Qaqortormiu Otto-Ole Noahsen nannuttoq: Aatsaat tassa piniartunngorpunga

Otto-Ole Noahsen umiatsiminukartoq nuliata sianerfigaa, illoqarfimmilu nanoqarnerarlugu.

Allattoq Hanna Vestergaard Hviid, Sika Frederiksen

februaarip 27-at 2024 12:30

Nutserisoq Nathan Kreutzmann

- Pernarama soorunami misigisaq allaavoq. Nuanneqaaq aamma pissanganaqaaq. Sineriammi tamakku oqartarnerattuut, nannunnikuugama aatsaat tassa piniartunngorpunga.

Otto-Ole Noahsen ataasinngornermi nannuttoq taama oqarpoq, taassuma nanoq Tasersuarmiit ammukarluni Qaqortumi illoqarfikkooreerluni immamut avalaqqammersoq aallaavaa.

Nanoq Tasersuarmi takuneqarsimasoq Kalaallit Nunaanni Politiit pigaartuisa pisortaat, Anette Ostenfeldt, KNR-imut uppernarsaavoq. Nanoq inunnut qanillivallaannginniassammat politiit malinnaapput.

Aamma atuarukAssit: Qaqortumi nanoq aallaaneqartoq

Nanoq nalunaaqquttap akunnerata affaa qangiummat sikumut pivoq, piniartullu kinguninngua aallaavaa. Piniartoq tassaavoq Otto-Ole Noahsen.

- Mikisoq qujanartumik ilaagami, ornillugulu avalakkatta taanna aquppoq. Immamut pereerluni aqqalaaqattaarpoq, puimmallu aallaavara, Otto-Ole Noahsen oqarpoq.

Taassuma umiatsiaaqqaminukarnerani nuliata nanoqarnerarlugu sianerfigaa.

- Umiatsiaaqqamut ammukartunga nuliara sianeriataarami, nipaalu ajorpaluppoq oqarlunilu: ”Nanoq aajuna Piliviup eqqaatigut ammukarpoq.” Aamma arpaannaq umiatsiaaqqamut tuaviinnaq. Nuannerlunilu pissanganaq.

QANOQ ILINERANI NANNUTTOQARSINNAAVA?

Nannunik piniarneq illersuinerlu pillugit nalunaarut naalakkersuisut marsi 2023-mi allanngortippaat.

Nannunik ajornartorsiutaasunik toqutsisoqassappat Aalisarnermut Piniarnermullu Naalakkersuisoqarfimmit akuersissuteqaqqaartoqartariaaruttoq nalunaarummi nutaami allaqqavoq.

Nannut ajornartorsiutaasutut isigineqartut tassaapput inoqarfinnut qaninngoortut, qimaatinneqarniareeraluarlutillu suli qaninngoortut.

Nanoq ajornartorsiutaasutut nalilerneqartoq inuussutissarsiutigalugu piniartumit atuuttumik akuersissutilimmit toqunneqarsinnaappat nannuttup pigiinnassagaa ilanngunneqarpoq.

Inuk imaluunniit inuit inuunerat ulorianartorsiortinneqarpat pisariaqavippallu nanoq toqunneqarsinnaajuaannarpoq.

Aallerfik: Naalakkersuisut

Allisiguk

Angivallaanngitsoruna?

- Aap, angivallaanngilaq, angutiviaaraq. Nutaraq, Otto-Ole Noahsen oqarpoq.

Ullumi ulloq februaarip 27-at tassaavoq nunarsuaq tamakkerlugu nannunut ukiut tamaasa ulloritinneqartartoq. Issittumi nannut apissiminniittut illersorneqarnissaat ullormi matumani siunertarineqarpoq. Nannut arnavissat piaqqatillu taamaalinerani apissiminniittarput.

Nutaarsiassami kukkunermik nassaarsimaguit uunga allaffigineqarsinnaavugut.