Inatsisartunut marsip aqqarnani qinersinermi Demokraatit taaguunneqarnerpaallutik naalakkersuisoqatigiinnissamik isumaqatigiinniaqqaartussanngorput, maannamulli nipaattuarsinnarput.

Siumut siulittaasuat, Vivian Mortzfeldt, marloriarluni Demokraatinit aggersarneqareersimasoq KNR-imiit oqaloqatigaarput.

- Naalakkersuisunngortitsiniarluni Siumup Demokraatillu isumaqatigiinniarneranni, aalisarnermut inatsit aamma naalagaaffeqatigiinneq isumaqatigiinngissutigineqarput, Vivian Motzfeldt KNR-imut oqarpoq.

Suulli aalisarnermut inatsimmi aamma naalagaaffeqatigiinnermut tunngasuni isumaqatigiinngussutigineritik erseqqissanngilaa.

Taassumali oqarnera naapertorlugu qinersinermiit ullut qulingiluat qaangiussimalereermata isumaqatiginninniarnerit naammassineqarnissaat nukingernarsiartorpoq.

- Nunanit allanit aamma EU-mit nunatta inissisianera paaserusunneqarpoq, Vivian Motzfeldt oqarpoq.

Isumaqatigiinniarnerni siuttuusut, Demokraatit, siulittaasuat Jens-Frederik Nielsen, KNR-imut isumaqatigiinniarnerit killiffii pillugit oqaaseqarumanngilaq. 

Nalorninermiinneq

Atassutip siulittaasua, Aqqalu Jerimiassen, aamma marloriarluni aggersarneqareersoq ullumikkullu pingajussaanik aggersarneqarnissaminik naatsorsuuteqartoq oqaloqatigaarputtaaq.

- Marloriarluta oqaloqatigereernikuuagut pingajussaa pissanganarpoq qanoq ikkumaarnersoq.

- Kisianni oqaloqatigiinnerit qanoq ikkumaarnersut suli nalunarallarpoq erseqqissunik isumaqatigiissutinik maannakkumut suli peqalinnginnami, Aqqalu Jerimiassen oqarpoq.

Demokraatit Atassutikkullu qalipaateqatigiinnerat arlaatigut isumalluarfigineraa aperaarput:

- Tassami isumaqatigiifferpassuaqarpugut kisiannili aamma allanik suleqateqartariaqarput. Taavalu aamma apeqqutaasussaavoq tassani suut suleqatigiiffiusinnaasut suullu iineqartariaqartut suullu iiuminaassinnaanersut aamma tusarnaarniarumaassallugit.

- Taamaammat qalipaateqatigiinnerput pillugu toqqaannartumik oqartoqarsinnaanngilaq suleqatigiissasugut kisiannili soorunami isumalluartoqarsinnaavoq imaluunniit aamma illuatungaani allarluinnarmik pisoqarsinnaavoq naluarput.

KNR-ip aamma Naleqqap siulittaaasua, Pele Broberg, Inuit Ataqatigiillu siulittasuat, Múte Bourup Egede, attaveqarfigai, taakkuali KNR-imut oqaaseqarumanngillat.

Inatsisartut Naalakkersuisullu pillugit inatsit naapertorlugu Inatsisartut qinersinermiit kingusinnerpaamik ullut 45-it qaangiunneranni ataatsimiissapput.