Amerikamiup soraarnerup kalaallit USA-mut akuersinissaat pisiariniaraa

Amerikamiu angut utoqqaq Nuummut tikeraartoq innuttaasunut arlalinnut 200.000 dollarinik neqerooruteqartoq, Clifford Edward Stanley-mik ateqarpoq.

Taanna inuttut nammineq suliniuteqarluni illoqarfiit pingaarnersaannut sapaatip akunnerani matumani angalavoq, taannalu maajip 20-ata tungaanut tamaaniissalluni.

86-inik ukiulik, soraarneq inuunermi iliuuseqarlunilu nunarsuarmi pitsaanerulersitserusulluni.

Taanna KNR-imit apersorneqarnermini imminut inuttut ‘tuniniaasartutut’ Kalaallit Nunaannilu ‘inunnut pissaanermik utertitseqqikkusuttutut’ nassuiaatigivoq.

Taassuma innuttaasunik taasititsinissamut annertuumik nammineq angerlarsimaffimmini qaammatini kingullerni suliaqarpoq. Taannalu innuttaasut kinaassutsiminnik isertuussillutik tassunga akuerserusunnersut paasiniarlugu maanna nunatsinniippoq.

Amerikamiut Københavnimi aallartitaqarfianit oqaaseqartartup 'inuk nassuiaatigineqartoq Amerikamiutut innuttaasuuseqarsinnaasoq imaluunniit innuttaassuseqanngitsoq Amerikamiut naalakkersuisui sinnerlugit suliaqanngitsoq' KNR-imut allappaa.

Apeqqut unaavoq: Kalaallit Nunaanni innuttaasut USA-mut ilaalerusuppat?

Aningaasanik neriorsuuteqartoq

Nunatsinni innuttaasut siunnersuummut akuersissagunik akileraarusigaanngitsumik ataasiartumik 200.000 dollarinik immikkut aappaagu januaarimi tunineqassapput.

Aningaasat taakku nammineq piginngilai. Taassumali innuttaasut 60-init 70 procentinut innuttaasunik taasititsinermi akuersitissagunigit tamanna Præsidentip Illorsuanukaanniarpaa, Saudi Arabiamilu aningaasaateqarfimmut 12 milliardit dollarit missaannik pissarsiniarniarluni.

Amerikamiup Saudi Arabiamiut USA-mut aningaasanik tunniusserusulluinnassasorai, aningaasammi taakkununnga 'aningaasaminiinnannguummata', taakkulu præsident Donald Trumpimut atassuteqarluartuullutik.

Taassumalu USA Kalaallit Nunaannik aqutsilissappat 'pisiniarnermik suliaqartutut suliaqarnini' pissarsiffigilaarumaniarpaa – akiliutimininnguaq akilerneqaatiginiarlugu, oqaatigaa.

Taassuma politiit sunniiniartutut suliaqartuunersoq paasiniarlugu misissueqqissaarnerartut attaveqarfigisimanerarpai. Taannali inatsimmi killissarititaasut malikkunigit iliuusererusutaminik iliuuseqarsinnaalluni ilisimatinneqarsimavoq.

KNR-ip Kalaallit Nunaanni Politiit attaveqarfigai, taakkulu angutip atsiornernik katersinera inatsisinik unioqqutitsinerunngitsoq uppernarsarpaat.

'Nunaminik ataqqinnittoq aningaasannanniartartoq'

Clifford Stanley Californiami aningaasanik inissianullu taarsigassarsiniarnermik inuunermi ilarujussua suliaqarsimavoq, taannalu ‘nunamik ataqqinnittutut aningaasannanniartartutut’ imminut nassuiaatigivoq.

Taanna angerlarsimaffeqanngitsuusimalluni aamma millionæriusimalluni ullumikkullu soraarnerussutisiaminik; qaammammut 2.000 dollarinik inuussuteqarluni oqaatigaa.

Taassuma katersani tamangajammik atorlugit nunatsinnukarnini oqaatigaa.

Angut qappakoq, pitsorluttoq, qappangalaartumik pisuttartoq ulluni kingullerni allattaavilerluni pappiararpassuuteqarlunilu Nuummi angalavoq, taassumalu innuttaasut arlallit oqaloqatigai.

