Ilulissani Sisimiunilu raajanik tunisassiorfiit tunisassiorunnaamisariaqartut
Royal Greenlandip Sisimiuni tunisassiorfiani maskiinat, ulloq unnuarlu nalunaaquttap-akunnerini 17-ini ulluni arfinilinni ukiup ataatsip matuma siorna tunisassiorput.
Raajalerisut ukioq manna sapaatip-akunneranut ulluni sisamani ullormullu nalunaaquttap-akunnerini aqqaneq-marlunni sulisariaqartut, fabrikkip pisortaa Hans Lars Olsen oqaluttuarpoq, aamma Ilulissani raajalerisut taama sulisarput.
Tunisassiassat - tassaasut raajat - ikinnerunerat tunisassiornikinnerunermut pissutaavoq.
- Raajat pisarineqarsinnaasut ikiliartorput, siornatigutulli pisaqartoqartarunnaarpoq, taamaattumik tunisassiassat naammanngippata, nalunaaquttap-akunnerini ullunilu siornatigut tunisassiorfigisarnikuusatsitut tunisassiorsinnaanngilagut. Taamaattumik tunisassiornikinnerulertariaqarpugut, Hans Lars Olsen oqarpoq.
Tunisassiornikinnerulerneq ernumatitsivoq
Tunisassiorfiullu tunisassiornikinnerulernera ernumatitsivoq. Sulisut akornanni akunnerni ikinnerujussuarni sulisalernerat pissutigalugu, aammali inuiaqatigiinni, Hans Lars Olsen oqaluttuarpoq.
Nalornisoqarneralu paasilluarsinnaavaa.
- Soorunami tamanna ilaqutariinnut nalorninartorsiortitsivoq. Aamma aalisarnermik tunisassiornermillu inuussutissarsiuteqartuusugut amerlavugut, taanna oqarpoq.
Sulisullu pikkorissut sulisittuaannarnissaat tunisassiorfiullu tunisassianut tikiunneqartunut naleqqussarnissaa oqimaaqatigiissaariuminaatsuuvoq.
- Sulisut suliffimmut tunngasunik januaarimi pikkorissartippagut, pisakinnerusoqarneranimi juullip kingorna tunisassiornitta aallartiaarnissaanut tunngavissaqannginnatta, taanna oqarpoq.
Piffissaliussisinnaanngitsoq
- Tunisassiorfiit qanoq sivisutigisumik tunisassiornikinnerussanersut nalunarpoq, tunisassiorfimmi pisortaq oqarpoq.
- Arlallit apeqqutaapput. Soorunami pisat apeqqutaapput, aammali TAC-ip qanoq ittuunera apeqqutaalluni, taamaattumik tunisassiorfimmit iliuuseqarsinnaanngilagut, Hans Lars Olsen oqaluttuarpoq.
