Kalaallit Nunaat Europami atuakkialerinermi festivaalimi annersaasumi ataqqisatut qaaqqusaasut
Kalaallit atuakkiaat Europap qeqqani festivaalini annersaasumi tusarnaarneqartussanngorput.
Kalaallit atuakkiortut nunatsinneersut Danmarkimilu najugallit 31-t Tjekkiap illoqarfiini Brno-mi Ostravamilu aamma Slovakiap illoqarfiini Prešovimi Bratisalavamilu atuakkiaminnik saqqummiussisaqattaassapput. Europap qeqqani atuakkialerinermik festivaali annersaasoq Authors Reading Month juulip ulluisa aallaqqaataaniit 31-ata tungaanut ingerlanneqassaaq.
Kalaallit Nunaat siullermeerluni ataqqisatut qaaqqusaavoq.
Kalaallit Atuakkiortut siulittaasuat Juaaka Lyberth peqataasussat ilagaat, taannalu qilanaarpoq.
-Una atuakkiortunut nunattalu atuakkiornikkut ineriartorneranut pingaaruteqartorujussuuvoq, qularnanngitsumillu atuakkiortunut aamma isumassarsiorfiusussaalluni, oqarpoq nangillunilu:
-Assigiinnarpaaluunniit håndboldertartut unammiartortartut nunanut allanut unammiartorpata imaluunniit futsalertartut arlaannut unammiartornerat.
Ukiut tamaasa taama festivaaleqartarpoq, ukiut tamaasalu ataqqisatut qaaqqusaqartarluni.
Kalaallit Nunaata ataqqisatut qaaqqusaaneranut atuakkiortut nunatsinneersut nittarsaannissaat aamma nunatta Europallu kulturikkut ataqatigiinnera nukittorsarnissaat peqqutaavoq.
Tjekkiami TV-qarfinni sammineqalereersoq
Nunatsinneersut atuakkiortut ataqqisatut qaaqqusaanerannut atatillugu Tjekkiami Tv-qarfiit aviisiliortullu Kalaallit Nunaat pillugu saqqummiussisaqattaalereerput, tassanilu Juaaka Lyberth ikiuussimavoq.
-TV-liortartut tjekkiaminngaanniit marloriarlutik nunatsinniinnikuupput immiussiartorlutik, taamaattumik tv-kkut aallakaatitassiat arlalipparujussuit nunarput ilisaritillugu takutinneqartartussaapput.
Festivaalernermi atuakkiortut 100 sinnerlugit saqqummiussissapput. Tassani atuakkiortut marluk, aappaa Tjekkiameersoq aappaalu nunamit ataqqisatut qaaqqusameersoq, atuakkiaminnik festivalertoqarnerani ullut tamaasa saqqummiussisassapput.
Atuakkiortut atuakkiaminnik kalaallisut, qallunaatut tuluttullu saqqummiussisinnaapput. Saqqummiussinerillu tjekkiamiusut nutserneqartassallutik.
Juaaka Lyberthip atuakkiaminik nutaamik, suli qulequtaqanngitsumi saqqummersinneqanngitsumilu, immikkoortoq Utopia 2078-imik atilimmik saqqummiussissaaq. Immikkoortumi Nuup illoqarfittut tunngavilerneqarneraniit ukiut 350-it qaangiunneranni pisimasuusaartitsinermik oqaluttuaavoq.
-Nunatta silap allanngorneranut tunngatillugu allannguutit unammilligassallu. Nunarput qanoq isikkoqassava? Siunissami takorluuinermi taanna uanga sammerusunneruara, Juaaka Lyberth oqarpoq.
