Naalakkersuisoq Perorsaanermik Ilinniarfimmi kolligiessaaleqineq pillugu: -Nunagisaq qimannagu ilinniarneq ukkatarineqassaaq
Perorsaasutut ilinniarneq ukiuni kingullerni soqutigineqarneruleriartuinnaraluartoq, ilinniartunut inissiakinneq peqqutaaqataalluni ilinniartoqalertarneq killeqarpoq. Ilinniartitaanermut Naalakkersuisup nunagisaq qimannagu ilinnialersinnaaneq taarsiullugu ammaannissaa aaqqiissutigerusuppaa.
Allattoq Jonna Enoksen Dahl
oktobarip 20-at 2026 07:21
Perorsaanermut Ilinniarfik ilinniartunut nutaamik siorna 2025-mi inissiaateqalerpoq. Inissiat ilaqutariinnut naatsorsuussaasut ilinniartunut 14-inut inissaqartitsipput.
Kisianni taakkua naammanngitsut kisitsisit takutippaat.
Tassami Perorsaasutut ilinnialerusullutik qinnuteqartut 2019-imiit 2026-mut 60 procentimik amerleriarput.
Kisianni ilinnialertartut amerlassusaat nikinngillat.
Perorsaanermut Ilinniarfimmi pisortaq Ulunnguaq Markussen, taama KNR-imut tallimanngornermi oqaluttuarpoq.
Najugaq qimannagu ilinnialersinnaanissaq ukkatarineqassasoq
Perorsaasutut ilinnialerusullutik qinnuteqartartut amerliartorneri Naalakkersuisup Nivi Olsenip nuannaarutigaa.
Inissiakimmalli ilinnialertartut amerlassusaasa nikissimannginneri uggoraa.
-Uggornartorujorujussuuvoq pædagoginik amigaateqaqigatta taamannak ikitsigisut inissaqartinneqarlutik tiguneqartarmata.
Ilinniartitaanermut Naalakkersuisoq Nivi Olsen
Ilinnialinngitsoortartut periarfissikkusullugit Naalakkersuisup nunagisaq qimannagu ilinnialersinnaaneq aaqqiissutissatut ammaakkusuppaa.
-Ilinniarusukkaanni najugaq qimanngikkaluarlugu ilinniakkap tigusinnaanera, Ilulissanut nuunngikkaluarluni, ammaakkusukkatsigu. Taamaalilluni kolligiessaqannginneq pillugu aallartinngitsoortartut pinngitsoortikkumallutigit, Nivi Olsen oqarpoq nangillunilu:
-Soorunalimi Ilulissiarluni ilinniarneq suli ingerlanneqarsinnaassaaq. Taanna sulissutigiuassavarput aamma pitsaasuussapput, soorlu kolligiersuit ammaqqammerigut.
Ilinniakkaminnik unitsitsiinnartartut ukiuni kingullerni aamma amerligaluttuinnarput.
Persorsaanermik Ilinniarfiup kisitsisaatai naapertorlugit, perorsaasutut ilinnialertut 2019-imi 22-upput. 2022-mi 20-ullutik.
Ilinniakkamik 2019-imi aallartittuni 15-it ilinniakkaminnik naammassipput. 2022-mi ilinnialersuni arfineq marluk naammassillutik.
Ilinniarnerminnik unitsitsiinnartartut Nivi Olsenip aamma iliuuseqarfigerusuppai.
-Suliassaq siullertut oqaatigerusuppara pimoorullugu uniinnartartut aallartikkaluartut iliuuseqarfigerusullutigit.