Angut ersarissumik paasiuminartumillu oqaluppoq, KNR-imiilli apersorneqarnermini ingerlaavartumik oqaluuserinningaatsiarnissamut soqutigisaqarpoq.

Taanna apersuinermik misissuinissamut februaarimi isumassarsivoq.

Taassumali apeqqutinik immersuiffissaq tamatuma kingorna arlaleriarluni allanngortippaa, nunatsinnilu oqartussat assigiinngitsut attaveqarfigalugillu 'nutserinermik sullissinernut' akiliuteqarsimalluni.

Clifford Stanley-p innuttaasut 'nikanarnerusumiittutut' aamma namminerusorussuseqarluinnartutut taasani ikiorusullugit kajumissuseqarfiginerarpai.

- Inunnut asanninnera isumassarsiffigaara, taanna oqarpoq.

- Inuunerup tamanut pitsaanerulersinnissaanut qanoq iliorsinnaavugut, taanna nangilluni oqarpoq.

Taassuma ‘nunap aningaasaqarnerata allanngortinnissaanut’ innuttaasut ikiorusunnerarpai, aammali nunani nammineq aamma præsidentertik iluaqutissikkusullugit, aamma naak Donald Trumpimut qinersisimannginneraraluarluni.

Ajornakusoortumik ingerlasoq

Taassuma suliniutaa maannamut ingerlalluarsimanngilaq.

Clifford Stanley nunatsinni innuttaasut suliffeqarfiillu sakkortuumik akerliliissuteqartoq naapissimallugit oqarpoq.

Taanna oqaasissaminilluunniit oqaaseqarani GrønlandsBankenimit tallimanngornermi ullaap tungaani anisitaasimavoq. Taassuma Arctic Print Solutions anillatsitsinermut ikiortinniarluni attaveqarfigisimavaa, taakkuli tassunga attuumassuteqarusunngillat.

Angutip apeqqutinik immersugassanik misissuineq ingerlateqqikkusullugu Ilisimatusarfik attaveqarfigaa. Ilisimatusarfiulli uterfigeqqinngilaa.

Taassuma Nuummi innuttaasunit akuersinerit marluk KNR-imut tallimanngornermi ullaap tungaani takutippai.

Innuttaasunit arfinilinnit arfineq-pingasunut neqeroorut qujaannarfigisimagaat, taassuma oqaatigaa; tamanna aqqusinermi taxanilu pisimavoq.

Clifford Stanley-p inuit attaveqarfigisani angerlarlutik ilaquttatik ikinngutitillu suliniut pillugu ilisimatissagaat oqaatigisimavaa.

Inuit isumassarsiamut sooq sakkortuumik qisuariaateqarnersoq aamma tikilluaqqusinnginnersut apeqqutigineqarmat Clifford Stanley-p tamanna 'allannguinissamut ersissuteqarnermut' tunngassuteqarnerarpaa.

Toqutaanissani ernumassutigigaa

Angutip utoqqaap tikeraarnermut pissutaasoq ilisimalluarpaa – tassa Amerikamiut aqutsisoqarfiannit naqisimanninneq.

Clifford Stanley-p panini ‘maanna angalanermit immaqa angerlarsinnaanani’ oqarfigisimavaa, taassumami toqunneqarsinnaanani ernumassutigaa.

Naallu nunap allap iluani pissutsit akuliuffigineri ernumassutigigaluarlugit taassuma isummani attatiinnarpaa:

- Inuuninni allamik sulerissagaluarama? Angerlarsimaannarlunga toqunissara utaqqiinnassavara?

Taassumalu suliassaq; tassa Kalaallit Nunaata isummerneranik allannguiniarneq ajornakusoortoq nammineq nassuerutigaa.

Kisianni 'taamaaliussaagut', taanna oqarpoq, taassumalu tamanna sapaatini akunnerni tulliuttuni marlunni misilinniarpaa.

- Nunap iluani pissutsit akuliuffiginianngilakka. Innuttaasut naalakkersuisulluunniit, taanna KNR-imut oqarpoq.

Innuttaasut taassuma neqeroorutaat tigulluarnianngikkunikku taassuma suliniutissami tullianut ingerlaqqinnissani pilersaarutigaa. Taassumami Canadami apersuinermik aamma suliaqarujussuarniarluni oqaatigaa.