Oqallitsitsineq: Siunissami aalisarneq klassimi aallartittarpoq
Aalisarneq piniarnerlu pillugit nittarsaassinermi ArcticExpomi Nuummi aaqqissuunneqartuni oqallinnermi siullermi ‘Siunissami aalisarneq piniarnerlu pillugit oqallinneq’ taaguutaavoq.
Taaguut siammasissoq arlalinnik sammiveqartumik oqallinnermik sammiveqarsinnaasunik ammaassivoq.
Taamaakkaluartorli oqallinneq ataasimut tunngassuteqalerpoq: meeqqat, inuusuttut ilinniarnerlu. Aamma aalisarnermut piniarnermullu atassuteqarneq.
Naak inatsit aamma silap pissusia pillugu oqallittoqaraluartoq Nuummi oqallinnerup ammaanneqarnerani apeqqut ataaseq uterfigineqarpoq: Inuusuttut qanoq ililluta aalisartuunermik toqqaasissavagut?
Oqallittut unammilligassaq annerpaaq isumaqatigiissutigigaat
Oqalliffimmi aalajangiisartut arlallit sanileriiaapput: aalisarnermut, piniarnermut, nunalerinermut imminullu pilersornermut naalakkersuisoq Peter Borg, Kommuneqarfik Sermersuumi inuussutissarsiornermut ataatsimiititaliami ilaasortaq Lone Rosengreen, Kommuneqarfik Sermersuumi aalisarnermut ataatsimiititaliami siulittaasoq Bentiaraq Ottosen kiisalu KNAPK-p siulittaasua Pele Blytmann.
Taakku tunuanni raajanik ussassaarutit aamma ussassaarut piniartoq nunami aputilimmi taartumi qimussersoq puisinniartoq takuneqarsinnaavoq. ‘Nunaqavissumit pisarineqartoq. Nunavissumit aningaasalerneqartoq’ ussassaarutitut videoliami naqinnerni angisuuni qaqortumik qalipaaserneqarsimasuni allassimavoq. ‘Ilinnut qanittoq’.
Inuussutissarsiutip ukiorpassuarni suli attanneqarnissaa pissutigalugu meeqqanut inuusuttunullu pilerinarsaasoqarnissaa unammilligassat annerpaartarigaat, aalajangiisartut tamarmik isumaqatigiissutigaat.
Aalisarnermik inatsisip inuussutissarsiutip pisariaqartitaanut, silap pissusiata allanngoriartornerata aarlerinarneranut, aningaasaliisussanik pisariaqartitsinermut aamma aalisartunit piniartuniillu misilittakkanik pissarsinissamut naleqqussarneqarneranut ajornartorsiutit oqallinnermi aamma oqaluuserineqarput.
Taamaakkaluartorli oqallinnermi meeqqat, inuusuttut ilinniartitaanerlu pillugit apeqqut uterfigeqqinneqarpoq.
Illoqarfinni meeqqanik inuusuttunillu inuussutissarsiummut soqutiginnilersitsiniarneq maannakkut ajornakusoortoq, oqallittunit oqaatigineqarpoq. Inuusuttut ilaasa suliffimmut assigiissaartumik aaqqissuussamut aamma nikerartuunngitsumik ingerlaavartumillu allanngorneq ajortumut suliartornissartik orniginartinneruaat. Taamaammat aalisartuunissaq piniartuunissarlu toqqarneq ajorpaat.
Oqallittut oqarnerat naapertorlugu illoqarfinni meeqqat nunaqarfinniittutulli illoqarfinnilu minnerusuneersutulli meeraanerminnit ilinniartinneqarneq ajorput.
Meeqqat atuarfianni aallartittartoq
Taamaammat oqallittut arlallit sapinngisamik siusissukkut aallartittoqassasoq isumaqarput. Tamannalu meeqqat atuarfianni aallartinneqariissalluni.
- Atuartitsineq kulturitsinnut naleqqussarneqassaaq, aalisarnermut, piniarnermut, nunalerinermut imminullu pilersornermut naalakkersuisoq, Peter Borg oqarpoq.
- Kinaassuserput taakkununnga takutissavarput. Kultureralutigulu inuuneraarput. Taakkuupput (meeqqat inuusuttullu aaqq.) ingerlatitseqqiisussat, taanna oqarpoq.
Nunatta aningaasaqarneranut kisimi pingaaruteqanngilaq, kulturimulli tamarmi, Lone Rosengreen oqarpoq.
Oqallittunit meeqqat inuusuttullu inuussutissarsiummut siunissami aqqutissiuunneqarnissaat aamma kalaallit kulturiannik aallaaveqartumik nunatsinnullu aningaasarsiummut pingaarnerpaamik inuuniuteqalersitsinissamut soqutiginnilersitsinissaq neriuutigineqarpoq.
- Kulturitsinnik ingerlatitseqqinnissamut aamma tunngassuteqarpoq, taanna oqarpoq.
Peter Davidsenillu inuussutissarsiornermut ataatsimiititaliatut ittumik meeqqat inuusuttullu inuussutissarsiummut soqutiginnilersinneqarnissaannut pilersaarusiortoqarsinnaanissaanut atatillugu pilersitsisoqarsinnaanera siunnersuutigaa.
Ilaatigut atuarfimmi alloriarfinni tamani ilinniartitsisunut pinngortitaq, piniarneq sunngiffimmilu inuunermik atuartitsisoqarsinnaalersitsinissamut ilinniartitsinikkut – soorlu Canadami naggueqatigiit inuit ilaanni taamaaliortoqartartoq.
