Politiit Qaqortumi pasinartumik toqusoqarneranut suliami ikioqqusut

Kalaallit Nunaanni Politiit Qaqortumi pasinartumik toqusoqarneranut atatillugu suliami ikioqqupput. Angut siorna oktobarip 26-anni siumorneqarpoq.

Politiit tusagassiuutinut nalunaarummi allapput.

- 63-inik ukiulik, Poul Tittussen Qaqortumi Nakkartarfik 1174-imi najukkamini toqungasoq sapaammi nassaarineqarpoq. Politiit taassuma qanigisaasa akuersineratigut pineqartup assinga saqqummiuppaat, ilanngullugulu toqusoqarneranik misissueqqissaarnerminnut atatillugu tamanit ikioqqupput, politiit allapput.

Poul Tittussen sapaammi unnuap qeqqata aamma nalunaaqutaq 17.00-ip akornanni toquvoq. Politiit Nakkartarfik 1174-ip eqqaani pasinartumik nalinginnaanngitsumillu maluginiagaqarsimasut tamarmik oqarasuaammut 70 14 48-mut attaveqaqquaat.

Pasinartumik nalinginnaanngitsumilluunniit 2025-mi oktobarip 26-anni sapaammi nalunaaqutaq unnuap-qeqqaniit 17.00-ip akornanni maluginiagaqarsimasut politiinut 70 14 48-mut sianeqquneqarput.

Kalaallit Nunaanni Politiit taxartitsisoq inummik inunniilluunniit Kamikoorfik blok B-mit Nakkartarfik 1174-imut ullaakkut nalunaaqutaq arfineq-marluk aamma ualikkut nalunaaqutaq tallimat akornanni ingerlatsisimasoq aamma attaveqarfigerusuppaat.

- Taxanik ingerlatsisoq politiinut inussiarnersumik saaffiginneqquneqarpoq, inuimmi ingerlanneqartut pillugit paasissutissat amigaatigineqarput, Kalaallit Nunaanni Politiit allapput.

Tamatuma saniatigut angut 21-nik ukiulik pasineqarluni decembarimi tigusarineqarpoq, kingornalu Eqqartuussisoqarfik Kujallermit ulluni 29-ni tigummigallagassanngortinneqarpoq.

Angut suliamut atatillugu pasineqarpoq.

- Misissueqqissaarneq eqqarsaatigalugu aamma angutip 21-nik ukiullip tigummigallagassanngortinneqarnera matuni matoqqasuni pinera pissutigalugu politiit piffissami matumani allanik paasissutissaateqanngillat, Kalaallit Nunaanni Politiit allapput.