Ukiut pingasut qaangiuttut: Oqaluttuarisaanermik qulaajaanissaq suli aallartinneqanngilaq
Nunaqarfiit inuerussimaneri, qitornavissianngortitsinerit, sumi inunngorsimaneq tunngavigalugu akissaasersuineq inatsisitigullu ataataqanngitsut.
Sorsunnersuup aappaanilli ullumikkumut Kalaallit Nunaata Danmarkillu akornanni pissutsit nuanniitsut ikinngeqaat.
2022-mi ministeriuneq Mette Frederiksen taamanilu naalakkersuisut siulittaasuat tamakkuninnga qulaajaanissamik isumaqatigiissuteqarput.
Sulili sulineq aallartissimanngitsoq, maanna DR-ip oqaluttuaraa.
- Sooq taama sivisutigisumik utaqqisoqartariaqarnersoq naluara, oqaluttuarisaanermik ilisimatusartoq Daniel Thorleifsen mailikkut DR-imut akissummini allappoq.
Siorna februaarimi qulaajaanermi taanna Ilisimatusarfimmeersorlu Tenna Jensen siuttuusussatut toqqarneqarput.
Taamanili suliamik aallartitsinissaminut piareersimasimavoq, sulili utaqqivoq.
Kinguaattoornerpassuit
Politikkikkut aalajangiinerit, pisimasut pissutsillu allat Kalaallit Nunaata, kalaallit inuisa nunallu taakkua marluk akornanni pissutsit ineriartorneranut sunniuteqartut qulaajaanermi ukkatarineqassapput.
- Pisimasut inunnut eqqugaasimasunut inuttut annertuumik kinguneqartarsimasut pissutigalugit inuiaqatigiit Kalaallit tamarmiullutik oqaluttuarisaanermi pisimasunik qulaajaasoqarnissaa kissaatigaat, Muté B. Egede (IA) juunimi 2022-mi oqarpoq.
Piffissalli ingerlanerani kinguaattoornerit arlallit pisimapput. Siullermik 2022-mi Folketingimut qinersisoqarnera pissutigalugu qulaajaanerup tunngavigisassaata suliarineqarnissaa qaammatit arfineq-pingasut missaanni kinguartinneqarpoq.
Tamatuma kingorna qulaajaanermi ilisimatusarnikkut aqutsisussamik toqqaanissaq kinguaattoorutaavoq. Misissuinermi kikkut qassillu aqutsisuussanerinik isumaqatigiinngissuteqarneq kinguaattoorneq ilaatigut pissuteqarpoq.
Tamatuma saniatigut oqaluttuarisaanermik qulaajaanissaq 2023-mi Ilinniartitaanermut Naalakkersuisoqarfimmit Naalagaaffinngornissamut Nunanullu Allanut Naalakkersuisoqarfimmut nuunneqarpoq.
Tamatumalu kingorna siorna februaarimi ilisimatusartussat toqqarneqarmatali allamik pisoqaqqinngilaq.
Qulaajaanissap siunissaa pillugu nalorninartorsiorneq
DR-imi allaatigisaq naapertorlugu Kalaallit Nunaanni Ilisimatusarfik ilisimatusarnermi aqutsisunik suleqatigiinnissamik isumaqatigiissuteqartinnagu ingerlaqqittoqarsinnaanngilaq.
- Ilisimatusarfik suliniummut missingersuutit pillugit ilisimatusarnermi aqutsisunik isumaqatiginnittussaagaluarlunilu ilisimatusarnermi aqutsisunik isumaqatigiissuteqartussaagaluarpoq. Ulloq manna tikillugu suli utaqqivugut, Daniel Thorleifsen DR-imut oqarpoq.
'Naalakkersuisut nutaat atuutilernerisa kingorna naalakkersuisoqarfimmit akissuteqarfigineqarnissaq utaqqineqartoq', Ilisimatusarfik DR-imut ilisimatitsivoq.
Qulaajaaneq “isumaliutigineqaqqissasoq” Naalakkersuisut DR-imut oqarput.
Oqaluttuarisaanermik qulaajaanerup Kalaallit Nunaannit qanoq aaqqissuunneqarsinnaaneranik Vivian Motzfeldt (S) nutaamik siunnersuuteqartussaasoq, Nunanut allanut Ilisimatusarnermullu Naalakkersuisoqarfik ilisimatitsivoq.
Qulaajaanerup qanoq ingerlanissaa paasiniarlugu Naalakkersuisup akisussaasup Vivian Motzfeldtip (S) saaffiginissaa KNR-ip ilaatigut sulissutigaa.
