Nunatsinni angutit arnaniit 20 procenti sinnerlugu isertitaqarnerusut
Nunatsinni naligiimmik aningaasarsiaqalernissaq suli pisinnaanngikkallartoq.
Arnat angutiniit kommunini tamani, ukioqqortussutsini ilinniagaqassutsinilu tamani agguaqatigiissillugu isertitakinnerujuarsinnarput.
Naatsorsueqqissaartarfiup kisitsisaatai nutaat taama takussutissiipput.
Nuna tamakkerlugu angutit agguaqatigiissillugu siorna isertitaat 327.000 koruuniupput, arnallu agguaqatigiissillugu isertitaat 271.000 koruuniullutik. Nuna tamakkerlugu angutit arnaniit agguaqatigiissillugu 20,7 procentinit amerlanerusunik 2024-mi isertitaqarnerupput.
Tamatumunnga assingusumik aamma siorna, siornaak ukiunilu siuliini aamma takussutissaqarpoq.
Illoqarfik nunaqarfillu assigiinngissuterujussuaqartut
Nunatsinni isertitat assigiinngisitaarneri pillugit Naatsorsueqqissaartarfimmiit kisitsisit nutaat ersersippaat.
Assersuutigalugu agguaqatigiissillugu isertitat 2023-miit 2024-mut 3,6 procentimik qaffariaateqarput.
Illoqarfiit nunaqarfiillu akornanni isertitatigut assigiinngissutilerujussuusut kisitsisit aamma takutippaat.
Nuna tamakkerlugu inuk illoqarfimmi najugaqaruni agguaqatigiissillugu akileraarusinnginnerini 311.000 koruuninik 2024-mi isertitaqarsimavoq, massa nunaqarfimmi najugaqartuusumut 213.000 koruuniusut.
Kommuneqarfik Sermersuumi illoqarfiup nunaqarfiullu akornanni assigiinngissuteqarnerujussuupput, tassani kommunip nunaqarfianinngarnit illoqarfimmiup inuup isertitai marloriaammik 2024-mi amerlanerullutik.
- Tamanna kommunimi nunap inissisimanerani innuttaasut agguataarneqarneri isigineqassapput. Nunap inui illoqarfinni najugaqartuusut amerlanerpaartaat Nuummi nunaqarput, tassani isertitat qaffasissusaat annertuneruvoq, massa nunaqarfinni inuit amerlanerpaartaat Tasiilami nunaqartuusut agguaqatigiissillugu isertitaat appasinnerukannertutut ilisarnaataasoq, kisitsisit nutaat pillugit Naatsorsueqqissaartarfik allappoq.
Nuummi agguaqatigiissillugu isertitat 2024-mi 373.000 koruuniupput, massa Tasiilami 218.000 koruuniusut – tassa Nuummi Tasiilamiittuninngarnit 41 procentimik ukioq taanna isertitaqarnerupput.
Nuna tamakkerlugu illoqarfinni nunaqarfinnilu isertitat assigiinngissutaat pillugit illoqarfinni ilinniakkap qaffasissusaa apeqqutaalluni nassuiarneqarsinnaasoq Naatsorsueqqissaartarfik allappoq.
- Ilinniagartuujullutik sulisut ilinniagakittuninngarnit malunnaatilimmik akissarsiakkaanerusartut tamanna pingaarnertut pissutaasoq, taakku allapput.
