Kalaallit Nunaat Nunat Avannarliit Siunnersuisoqatigiivini aporaaffeqarami suleqataajunnaarallartoq
Kalaallit Nunaat Nunat Avannarliit Siunnersuisoqatigiivini suleqataajunnaarallarpoq.
Naalakkersuisut siulittaasuat, Múte B. Egede, tusagassiorfinnut taama nalunaarpoq.
Nunat Avannarliit Siunnersuisoqatigiivi tassaapput nunat avannarlerni qinikkat 1952-imili ataatsimiittarfeqatigiiffiat. Siunnersuisoqatigiinni ilaasortat 87-iupput, taakkualu Danmarkimi, Finlandimi, Islandimi, Norgemi, Sverigemi, Savalimmiuni, Kalaallit Nunaanni Ålandimilu qinigaasuupput.
Tassalu Kalaallit Nunaat ukiup matuma ingerlanerani ataatsimiinnissamut peqataatsaaliugaasoq, Múte B. Egede (IA) isumaqarpoq. Taamaanneralu iluaagaa.
- Peqataasut akornanni immikkoortitsisoqartarluni aaqqissuussinermi peqataasarneq ingerlatiinnarsinnaanngilara. Sunniutigisassaa tassaassaaq, Kalaallit Nunaat sinnerlugu Nunani Avannarlerni Siunnersuisoqatigiinni peqataasassanngitsunga, taamaalillungalu aamma ukiamut Reykjavikimi Nunani Avannarlerni Siunnersuisooqatigiit Ataatsimiinneranni aamma peqataassananga, Múte B. Egede oqarpoq.
Aporaakkunnaassasut Mette Frederiksenip neriuutigigaa
Nunanut allanut, sillimaniarnermut illersornissamullu politikkikkut apeqqutit ataatsimiissutigisussaanerat Savalimmiuni, Ålandimi Kalaallit Nunaannilu qinikkanik ataatsimeeqatiserinninngerminnut Nunat Avannarliit Siunnersuisoqatigiivini siulittaasuuffimmik tigumminnittup Sverigep tunngavilersuutigigaa, Múte B. Egede oqarpoq.
Múte B. Egedep tamanna tupigusuutigaa. Kalaallit Nunaatami kisiartaalluni Issittumiinnera tamatumani ilaatigut tunngavilersuutigaa.
Kalaallit Nunaat siulittaasoqarfimmik tigummiartuusorlu, tassa Sverigelu aporaakkunnaassasut, Danmarkip ministeriunerata Mette Frederiksenip (S) neriuutigaa. Nunat marluk taakkua aporaannerat arajutsisimanngikkini, taanna Sermitsiamut oqarpoq.
- Kalaallit Nunaata Savalimmiullu nunat avannarliit suleqatigiinneranni inissisimalluarnissaat kissaatigigipput Nunat Avannarliit Siunnersuisoqatigiivinut anngutereerpara.
- Kalaallit Nunaata taama nalunaarnera tusaatissatut tiguarput, aamma aporaakkunnaassasut neriuutigaara, taanna oqarpoq.
Nunat Avannarliit Siunnersuisoqatigiivini ilaasortat nunaminni qinigaaqatiminnit qinigaasuupput.
Nunat Avnnarliit Siunnersuisoqatigiivi nunat avannarliit naalakkersuisuisa aaqqiissuteqarfigerusutaannut tunngasut aalajangiiffiginiarlugit ukiumut marloriarlutik ataatsimiittarput.
