PET-ip aamma Siulittaasup Naalakkersuisoqarfiata Amerikamiup taasititsiniarnera tikeraannginnerani ilisimareeraat

Amerikamiu 86-inik ukiulik Clifford Edward Stanley Nuummi sapaatip akunnerani kingullermi uissuummititsivoq.

Qernertumik kavaajaasalerluni qilerniusalerlunilu, innuttaasut USA-mut ilanngukkusunnermut tunngasumik pappiaqqamik nammineq sanaamik atsiortitseqattaarniarsarivoq.  

Misissuinerup allassimavoq, Kalaallit Nunaat USA-mut ilannguppat kalaallit tamarmik 200.000 dollarinik pissarsissasut.

Aningaasalli inisinermi aningaasanik atorniarnermi sullissisup soraarnerup tigumminngilai. Amerikamiut oqartussaasuisa oqarnerat naapertorlugu nammineq piumassutsiminik taamaaliorpoq.

KNR-ip Clifford E. Stanley taassuma nunatsinnut tikeraarnera sulerineralu pillugit sivisuumik oqaloqatigalugu tallimanngormat ualikkut naapippaa. Assi © : KNR / Markus Valentin

KNR-ip taassumap allagaatai suliffeqarfinnullu oqartussaasunulluunniit assigiinngitsunut allakkiai takuai.

KNR-ip tamatuma saniatigut Illersornissaqarfiup Misissueqqissaartartuisa, Politiit Misissueqqissaartartuisa aamma Siulittaasup Naalakkersuisoqarfiata Clifford E. Stanleyip suliaqarnera ilisimagaat paasivaat.

KNR-illu pisut ilai maanna allaaserisinnaanngorpai.

Arctic Print

Arctic Print Solutions Clifford E. Stanleymit februaarip 23-anni allagarsivoq.

Nammineq naqitertitassaminik kalaallisut nutserneqarluarsimanngitsumik naqiterititsiumasimavoq.

Clifford E. Stanley KNR-imut oqarpoq 'nutserisitsisimalluni'.

Arctic Printsip pisortaata Klaus Karlshøj Poulsenip Amerikamiup piumasaa itigartilluinnarpaa, tamanna sunniiniarnerusutut isigigamiuk.

- Allaffigaara nunatsinnut ajoqutaasumik suliaqarsoralugu, oqartussaasunullu nalunaarutiginiarlugu, Klaus Karlshøj Poulsen KNR-imut oqarpoq.

Klaus Karlshøj Poulsenip Clifford E. Stanley Kalaallit Nunaanni Politiinut nalunaarutigereeramiuk Politiit Paasiniaasartuinit orninneqarpoq, taakkulu suliaq ilungersunarluinnartumik tiguneqartoq paasissutissiissutigaat. Assi © : Henriette Simonsen / KNR

 Clifford E. Stanley mailinik arlaleriarluni tamatuma kingorna nassiussivoq, ilaatigut nunat assigiinngitsut akornanni politikkimut, Donald Trumpimut Kalaallit Nunaatalu siunissaanut isiginnittaatsiminik allaaserisaqarluni.

E-mailimi tassani namminerlu taasiffissaliamini nassuiarpaa, Kongressimi politikkerit qularunnaarsinniarlugit Citizens Reserve Savings Account-imik, (innuttaasut aningaasaateqarfiannik, aaqq.) pilersitsiniarluni.

Clifford Stanleyp inuit taasitinniarlugit neqeroorutigisinnaasani assigiinngitsut, ilaatigut qaammammut akissarsiaqarneq ataasiaannarluniluunniit 200.000 dollarinik tunineqarnissaq, februaarimili pilerisaarutigai.

Klaus Karlshøj Poulsenip attaveqaqatigiinneq Kalaallit Nunaanni Politiinut nalunaarutigereeramiuk taanna Politiit Paasiniaasartuinit orninneqarpoq.

- Suliaq ilungersunarluinnartumik tigugitsik oqaatigaat. Paasissutissat tamarmik tiguaat, taakkulu tamanna pissutigalugu maani najuunnerullutik oqaasitaat. Tamanna pitsaallunilu toqqissisimanartoq isumaqarpunga.

