Peqqinnissaqarfimmi sulisut suli nutaamik isumaqatigiissuteqanngitsut: - Tatiginninnermut innarliineruvoq

Naqqiissut: Ilanngutassiami uani siuliani allappugut, nunatsinni peqqinnissaqarfimmi sulisut sirna aprilimiilli isumaqatigiissuteqaratik sulisut. Tamanna eqquilluanngitsuuvoq, isumaqatigiissutimmi atuuttup qaangiuffissaani atorunnaarsinneqanngilaq. Tassunga ilanngullugu peqqissaasut peqqinnissaqarfimmi sulisut isumaqatigiissut nutaanngitsoq 2020-meersoq atorlugu qaammatit 15-it sinnerlugit sulipput.

Peqqissaasut peqqinnissaqarfimmilu sulisut maajip aallaqqaataani akerliussutsimik takutitsipput. Taamani isumaqatigiissut nutaaq suliffimmi atugarissaarnerulernissamik qulakkeerisussaq ukioq ataaseq sinnerlugu utaqqereersimavaat. Maannali – qaammatit pingasut qaangiuttut – suli utaqqipput. Pissutsillu ajorneruliinnarsimapput.

Peqqinnissaqarfimmi sulisut Inatsisartut majuartarfiisa saanni neriorsuutigineqartoq suli utaqqigitsik, akerliussutsimik takutitsinissamik aaqqissuisimasut ilaat, Ivalu Steenholdt Høy allakkatigut nalunaaruteqarpoq.

Taamani peqqissutsimut naalakkersuisoq, Anna Wangenheim akerliussutsimik takutitsisut saanni isumaqatigiissutip amigaataanera pillugu ima oqaaseqarpoq:

- Sulilersitsiniarnermi suleqatitsinnillu attassinissamut ajorluinnartumik kinguneqarpoq, taamaammat akuersaarneqarsinnaanngilaq.

Tamatuma saniatigut isumaqatigiinniarnerit naammassingajalersimagaluartut erseqqissaatigaa.

Oqaatsit imaqanngitsut

Ivalu Steenholdt Høy oqalugiartoqarnerata kingorna KNR-imut oqaaseqarpoq, taassumalu Wangenheimip oqaasii "ajunnginnerarpai", oqaatsilli iliuuseqarfigineqartariaqarnerarlugit.

Qaammatilli pingasut maanna qaangiupput oqaatsilli taakku suli iliuuseqarfigineqaratik.

- Uagut – nunatsinni peqqissaasutut aalajangersimasumik atorneqartut – qaammatit 15-it sinnerlugit nutaamik isumaqatigiissuteqarnata maanna sulivugut. Teknikikkut kinguaattoorneruinnaanngilaq. Tamanna aalajangiisartut uagullu peqqinnissaqarfimmik ullut tamaasa napatitsisut akornatsinni tatiginninnermut innarliinerujussuuvoq, taanna nalunaarummini oqarpoq.

Ivalu Steenholdt Høy Anna Wangenheimip maajip aallaqqaataani oqalugiarnerata kingorna neriulluarpoq. Taannali ullumikkut pakatsisimavoq. Assi © : KNR / Markus Valentin

Ullumikkut nalunaaruteqarnermi maajip aallaqqaataanitulli oqariartuuteqartoqarpoq: - MAANNAKKUT – Isumaqatigiissuteqartoqarnissaa piumasaraarput.

Taamani allagartarsuarmi allassimasutulli: ”Uagut paarivassi – kialli uagut paaraatigut?”

- Naak aaqqiissut?

Peqqissaasut Kattuffianni siulittaasup, Ken Jensenip oqarnera naapertorlugu isumaqatigiissutip amigaataanera sulisunut peqqinnissaqarfimmullu kingunerluutaangaatsiarpoq. Ivalu Steenholdt Høyillu oqarnera naapertorlugu kingunerluutit annertunerulerput.

- Pissutsit ajorseriaannarput. Atorfinitsitsiniarneq sulisunillu attassiniarneq suli ajornakusoornerulerpoq. Amerlasuut soraalerlutilluunniit aallareerput. Sulinermi ilungersuaneq annertunerulerpoq, sulinermilu nuannaarneq annikilliartorluni, taanna allappoq.

Ivalu Steenholdt Høyip oqarnera naapertorlugu isumaqatigiissutip amigaataaneq aalajangiisartut aamma peqqinnissaqarfimmik ullut tamaasa napatitsisartut akornanni tatiginninnermut innarliivoq. Assi © : KNR / Markus Valentin

Taassumattaaq taartaasussarsiorfiit piffissaq tamakkerlugu sulisussanit suli sanilliunneqartoq – taartaasinillu ilinniartitsisut, akisussaanerpaasut, suliffinniiginnartullu suli taakkuunerat isornartorsiorpaa.

- Uagutsinnut atugassarititaasut uninngapput – aningaasallu naleerukkiartorlutik, taanna oqarpoq.

Taamaammat Ivalu Steenholdt Høyip maannakkut nutaamik isumaqatigiissuteqartoqanngiinnarluni tassani aamma sulisut akisussaaffimmik tigummisaannik ersersitsissaaq. Taassuma sulisunut naleqquttumik kingumoortumik akissarsititsisoqarnissaa piumasaraa.

Oqalugiarneq ”ajunngitsoq” naammanngitsoq, taassuma erseqqissaatigaa.

Illuatungeriit taakkua marluusut peqqissaasunut isumaqatigiissummut nutaamut Aningaasaqarnermut Akileraartarnermullu Naalakkersuisoqarfik aamma PPK isumaqatiginninniartuupput, tassaallutik peqqinnissaqarfimmi sulisut kattuffiisa arfineq-marluusut peqatigiittut. Tassunga ilanngullugu peqqissaasut kattuffiat PK.