Nuummiit Nuummullu timmisartuussinissat tamarmik sisamanngornermi taamaatiinnarneqartut

DMI-miit Ikersuaq Davisimi sakkortuumik anorersuarnissaa aqagu sisamanngornermi ilimasaarutigineqarpoq, Nuummi illoqarfinnilu allani aamma anorersuartitsisussamik.

- Taamaammat Nuummiit Nuummullu angalasussat sisamanngornermi novembarip 13-ianni taamaatiinnartariaqarpavut, Air Greenland nittartakkamini taama allappoq. 

Angalanissamut pilersaarutit nutaat ullumi nalunaaqutaq sisamanngortinnagu aqagu ilaasussaagaluanut nassiunneqarumaarput, timmisartuutileqatigiiffik paasissutissiivoq.

Tamatuma saniatigut Københavnimiit angalasut unnuiffissamik pisariaqartitsisut sisamanngornermi nalunaaqutaq 08.00-11.00 akornanni Terminal 2-mut saaffiginneqquneqarput. Tassani akunnittarfinnut unnuiffissanik tunniussuisoqassammat.

- Ajuusaarutigaarput ajornakusoortitsisimassagutta qujavugullu naammagittarnissinnut paasinnikkassilu, Air Greenland allappoq.

Sisamanngornermi timmisartuussinissanut taamaatiinnarneqartunut eqqugaasut ilagippatsit, Air Greenlandip nittartagaani atuarnerusinnaavutit.