Politiit Paasiniaasartuisa inuit ataasiakkaat oqaaseqarfigisinnaanagit KNR-imut paasissutissiissutigaat.

Politiit attaveqartoq 

Amerikamiup taassumap Klaus Karlshøj Poulsen marsip qiteqqunnerata tungaanut allaffigiuarpaa.

Allaat Amerikamiup Kalaallit Nunaanni Politiit marsip 14-ianni allaffiginiaraluarpai.

Clifford E. Stanleyp nunatsinnut angalaniarluni siunertani politiinut mailikkut allappaa, taasititsinermilu angusaqarluassaguni Kalaallit Nunaallu USA-mut ilanngunneqassappat, innuttaasut tamarmik 200.000 dollarinik neqeroorfiginiarlugit.

Clifford E. Stanleyp Kalaallit Nunaanni Politiit marsimi attaveqarfiginiaraluarpai. Taassuma innuttaasunut taasititsiniarnini inatsimmik unioqqutitsinersoq ernumassutigaa, siunnersortissarsiorporlu. Taassumali mailimi adresse '.gl'-imik allannagu '.dk'-mik allattoorsimavaa, politiit taamaalillutik saaffiginnissummik tigusaqaratik. Assi © : KNR / Markus Valentin

Amerikamiulli taamaaliorneq inatsisinik unioqqutitsinerunersoq nalornissutigilerpaa. Taamaattumillu ima aperivoq:

- Kalaallit Nunaanni innuttaasut nunatsinnut tikeraarninni taasititsinissaq tapersersorneraat akerlerineraalluunniit aperisinnaavakka? Taanna mailikkut allappoq allakkanilu nangillugit:

- Toqunissara utaqqiinnarusunnginnakku taamatut suliaqarumavunga. USA-mut iluaqutaasumik annertuumik iliuuseqarusuppunga, neriuppungalu inuiaqatigiit kalaallit suleqataajumassasut.

Arctic Print Solutionsimut marsip 15-iata 31-atalu akornanni tikissalluni februaarimi nalunaarpoq. Politiinut allappoq, 'marsip naanerani apriilimiluunniit'.

KNR Kalaallit Nunaanni Politiinut saaffiginnippoq. Taakku mailimik tigusaqarsimanatik nalunaarput. Tamanna Amerikarmiup e-mail adressimut kukkusumut nassiussisimaneranik pissuteqarpoq.

Kalaallit Nunaanni Politiit e-mail adressimik taama ittumik soqanngilaq.

Naalakkersuisut Siulittaasuata Naalakkersuisoqarfia

KNR-ip Siulittaasup Naalakkersuisoqarfiata Clifford E. Stanley februaarimili ilisimaleraa paasivaa. Assi © : KNR/Mads Malik Fuglsang Holm

KNR-ip allagaatit, Naalakkersuisut Siulittaasuata Naalakkersuisoqarfiup Amerikamiup innuttaasunik taasititsiniarneranik tunngasumik februaarip 27-anni tigusaqarsimaneranik ersersitsisut, pissarsiarai.

Clifford E. Stanleyp adressia, e-mailia oqarasuaataalu aamma nalunngilaat.

KNR-ip Naalakkersuisut Siulittaasuata Naalakkersuisoqarfia akissutissarsiffigiumallugu saaffigaa.

Naalakkersuisoqarfiup saaffiginnissuterput uterfigeqqinngilaa. Taamaammat KNR-ip Naalakkersuisut siulittaasuat, Jens-Frederik Nielsen (D) attaveqarfigaa.

Naak tamanna KNR-ip paasissutissarsiarisai naapertorlugit tamanna Siulittaasup Naalakkersuisoqarfianut tunngassuteqaraluartoq Jens-Frederik Nielsenip allaffiata Nunanut allanut, Inuussutissanut Aatsitassanut Naalakkersuisoqarfik innersuussutigaa.

Nunanut allanut, Inuussutissanut, Aatsitassanullu Naalakkersuisup, Múte B. Egedep allaffiata suliaq misissuiffigileruttoritsik paasissutissiissutigaa.