Norge Nuummi konsuleqarfiliussasoq
Norge Kalaallit Nunaanni, Nuummi, konsuleqarfiliorniarluni aalajangerpoq.
Nutaarsiassaqartitsivik NTB aviisilu VG-p nutaarsiassiineri naapertorlugit Norgemi ministeriuneq Jonas Gahr Støre tusagassiortunik katersortitsinermi taama oqarpoq.
- Kalaallit Nunaanni oqartussaasut suleqatigilluarnerujumallugit Nuummi generalkonsulateqalerniarluta aalajangerpugut, taanna oqarpoq.
Jonas Gahr Støre aamma oqarpoq nunat issittumiittut arfineq-marluk Natomi illersornissamut peqatigiissortamiittut, Issittoq pillugu periusissiamik nutaamik suliaqartut, erseqqissarlugulu Kalaallit Nunaanni pissutsit Danmarkimit kalaallinillu inuiannit aqunneqartariaqartut.
Issittumi nunat Natomut ilaasortaasut tassaapput Norge, Danmark, Canada, USA, Sverige, Finland Islandilu.
Støre aamma oqarpoq, nunat issittumiittut arfineq-marluk, Issittoq pillugu periusissiamik nutaamik suliaqartut, erseqqissarlugulu Kalaallit Nunaanni pissutsit Danmarkimit kalaallinillu aqunneqassasut.
Kalaallit Nunaat qeqertallu Issittumiittup isumannaatsuunissaa, Donald Trump USA-mi 2025-mi januaarimi præsidentinngormalli, ukkatarineqarnerulerpoq.
Nuannersumik suleqatigiinnerusumillu
Naalakkersuisut siulittaasuata ammaanissaq nuannaarutigaa.
- Nunat avannarliit tamaasa suleqatigilluaratsigit nuannaarutigaara - aamma Norgep suleqatiginera, taakkualu aaqqissuussamik taamaattumik takutitsinerat Nuummilu generalkonsuleqarfimmik ammaanissartik sulissutigimmassuk nuannaarutigaara, taanna oqarpoq.
Qanoq kinguneqarnissaa neriuutigaajuk?
- Norgemut qaninnerusumik annertunerusumillu suleqateqarnissaq, assigiiffippassuaqarpugummi, taamaattumik attaveqatigiilluarnerunissaq, Jens-Frederik Nielsen oqarpoq.
Konsuleqarfiit nutaat piffissami kingullermi amerliartorput, suli amerlanerulernissaat pilersaarutaava?
- Kalaallit Nunaannut tunngatillugu nunanik uagutsitut naleqartitaqartunik suleqateqarnerulernissaq pilersaarutaavoq, nuannaarutigaarpullu taama amerlatigisut Kalaallit Nunaannik suleqateqarluarnerujumallutik kissaateqarmata. Piffissami nunarsuarmi pissutsit imatut inissisimatillugit sapinngisamik amerlanerpaat suleqatigisariaqarpagut, naalakkersuisut siulittaasuat oqarpoq.
Trumpip USA-p Kalaallit Nunaannik aqutsilernissaa kissaatigalugu paasitinnikuuaa, aamma Danmarkip Kalaallit Nunaata eqqaani illersuinera naammannginnerarnikuuaa.
