Folketingimut ilaasortat: Nunatta Ukrainep kiffaanngissuseq pillugu sorsunnera taperserpaa

Kalaallit folketingimut ilaasortat Ukrainep præsidentia, Zelenskyj Danmarkimut tikeraartoq marlunngornermi ilassivaat.

Allattoq Ann-Sophie Greve Møller

novembarip 11-at 2026 15:51

Ukrainep præsidentia, Volodymyr Zelenskyj Danmarkimut marlunngornermi pingasunngornermilu tikeraarpoq. Taanna Folketingimi marlunngornermi ullaap tungaani oqalugiarpoq.

Folketingimi naalagaaffimmi allami siulittaasumik aatsaat siullermeertumik oqalugiartoqarpoq. Oqalugiarnera folketingimi ilaasortanit nikorfasunit sivisuumik ersaartaanneqarpoq.

Præsidenti oqalugiannginnermini Folketingip Siulittaasoqarfiani ilaasortat, partiit siulittaasui aamma partiit gruppiini siulittaasut ilasseqatigiinneranni peqataavoq.

Kalaallit folketingimut ilaasortat Naaja H. Nathanielsen (IA) aamma Qarsoq Høegh-Dam (N) Christiansborgimi Inimi oqaloqatigiittarfimmi ilasseqatigiinnermi aamma peqataapput.

Naaja H. Nathanielsenip oqarnera naapertorlugu Ukrainemut tapersersuinermik takutitsinissaq pingaaruteqarpoq.

- Ukrainemi pisut nunarsuarmi maannakkut ajornartorsiuterpassuarnik ersersitsivoq. Nunarujussuit nunap minnerusut killeqarfiinik qaangiisinnaapput. Nunatta tungaaniit Ukrainep kiffaanngissuseqarnermik sorsuutiginninnermit ullormit siullermit tapersersorparput.

Nunat killiisa tamarmik isumannaatsuunissaannut tapersiineq

Danmarkip nunanut allanut ministeriata, Lars Løkke Rasmussenip Danmark Ukrainemi sakkutooqarnermut atortussanut 4,8 milliardit koruuninik Ukrainellu nukissiuuteqarneranut 150 millionit koruuninik tunissuteqartoq marlunngornermi saqqummiuppaa.

Tamanna Danmarkip Ukainemut tapiissuteqarnerata 32-ssaraat.

- Nunat killiisa tamarmik isumannaatsuunissaannut tapersiineruvoq, Naaja H. Nathanielsen oqarpoq, nangillunilu:

- Taakku sorsuutigisaat uagut aamma sorsuutigaarput. Ukrainep nammineq aalajangiisinnaatitaanera aamma Nunat killiisa sakkutooqarnikkut taama saassussinneqaannarsinnaanerata akuersaarneqaannarsinnaannginnera pineqarput.

Qarsoq Høegh-Dam Danmarkip Ukrainemik tapersersuineranut isummerumanngilaq. Danmarkimi nunamut namminermut politikkimut akuliukkumanngilaq, Folketingilli Kalaallit Nunaannut tunngasuni siunissami akuliuttannginnissaa sulissutiginiarlugu.

Zelenskyjmulli ersarissumik taanna oqarusuppoq: Nammineq aalajangiisinnaatitaaneq pillugu nunani tamalaani inatsisit ataqqineqartariaqartut Kalaallit Nunaata attappaa.

Zelenskyj Folketingimi oqalugiarami Kalaallit Nunaat aamma eqqaavaa. Donald Trumpimmi Kalaallit Nunaannik aqutsilerusunnerami qallunaajuniarunartutut isigineqarsinnaasoq Zelenskyjp quiasaarutigalugu oqaatigaa.

Kalaallit Nunaata USA-mit tiguarneqarnissaa Trumpip arlaleriarluni oqaatigisareerpaa.

- Uagut kalaallit illarumatuujuvugut, uagutsinnullu ilaarutigisinnaanngikkutta tamanna qaangersinnaanavianngilarput, Qarsoq Høegh-Dam Zelenskyjp quiasaarneranut akissuteqarluni oqarpoq.

Illaatigiviuk?

- Narrassutiginngilara, nipituumilli aamma illaatiginngilara.

- Danmarkimiit milliardilikkuutaanik ikiorsiisoqarniarnera Zelenskyjp nuannaarutigigunarpaa, qallunaanullu tusarnaartunut aamma iluareqqusaarunarluni, Høegh-Dam oqarpoq.

Nunat killiit sillimaniarnerannut ilanngussineq

Tunngaviusumik inatsit naapertorlugu danskit naalakkersuisui naalagaaffeqatigiinni aamma nunarput Savalimmiullu sinnerlugit nunanut allanut politikkimik ingerlatsisuupput.

Aamma atuarukNunanut allanut politikkimut Kalaallit Nunaat oqartussaassuseqarnerorusuttoq

Naaja H. Nathanielsen aperigaanni danskit naalakkersuisuisa Ukrainemut tunngatillugu politikkiat taperserpaa.

- Kisianni uagut (naalakkersuisut aaqq.) nunanut allanut politikkip ersarissarneqarlunilu ineriartortinneqarnerani qaninnerusumik tunngaviusumik peqataatinneqartariaqartugut isumaqarpunga.

- Pisumi matumani isumaqataalluinnarpunga. Allanik uagut allaanerusumik isumaqarfigisatsinnik pisoqarsinnaavoq, tassanilu isummagut taakkutulli naleqartigisariaqartut isumaqarpunga, taanna oqarpoq.

Naalakkersuisut siulittaasuat, Jens-Frederik Nielsen (D) Zelenskyjip ilassineqarnissaanut qaaqquneqarpoq. Taanna Inatsisartuni ataatsimiinneq politikikkullu ulapinneq pissutigalugu peqataasinnaanngilaq. Tamanna siulittaasup allattaata KNR-imut paasissutissiissutigaa.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.