Palæstinamiunut tapersuisut Nuuks Pladsimi akerliusut: “Nunasiaataasimasuneersut tapersersoqatigiittariaqarput”
Free free Palestine, free free Palestine.
Tassa inuppassuit palæstinamiunik tapersersuisut palæstinamiut erfalasualisarlutik Nuuks Pladsimi Købehavnimi Nørrebromiittumi arfininngormat ualikkut akerliussutsimik takutitsisut taama suaaqattaarput.
Israelip palæstinamiunut Gazami saassussineranut akerliullutik Københavnip aqqusernani qaammatit kingulliit qulingajaat ingerlaneranni takussaasartut maannamut tuusintilikkuutaat angusimalerpaat. Arfininngormalli akerliussutsimik takutitsisut immikkooruteqalaarput.
Taakkuami nunasiaataasimasuneersut tapersersoqatigiittariaqarput qulequtaralugu palæstinamiunut tapersersuillutik akerliussutsimik takutitsipput. Taamaammat akerliussutsimik takutitsisut ilaat Nuummeersoq Nina Sikkersoq Kristoffersen oqalugiartoq tusarsaavoq.
- Nunap inoqqaavi, inuiaat ikinnerussutillit nunasiaataasimasuneersullu tapersersoqatigiillutik palæstinamiut aniguisitaanissaannut tapersersuinissaat pisariaqarsorivara. Taakkuami toqorarneqaleruttortuusut assigalugit aamma uagut naqisimaneqarpugut. Palæstinamiut aniguitinnagit kiffaanngissuseqalernavianngilagut, Nina Sikkersoq Kristoffersen oqalugiarami oqarpoq.
Nuuks Pladsimi arfininngormat akerliussutsimik takutitsisut kalaalerpaalortaqarput.
“Naamik”. Israelip palæstinamiunut Gazami saassussineranik tapersersuineq naapertuilluarnerunersoq, Nina Sikkersoq Kristoffersenip akerliussutsimik takutitsisut oqalugiartilluni aperimmagit taama akerrapput. Israelimiummi palæstinamiunut taamaaliornerat unioqqutitsinertut isigisariaqartoq, Nina Sikkersoq Kristoffersen isumaqarpoq.
Palæstinamiunut misiginneqataasut
Palæstinamiut aniguinissaannut tapersersuilluni Nuummi aamma akerliussutsimik takutitsisoqaqqammerpoq.
Inuimmi 100-t missaat Gazami palæstinamiunut tapersersuinertik Israelillu palæstinamiunut Gazami saassussinera inuiannik nungusaanertut taasaminnut akerliunertik takutinniarlugit Inatsisartut ataatsimiittarfiata silataani juunimi akerliussutsimik takutitsipput.
Danmarkimi kalaallit Israelip sakkutuuisa Hamasikkullu palæstinamiuusut sorsunnerannik akuersaanngilluinnartortaqartut takutissinnaagini, Nina Sikkersoq Kristoffersenip nuannaarutigaa.
- Danmarkimimi naalagaaffiup peqqusineratigut nunatsinni spiralilersuisimaneq Naalagaaffiit Peqatigiit (FN) inuttut pisinnaatitaaffiit pillugit isumaqatigiissutaat naapertorlugu inuiannik nungusaanertut isigisassanut aamma ilaavoq. Taamaammat palæstinamiunut paasinneqalutalu misiginneqataaqaagut. Palæstinamiummi assigalugit ammip qalipaataanik immikkoortitsiffigineqarlutalu nunasiaataanikuuvugut, taanna oqarpoq.
Nina Sikkersoq Kristoffersen, Israelip sakkutuui Hamasikkullu ukiorpassuarni akerleriittareerlutik sorsupput. Kalaallit Nunaanni inuit palæstinamiut aniguinissaannut tapersersuisortaqannginnerat paasinartippiuk?
- Naamik. Inuiannimmi nungusaaneruvoq. Toqutaasummi sakkutuujunngitsortaqarlutillu meerartaqarput, taanna oqarpoq.
Nunatsinnimi 1960-ikkunni 1970-ikkunnilu spiralilersuisimaneq inuiannik nungusaanertut isigisariaqarnersoq, ilisimatusartut akornanni isumaqatigiinngissutaasereerpoq.
Tapersersoqatigiittariaqartut
Israelip Gazami saassussinera akuersaarneqarsinnaanngitsoq, Naalakkersuisut siulittaasuata Múte B. Egedep (IA) Inatsisartut Nuummi ataatsimiittarfiata silataani juunimi akerliussutsimik takutitsisunut oqaaseqarnermini ilaatigut oqaatigaa.
- Mette Frederiksenimuuppat imaluunniit naalakkersuinikkut sulialinnik allanik naapitsisarnitsinni nunatta Kangia Qiterlermi eqqissisoqarnissaanik kissaateqarnera oqaatigisassavarput, Múte B. Egede KNR-imut taamani oqarpoq.
København Nuuks Pladsimi oqalugiarami tusaaneqarluarsimanissi, Nina Sikkersoq Kristoffersenip aamma neriuutigaa.
- Neriuppunga aaqqissuussaanermik ammip qalipaataanik assigiinngisitsiffiusumik nunarsuarmilu nunallu inoqqaavinik naqisimanniffiusumik akuersaannginnermut tapersersoqatigiiusugut amerlanerulissalluta. Neriuppunga tapersersoqatigiilluta tamanna akiussagipput, taanna oqarpoq.
“Stop Annekteringen”-imik taallugu Københavnimi Nuuks Pladsimi arfininngornermi ualikkut akerliussutsimik takutitsinerminni inuit najuuttuut tuusintilikkuutaajusut, aaqqissuussisut oqaatigaat.
