusiortut
Naalakkersuisut Air Greenland Tasiilami nunaqarfiinilu qulimiguulimmik timmisartuussinermut tunngatillugu isumaqatigiissuteqarfigaat.
Tamanna tusagassiuutinut nalunaarummi paasissutissiissutigaat.
Qulimiguulik AS350, qulimiguulik atorneqartartoq timmisinnaanngikkaangat, novembarimiit maajip tungaanut sillimmataassaaq.
Tamanna pillugu, Ineqarnermut, Attaveqaasersuutinut, Isorliunerusunut Upalungaarsimanermullu Naalakkersuisoqarfik paasissutissiivoq.
Iddimanngiiu Jensen Biancop (IA), akisussaasutut naalakkersuisuusup, oqarneratut, isumaqatigiissut septembarimi Tunumiinneranit tunngaveqarpoq.
- Kulusumut, Tasiilamut, Kuummiunullu tikeraaqqammernera tunuliaqutaralugu nuannaarutigingaarlugu maanna Tasiilami, eqqaanilu nunaqarfinni innuttaasunut nalunaarutigisinnaanngorpara, ukiuunerani qulimiguulimmik sillimmateqartitsinissaq isumaqatigiissusiorfigineqarmat, tusagassiuutinut nalunaarummi allappoq.
- Neriuppunga tamanna innuttaasunut pitsaanerusumik, toqqissisimanerunermillu kiisalu pingaartumik ukiuunerani assartuusseriaatsimik tatiginarnerusumik kinguneqassasoq.
KNR-ip Nuummiit Kulusummut timmisartuussisoqarnerusalernera arlalinnilli taamaatitsisoqarsinnaasarnissaa qanittukkut allaaseraa.
Tamanna Air Greenlandip, Islandimiit timmisartuussisarnerup unitsinneqarnerata kingorna, Hotel Kulusuup ukiuunerani matusariaqalernera pissutaalluni unnuisarfittut atorneqarsinnaajunnaarnera pissutaavoq.
