Imigassamik matusineq aqqaneq-marluk soraarsinneqarnerannik kinguneqartoq
Kommune Kujallermi imigassamik aalakoornartortalimmik tuniniaanerup matoqqatikkallarneqalerneranit ullut 14-it maanna qaangiussimalerput.
Innuttaasut ilaasa kommunimi eqqissisimasoqarnissaa pisariaqartinneqarsimasoq misigisimasut ilaasa allat matuseriataarneq isornartorsiorpaat.
Arlallillu allannguineq inuussutissarsiutiminnut sunniuteqarnera oqaatigaat, taakku imigassamut politikkip nutaap kingunerisaanik sulisunik katillugit aqqaneq-marlunnik soraarsitsisariaqarsimallutik oqaatigaat.
KNR-ip innuttaasut arlallit Qaqortumi Brugsenimi pisiniartut isumaannik paasiniaaffigimmatigit taakku imigassamik aalakoornartortalimmik nioqquteqarnermut matusigallarnermut isumaat assigiinngillat.
- Uanga imigassap matoqqanera, ammappata matoqqappatalu assigiitsippakka, Oda Jakobsen oqarpoq.
Apersorneqartut ilaata, Lone Adolfsenip imigassamik aalakoornartortalimmik ukiuni 40-ni atuisimanani KNR-imut oqaatigaa.
Lone Adolfsenip matusineq ajornartorsiutiginngilaa, taamaakkaluartorli imigassamik nioqquteqarneq killeqanngitsuusariaqarsoraa.
Taassuma killilersuineq unioqqutitsisumik annerusumillu nioqquteqarnermik kinguneqarsinnaasoq ilaatigut oqaatigaa.
- Massakkut tusartarparput amerlasoorparujussuit qanoq akeqarpat immiaaqqat qulinngooq 500-eqartarput. Tamakku akuerineqarsinnaanngillat, ammaaniarlik kipisuitsumik, taanna oqarpoq.
Imigassamik aalakoornartortalimmik pilersaarummik nalunaaruteqartoqareernani matuseriataarneq ilaannit pingaartumik isornartorsiorneqarpoq.
- Soorunami imigassaq iluaqutaanngilaq kikkunnulluunniit, kisiat ullumikkut nunatsinneereerami imigassaq allannguiffigisinnaangilarput, Oda Jakobsen oqarpoq.
Sulisut aqqaneq-marluk soraarsinneqartut
Innuttaasut matusinerup kinguneranik oqallisiginninneranni matusineq najukkami inuussutissarsiortunut kinguneqalereerpoq.
Imerniartarfinnik Hinnarissuasimmik Rockhousemillu piginnittup sulisut aqqaneq-marluk sapaatip akunnerani matumani soraarsittariaqarsimavai.
Lasse Gustavsen imerniartarfinnik pigittunit, Arctic Cafe Groupimeersuuvoq, taassuma piffissaliisoqannginnera pilersaarusioreernissamut ajornakusoortitsisoq oqaatigaa.
- Sinaakkutissamik tunineqarnikuunata qanoq sivisutigisumik matoqqassanerluta silarsuarput nalunartorujussuuvoq. Sulisukka 12-it soraarsittariaqarpakka maannakkut, uangalu suliinnarnissara aamma nalullugu. Silarsuarput apeqqusernarsuaarpoq massakkut. Tujorminaqaaq, taanna oqarpoq.
Piginnittut imigassamik nioqquteqartoqannginnerani aningaasatigut taarsiissuteqarfigineqarnissaminnut qinnuteqaateqarput, sulili akissuteqarfigineqanngillat.
Taakku qaqugu ammaqqissinnaassanerlutik ersarissumik siullertut nalunaarfigineqarusupput.
- Ammaqqinnissaq qaqugu pingaaruteqartorujussuuvoq paasissallugu ingerlaqqinnissatsinnut, aammalu suliffeqarfik matuinnassaneripput, Lasse Gustavsen oqarpoq.
Matoqqatitsinissaq piffissalerneqanngitsoq
Kommune Kujalleq imigassamik aalakoornartortalimmik nioqquteqarnerup killissalerneqanngitsumik matuneqarallarnissaanik naalakkersuisunut qinnuteqarmat nioqquteqarneq oktobarip aappaanni tassanngaannartumik matuneqarpoq.
Kommunilli naalakkersuisulluunniit qanoq sivisutigisumik matoqqatitsisoqarnissaa suli nalunaarutiginngilaat.
- Ullulernikuunngilarput qaqugu ammarneqassasut, Kommune Kujallermi borgmesteri, Malene Vahl (D) imigassamik aalakoornartortalimmik inerteqquteqartoqalernerani oqarpoq.
Imigassamik aalakoornartortalimmik nioqquteqarnerup ammaqqissinnaanissaannut innuttaasut apeqqutaassasut taassuma KNR-imut aamma oqaatigaa:
- Taakku suleqataasussaapput. Suliffeqarfiit suleqataasussaapput. Qinikkat suleqataasussaapput. Naalakkersuisoqarfik suleqataasussaavoq. Suleqatigiinnerput qanoq pitsaatiginersoq qanorlu takutitsinersut aamma tassani nalilersuutaasussaapput.
