Nunat Avannarliit Siunnersuisoqatigiivisa siulittaasuat Nuummut tikeraartoq
Nunat Avannarliit Siunnersuisoqatigiivisa siulittaasuat Ville Väyrynen, siulersuisoqatigiit sapaatip akunnerata tulliani ataatsimiinnissaat sioqqullugu Nuummut tikissaaq.
Siulittaasup Dronning Ingridip napparsimavissua takusassavaa Peqqinnissaqarfimmilu aqutsisut naapeqatigalugit Canadallu konsulatia ilaatigut pulaassallugu. Sapaatiuppat inuiattut ullorsiornitsinni peqataassaaq.
- Nunat Avannarliit Siunnersuisoqatigiit siulersuisoqatigiivinit illersornissamut inuiaqatigiinnullu suliassaqarfiup iluani pingaaruteqartunik ullualunni Nuummiinnitsinni naapeqatiginnissinnaassagatta nuannaarpugut.
- Kalaallit Nunaanni ilungersunartut periarfissallu paasisaqarfiginissaat uannut siulittaasoqatigiinnullu pingaaruteqarluinnarpoq. Inuiattut ullorsiornermi aamma ulluni aggersumi Nuummi pitsaasunik pissarsiaqarfiulluartunillu oqaloqatigiinnissanut ataatsimiinnissanullu qilanaarpunga, siulittaasoq oqarpoq.
Ataatsimiinneq Nunat Avannarliit Siunnersuisoqatigiivisa ukiumut arfileriarlutik ataatsimiittarnerisa ilagaat. Ataatsimiinnerit nunat ilaasortaasut illoqarfiisa pingaarnersaanni nikerartumik aaqqissuunneqartartut, siunnersuisoqatigiit Nunat Avannarlerni innuttaasut 28 millionit sinnerlugit suliniuteqartut paasissutissiipput.
Sapaatip akunnerata tulliani ataatsimiinnissaq Kalaallit Nunaanni politikkikkut 2025-mi 2026-milu pisoqarnera pissutigalugu Finlandimi pisussaajunnaarsillugu Nuummut nuunneqartoq, siunnersuisoqatigiit KNR-imut paasissutissiissutigaat.
Aalajangersimasumi inissisimaffeqalersoq
Múte B. Egedep Siunnersuisoqatigiinni Kalaallit Nunaata, Ålandip Savalimmiullu tamakkiisumik ilaasortaannginnerat pissutigalugu assigiinngisitsisoqartoq misigisimagami Nunat Avannarliit Siunnersuisoqatigiivini ataatsimiinnerit peqataaffigisarunnaarniarlugit 2023-mi nalunaarutigaa.
Tamanna siunnersuisoqatigiinni aalassassutigineqarpoq, siunnersuisoqatigiillu nunat taakku pingasut siunnersuisoqatigiit politikkikkut aqutsisuini aalajangersimasumik inissisimaffeqalersut siorna oktobarimi nalunaarutigaat.
Naalli nunarput politikkikkut aqutsisut qullersaanni inissisimaffeqaleraluartoq nunarput tamakkiisumik suli ilaasortaanngilaq.
Taamaammat nunatta tamakkiisumik naligiimmillu ilaasortanngornissami tungaanut siunnersuisoqatigiinni politikkikkut suliaqarnini unitseqqagallaannarniarpaa. Naalakkersuisut tamanna KNR-imut 2025-mi oktobarimi allappaat.
- Naalakkersuisuusimasut oqariartuutaat, Kalaallit Nunaat Nunat Avannarliit Siunnersoqatigiittarfiani tamakkiisumik ilaasortanngussasoq, naalakkersuisunit maannakkut atuuttunit suli tapersersorneqarpoq aalajangiusimaneqarlunilu, Jens-Frederik Nielsen (D) oktobarimi oqarpoq.
Siunnersuisoqatigiilli siunnersuisoqatigiinni kalaallit sinniisuat, Mimi Karlsen Justus Hansenimut paarlattaasoq ataatsimiinnermi peqataassasoq KNR-imut paasissutissiissutigaat.
Siunnersuisoqatigiit tamarmik Nuummi sapaatip akunnerata tulliani ataasinngornermi marlunngornermilu katersuutissapput.
