Unnuaanerani politiit nalunaarutaat: Paamiuni arnaq savimmik kapisisoq tigusarineqarpoq
Paamiuni politiit ippassaq arnaq 60-t missaani ukiulik savimmik kapisisimasutut tigusaraat.
Imigassartortoqarnerani ineqarfiusumi arnaq 40-nik ukiulik kapineqarpoq, Kalaallit Nunaanni politiit pigaartuisa pisortaat Jørgen Madsen taama paasissutissiivoq.
Politiit arfininngornermi nalunaaqutaq 13.04 kalerrinneqarput. Kapineqartorli maanna inuunerminik ulorianartorsiunngilaq.
- Nuummukaanneqartariaqarpoq nakorsartittariaqarlunilu, pigaartut pisortaat oqarpoq.
Tigusarineqartoq ullumi nalunaaqutaq 12.30 eqqartuussivimmi sassartinneqassaaq.
Unnuaq eqqissisimaffiuvoq, ippassaq ullumilu imigassartorsimallutik pisut eqqaassanngikkaanni- taakkunani imigassartorsimalluni biilertut naammattoorneqarsimapput.
Julefrokostertoqarnerani imigassartorsimatilluniluunniit nammineq biilinnginnissaq kaammattuutigaarput, pigaartut pisortaat oqarpoq.
- Ajutoortoqariataarnissaa ilimanaateqartuaannarpoq. Taamaammat biilinnginnissaq taxarnissarli innersuussutigaarput. Jørgen Madsen kaammattuivoq.