Meeqqat atuarfiat aaqqissuuteqqinneqassaaq: Politikerit isumaqatigiissinnaanngillat
Meeqqat atuarfianni arlaatigut allannguisoqassaaq.
Politikerit nunatsinni meeqqat atuarfiinut tunngatillugu siunnersuutit nutaat marluk ataasinngornermi oqallisigimmatigit tamanna ersarippoq.
- Meeqqat atuarfianni aqutsineq naammagiinnanngisaannassavarput. Meeqqat atuarfiannut anguniagaqartuarlutalu takorluugaqartuassaagut, Pipaluk Olsen (D) oqaaseqartarfimmit oqarpoq.
Qanorli iliortoqassanersoq ersarippallaanngilaq.
Inatsisartut meeqqat atuarfiini atuaqatigiit amerlanerpaamik 18-iunissaannut aamma alloriarfiusuni pinngitsuugassaanngitsumik misilitsittarnermik atorunnaarsitsinissamut Demokraatinit inatsisissatut siunnersuut ataasinngornermi oqaluuserisussaavaat.
Siunnersuutinullu toqqaannartumik akerliliisoqanngikkaluartoq politikerit arlallit qularutiginnipput.
Ilinniartitsisunik amigaateqartoqareersoq
IA-p Demokraatillu meeqqat atuarfiini atuaqatigiit amerlassusaannik misissuinissaq pisariaqarsoraat.
- Meeqqat atuarfianni klassimi ataatsimi ikinnerpaamik 18-inik atuartoqarnissaanik atulersitsisoqarnissaanik siunnersuut tunngassuteqarpoq – siunnersuut Demokraatinit pitsaasorujussuartut isigaarput. Klassimi atuartut amerlavallaartillugit ilinniartitsisup atuartunik ataasiakkaanik takunnissinnaanera ajornarnerulersarpoq, Pipaluk Olsen oqarpoq.
Nivi Heilmann Efraimsenip (IA) siunnersuut meeqqat aamma nunatta siunissaannik qulakkeerinninnissamut tunngassuteqarsoraa:
- Atuartut amerlanerpaaffissaannik ikiliineq angusaqarfiulluarlunilu siunissamut iluaqutaassaaq.
Ilinniartitaanermut, Kultureqarnermut, Timersornermut Ilageeqarnermullu naalakkersuisup, Nivi Olsenip (D) ilinniartitsisussaaleqisoqarnera atuaqatigiillu amerlanerpaaffissaannik ikiliineq ilinniartitsisussaaleqinerulernermik kinguneqarnissaa akissummini erseqqissaatigaa.
Lars Poulsenilli (S) siunnersuutip oqallisigineqarnissaa aamma apeqquserpaa, siunnersuummi assingusoq siusinnerusukkut suliarineqarpoq:
- Ilinniartitsisorpassuit ukiuni aggersuni soraarninngortussaasut ilisimavarput, atuaqatigiiaallu ikilineqarnerata malitsigisaanik ilinniartitsisussaaleqineq minnerulernavianngilaq, taanna oqarpoq, nangillunilu:
- Atuaqatigiit qanoq amerlatiginissaannut kommunit namminneq aalajangiisinnaatitaareerput.
Meeqqanut ilinniartitsisunullu atugassarititaasunik pitsaanerulersitsinissamut iliuuseqartoqassasoq Atassut isumaqarpoq, atuaqatigiilli amerlassusaannik allannguinissaq eqqortuusorinngilaa.
- Atuaqatigiit amerlanerpaamik 18-iusinnaalersinneqarnerat aningaasaqarnikkut kinguneqassaaq, tamannalu ilinniartitsisunik amerlanerusunik pisariaqartitsiviussaaq, tamanna ernumanartuusoraarput, Bentiaraq Ottosen (A) oqarpoq.
Aaqqissuussineq ukiunik 24-nik pisoqaassuseqartoq
Alloriarfinni misilitsinnerit meeqqanut ataasiakkaanut pitsaasuunnginnera nalinginnaasumik isumaqatigiissutigineqarpoq, tamannali ilinniartitsisut meeqqat ilikkagassaminnik naammassinninnerannik naliliinissamut atortussatsialaasinnaavoq.
Meeqqat atuarfianni kalaallit kulturiannik kinaassusaannillu tunngaveqarnerulernissaq Mette Arqe-Hammekenip Naleqqameersup tunngavigaa. Nivi Olsenip meeqqat atuarfianni aaqqissuusseqqinneq, Atuarfitsialak 2002-meersoq Inatsisartunit taamani akuersissutigineqarlunilu suliarineqartoq erseqqissaatigaa.
Nivi Olsenillu oqallinnerup naammassiartornerani allannguisoqalinnginnerani misissuisoqarluaqqaartariaqartoq aamma erseqqissaatigaa, meeqqalli atuarfiat pillugu nutaamik eqqarsaatiginnittoqarnissaa pisariaqartinneqarnerarpaa:
- Meeqqat atuarfiannut tunngatillugu inatsimmi sinaakkutit (ukiut 24-t matuma siornatut aaqq.) suli taamaapput, taamaammat aaqqiissuteqarnissamut naleqqussaanissamullu piffissanngorpoq.
Naalakkersuisut taamaammat suleqatigiissitanik meeqqat atuarfianni qitiusunik siunnersuutinik misissuisussanik pilersitsisoqarnissaa siunnersuutigaat.
Inatsisissatut siunnersuut siullermeerneqartoq Kultureqarnermut, Ilinniartitaanermut, Ilisimatusarnermut Ilageeqarnermullu ataatsimiititaliamut innersuunneqarpoq, siunnersuullu maajip aqqaneq-aappaanni aappassaaneerneqartussanngortinneqarluni.
