Nunat Avannarliit Siunnersuisoqatigiivi Trumpip nalunaaruteqarneranut: Tapersersorneqarluinnarpusi

Kalaallit Nunaat nunat avannarliit ilaqutariivinut pingaaruteqartumik ilaasoq, Nunat Avannarliit Siunnersuisoqatigiivi oqarput.

Allattoq Ann-Sophie Greve Møller

apriilip 03-at 2025 11:12

Nunat Avannarliit Siunnersuisoqatigiivisa Kalaallit Nunaannut tapersiinerat qularutigineqassanngilaq.

Siunnersuisoqatigiit kalaallinut tapersiinertik tusagassiuutinut nalunaarummi oqaatigaat. Amerikamiut præsidentiata, Donald Trumpip USA-p Kalaallit Nunaanni aqutsilertariaqarneranik arlaleriarluni oqaaseqarnerata kingunerisaanik tamanna pivoq.

- Nunat Avannarliit Siunnersuisoqatigiit Siulittaasoqatigiivi kalaallinut taakkulu nunaminnut siunissaminnullu tunngatillugu saneqqunneqarsinnaanngitsumik namminneq aalajangiisinnaassuseqarnerannut annertuumik tapersersuipput. Naalagaaffiit innuttanut pisussaaffii pingaaruteqarluinnartut avaqqunneqarsinnaanngillat, siunnersuisoqatigiit tusagassiuutinut nalunaarutaanni allassimavoq.

Nunat Avannarliit Siunnersuisoqatigiiffiat suua?

Nunat Avannarliit Siunnersuisoqatigiiffiata Nunani avannarlerni najugaqarneq, inuuneq sulinermilu pissutsit pitsaasut pilersinneqarnissaat suliarisarpaa.

Danmarkimi, Filandimi, Norgemi, Sverigemi, Islandimi, Kalaallit Nunaanni, Savalimmiuni Ålandimilu politikikkut qinikkat suleqatigiiffigaat.

Nunat Avannarliit Siunnersuisoqatigiiffianni ilaasortat tassaapput nunani arfineq-pingasunit inatsisartunut ilaasortat.

Nunat Nunat Avannarliit Siunnersuisoqatigiiffianni nunap inoqassusaa aallaavigalugu ilaasortaatitaat amerlassusilerneqartarput. Kalaallit Nunaannit ilaasortat marluupput, Sverigemiillu assersuutigalugu 20-ullutik.

Nunat Avannarliit Siunnersuisoqatigiiffianni ilaasortat tamarmik siunnersuisoqatigiiffimmi præsidentimit vicepræsidentimillu aqunneqartuni ukiumut marloriarlutik ataatsimiittarput.

Nunat Avannarliit Siunnersuisoqatigiiffiannili ataatsimiititaliat arlaliupput, taakkulu ataatsimiikkajunnerusarput.

Nunani Avannarlerni Ministerit Siunnersuisoqatigiiffiat nunani avannarlerni naalakkersuisut pisortatigoortumik suleqatigiiffigaat. Naalakkersuisut naalakkersuisuuffigisaminnut atatillugu tamarmik immikkut ataatsimiittarput.

Paasissutissarsiffik: Norden.org

Allisiguk

IA-p siulittaasuata, Múte B. Egedep nunat iligisat nunatsinnut tapersiinerminnik ersarinnerusumik takutitsinnginnerat qaammatip siuliani isornartorsiorpaa. Naalakkersuisunut siulittaasuugallarnermini taama iliorpoq.

Inatsisartuni nunanut allanut sillimaniarnermullu ataatsimiititaliami siulittaasuugallartoq, Pipaluk Lynge (IA) aamma Atassutip siulittaasua, Aqqalu Jeremiassen aamma taama isornartorsiuipput. Nunat avannarliit nunatsinnut tapersersuinerminnik ersarinnerusumik takutitsinissaat taakku ujartorpaat.

Aamma atuarukPolitikerit: Nunat avannarliit nunarput Trumpimut sumiginnarpaat

Tamannali qularutigineqanngilluinnassasoq, siunnersuisoqatigiit oqaatigaat.

- Nunat Avannarliit Siunnersuisoqatigiivisa siulittaasoqatigiivi Kalaallit Nunaata siunissaa kalaallinit aalajangerneqassasoq 2025-mi januaarip 15-iani oqaatigaat. Oqariartuut tamanna sukannernerulersillugu ullumikkut uteqqipparput. Kalaallit Nunaat nunat avannarliit ilaqutariivinut aamma nunat avannarliit suleqatigiinnerannut pingaaruteqartumik ilaavoq, tusagassiuutinut nalunaarummi marsip 31-ani nassiunneqartumi allassimavoq.

Akaareqatigiinnginneq

Siunnersuisoqatigiit tamatuma saniatigut nunat USA suli suleqatigerusukkaat allappaat.

- USA-p suleqatiginerata pitsanngorsarnissaanut iliuuserisinnaasatsinnik iliuuseqassaagut, tamannali nunat killeqarfiisa innarligassaannginnerannik, nammineq oqartussaassuseqarnerannik tamallu oqartussaaqataanerannik ataqqinninnermik tunngaveqassaaq, tassani allassimavoq.

Nunatta aamma Nunat Avannarliit Siunnersuisoqatigiivisa akornanni piffissami sivisuumi akaareqatigiinngitsoqarpoq.

Nunarput nunanut allanut, illersornissamut aamma sillimaniarnermut politikki pillugu Islandimi oktobarimi ataatsimiinnissamut, Issittup oqaluuserineqarnissaanut qaaqquneqannginnera pissutigalugu Múte B. Egedep Nunat Avannarliit Siunnersuisoqatigiivinik suleqateqarneq siorna ukiakkut unitsikkallarpaa.

Nunatta siunnersuisoqatigiinni Danmark naligalugu ilaasortanngornissani piffissami sivitsortumi ilungersuutigaa.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.