Islandimit, Sverigemit, Norgemit, Finlandimit Danmarkimiillu ministeriunerit nunatsinnut aqagu tikeraartussaagaluarput.

Angalanissaalli kinguartinneqartoq, Norgep ministeriunerata, Jonas Gahr Størep norskit tusagassiorfiinut paasissutissiissutigaa. Ritzau taama allaaserisaqarpoq.

- Kunngeqarfiup Danmarkip, USA-p Natollu akornanni isumaqatigiissuteqartoqarnera pissutigalugu nunat avannarliisa angalanissartik piffissamut kingusinnerusumut kinguartinniarlugu ualeq manna aalajangerpaat.

- Tikeraarnissamut piffissaq ingerlaavartumik nalilersussavarput, Norgep ministeriunera, Jonas Gahr Støre oqarpoq.

USA-p præsidentia, Donald Trump Natomi generalsekretæriumik Mark Ruttimik ippassaq unnukkut ataatsimeeqateqarpoq. Præsidenti  'Kalaallit Nunaannut issittumullu tamarmut tunngatillugu siunissamut isumaqatigiissuteqarnissamut' sinaakkutissatut isumaqatigiissuteqartoqartoq ataatsimiinnerup kingorna inoqatinut attaveqaatimigut Truth Socialikkut saqqummiivoq.

- Paasinninnera tamanna tunngavigalugu akitsuutit februaarip aallaqqaataani atuutilersinniarlugit pilersaarutigineqartut atuutilersissanngilakka, taanna Truth Socialikkut allappoq.

Natop generalsekretæriata ataatsimiinneq uppernarsarpaa.

Isumaqatigiissummi qanoq allassimasoqarnersoq pisortatigoortumik suli saqqummiussisoqanngilaq. Tusagassiorfiilli arlallit - tusarfiit kinaassutsiminnik isertuussisut tunngavigalugit - USA-p Danmarkillu illersornissamut isumaqatigiissutitoqaq 1951-imeersoq isumaqatiginninniutigeqqissagaat allaaseraat.

Naalakkersuisut siulittaasuat, Jens-Frederik Nielsen (D) naalagaaffinni siulittaasunik nunatsinnut tapersersuerusuttunik aatsaat tikeraarniarneqalinngilaq.

Franskit præsidentiat, Emanuel Macron siorna juunimi tikeraallatsiarpoq. Taassuma tapersersuinerminik aamma Donald Trumpimut akerliliinerminik takutitsinermi saniatigut franskit Nuummi generalkonsulateqarfissaannik ukioq manna ammaanialikkersaarnerat saqqummiuppaa.

Tyskit illersornissamut ministeriata tullersortaata, Nils Schmidip Nuuk aggustimi tikeraarpaa, taassumalu tyskit Issittumi sakkussiornissaat neriorsuutigaa.

Nutarterneqarpoq…