Sisorarnermi piukkunnaatillit inuusuttut VM-eqarneranni aallartilluarput

Erfalasorput Europami sisorartarfinni marluinni ulluni makkunani saqqumilaartinneqarpoq.

Illersuiartortut Nunatsinneersut 25-t missaanniittut Norgemi Lillehammerimiipput sisoraatinik oqilaniunnermi inuusuttut nunarsuarmi pissartanngorniunnerat, VM-rqarnerat, ulluni makkunani pimmat. Taakku illersorpaat sisoqqarissut Nunatsinneersut sisamat qallunaat erfalasuat atorlugu unammeqataasut. Tamannali aporfiginagu kalaallit illersuisut erfalasutsinnik aalateripput.

Sisorartartut nunarsuarmi kattuffissuani FIS-imi Nunarput immikkut ilaasortaanngilaq. Taamaattumik kalaallit sisorartartut qallunaat erfalasuat atorlugu unammeqataapput.

Kalaallit peqataasut tassaapput Qunaaq Jensen, Elias Nordahl, Marika Magnussen aamma Sasja Joelsen Hendriksen tamarmik inuusuttut VM-eqarneranni siullerpaamik peqataasut.

Naatsumut unammineq aallarniutigaat tassanilu eqimattakkaarlutik aallartarput inissilluarnerit qulliunerusuni inissinniunnissanut ingerlaqqittarlutik.

- Taakku tamarmik ukiumi sisorarfiusumi aatsaat taama unammilluartigipput iligiillu tamarmik naammassisaminnik naammagisimaarilluarsinnaapput. Siullerpaamik peqataanermi unammineq sakkortooq peqataaffigaat sisoraatinik oqilaniunnermi ukioqatiminni nunarsuarmi kakkannerpaat unammillugit, nuna tamakkerlugu sungiusaasoq Martin Møller oqarpoq.

Tysklandimi nunarsuarmi pissartanngorniuteqataasoq, VM-ertoq

Marika Magnussen sisorarluni sukkalisaarluarpoq kvartfinalemut ingerlaqqinnissamut sekundit arfineq marluk taamaallaat amigaatigalugit.

Kujasinneroqisumi Tysklandimi illinerni Nanna Møller Nuummeersoq inuusuttut VM-eqarneranni aamma peqataavoq. Sisoraaserluni ooqattaasarnermi peqataavoq siullerpaamik inuusuttuni VM-eqataavoq.

Nanna Møller Erfalasorput atorlugu unammeqataavoq sisoraaserluni ooqattaasarnermi nunat tamalaat kattuffianni IBU-mi Nunarput nammineq ilaasortaammat.

Siullerpaamik sapaatiummat unammeqataavoq 10 kilometerimut sisamariarluni seqqortaarfiusumi peqataalluni peqataasunit 112-init normu 47-nngorpoq. Sisamariarluni uniorpoq apummi kinernartumi sukkassutsikkut iluarseriaruminaatsumik.

- Inuusuttuni VM-eqataaneq nunat tamalaat unammisarneranni misilittakkanik naleqarluartunik pissarsiaqarfiuvoq inerikkiartornermi atorluarsinnaasaanik. Angusaatigut takuneqarsinnaavoq nunani tamalaani patajaatsumik unammeqataasinnaasoq aamma inerikkiartorluartoq, sungiusaasutut angalaqataasoq Martin Møller oqarpoq.

Unammeriaatsini assigiinngitsuni sisoraatinik oqilaniunnermi aamma sisoraaserluni ooqataasarnermi ullut tulliuttut unammisoqartarumaarpoq.