Nunarput aasap ingerlanerani nakkutigineqarnerulerlunilu timmisartumik sorsuuteqalissasoq
Illersornissaqarfik nunatsinni aasap ingerlanerani arlalinnik suliniuteqassaaq. Naalakkersuisut tusagassiuutinut nalunaarummi allapput.
Issittumi sakkutooqarnikkut pitsaanerulersitsisoqarnissaa kiisalu kalaallit innuttaasut isumannaatsuunissaannut tapersiissuteqarnissaq siunertatut nassuiaatigineqarpoq.
Nunatsinni sillimaniarnermi politikkikkut pissutsit pissutigalugit nutaanik suliniuteqartoqartoq, nunanut allanut naalakkersuisoq, Vivian Motzfeldt tusagassiuutinut nalunaarummi oqarpoq.
- Isumannaallisaanermi politikikkut inissisimanerup illersornissaqarfiup Kalaallit Nunaanni, Kalaallillu Nunaata eqqaani ingerlatsisinnaanermik sungiusartarnissaa pissutissaqartippaa, Vivian Motzfeldt oqarpoq.
Taassuma amerikamiut nunatsinni tigusinissamik kissaateqarnera innersuussutigineqarnersoq imaluunniit Danmarkip nunatsinni sillimaniarnermi pisinnaasaanik annertusaasoqarnissaanik kalaallit kissaateqarnerat pineqarnersoq erseqqissaatiginngilaa.
Nakkutilliineq, fregat aamma qulimiguulik
Nunakkut, imaatigut silaannakkullu pitsanngorsaanissamut suliniutinut tallimanut ilaapput.
Nunani attaveqaatinik pingaarutilinnik nakkutiginninnermi Issittumi tunngaviusumik ilinniartunik peqataatitsisoqassaaq. Tamatuma saniatigut sakkutuut immikkut sungiusarsimasut ukiuunerani sungiusassapput. Suut nakkutigineqassanersut imaluunniit illorsuit aalajangersimasut sakkutooqartuaannalissanersut itisilerneqanngilaq.
Imaatigut nakkutilliinermi fregatimik tikisitsisoqassaaq, timmisartunillu F-16-inik qassiunerannik erseqqissarneqanngitsunik Kangerlussuarmiittoqartitsisoqalissaaq, qulimiguulinnillu marlunnik suliassanut ikorfartuutissanik tikisitsisoqassalluni. Timmisartut F16-it sooq kitaata sineriaaniiginnassanersut sunalu nakkutigissaneraat tusagassiuutinut nalunaarummi itisilerneqanngilaq.
Innuttaasut suliniutinut nutaanut atatillugu paasissutissarsinerunissaat pillugu aaqqissuussisoqarumaartoq naalakkersuisut nalunaarutigaat. Tamanna Nuummi fregatip aamma Kangerlussuarmi timmisartunut illorsuup ammatinneratigut aaqqissuunneqarumaarpoq, tamannali qaqugu pinissaa suli ilisimaneqanngilaq.
Qanimut suleqatigiinneq
Vivian Motzfeldtip aamma danskit illersornissamut ministeriata, Troels Lund Poulsenip sakkussiornerit nutaat naalakkersuisut aamma danskit naalakkersuisuisa akornanni qanimut suleqatigiinneranni pisoq pingaartuutippaa.
- Illersornissamut ministerinngoramali Issittumi isumannaallisaanerup nukittorsarnissaa pingaartippara, taamaammallu Naalakkersuisunik qanimut suleqateqarnera annertuumik iluarisimaarpara. Illersornissaqarfiup najuunnerata annertusarnissaani piffimmi pissutsit, Kalaallillu Nunaanni isumannaallisaanermi politikikkut unammillernartut immikkut isiginiarneqassapput, Troels Lund Poulsen oqarpoq.
Vivian Motzfeldt assingusumik oqaaseqarpoq:
- Nunaqavissut akuutinneqarnissaasa qulakkeernissaat Naalakkersuisut pingaartitaraat, taamaalilluni uagut innuttaasutut nunatsinni isumannaallisaanermik kivitseqataanerput nukittorsarneqarsinnaaqqullugu. Issittumi Tunngaviusumik Ilinniartitaanermi atuartut suliassanik isumaginninnermi suleqataanissaat qilanaaraara.
KNR-ip Vivian Motzfeldt oqaaseqartinniarsaraa.
