Partii Inuit 251.000 koruuninik akiitsoqarpoq

Partii Inuit naalakkersuinermi akuunerani ukioq siulleq kanngunartuliaqarfiullunilu aallartinnerliorfiuvoq. Ukiumoortumik nalunaarummi maanna aamma qulaarneqarpoq, partiip isertitani naapertorlugit aningaasartorsinnaasimanngitsoq. 902.500 koruunit. Tassa 2013-imi tapisiai. Taakkuali naammassimanngillat, partiimmi aningaasartuutai 1.151.327 koruuniupput, taamaalillunilu 251.626 koruuninik amigartooruteqarpoq. Aningaasat taakkua partiip allanut akiitsorai.

Tamatuma saniatigut partiip akileraarutissat iluarsaattarsimangilai. Tamakkua ukiumoortumik nalunaarummi, kukkunersiuisoqarfimmit Deloitte-imit, misissorneqarsimasumi, ersipput.

Partii aningaasarsisitsisarsimavoq, akileraarutinulli illuartitassat tamaasa illuartittarsimanngilai. Akileraarutinullu ilumut illuartissimasaat akileraaruseriffimmut piffissaagallartillugu nalunaarutigineqarsimanatik.

Taamattoqarnera partiip aqutsisoqarfiata akisussaatinneqarneranik kinguneqarsinnaasoq, nalunaarusiami allassimavoq. Nalunaarusiami aamma allassimavoq, partii akileraarutissanik 21.368 koruurunik akiitsoqartoq.

Partii Inuit tamakkua saniatigut aamma aningaasartuutimik uppernarsaatai paarilluarsimanngilai. Nalunaarusiami allassimavoq, aningaasartuutit ilaannaat pappialanik, pisiffigisat sullinneqarfigisalluunniit tunniuteqqaagaanik, uppernarsaatitaqanngitsut, naak taamaattussaagaluartoq.

Naatsorsuutini sulisunut aningaasartutit annersaapput, 564.666 koruuniullutik.