Niels Berthelsen Ultra Offroad Triathlonilersoq
Niels 'Tuutu' Berthelsen Siku Cross suleqatigalugu nappaat kræft akiorniarlugu timersorluni Neriuffimmut aasaru katersuiniarniarpoq.
Niels 'Tuutu' Berthelsen timersornermik ukiorpassuarni aallutaqartuuvoq.
Allattoq Jonna Enoksen Dahl, Steve Pedersen Hinrup
apriilip 04-at 2026 11:29
Niels 'Tuutu' Berthelsen, Sisimiup sermersuullu eqqaani, Ultra Offroad Triathlonimik taallugu juulip ulluisa 25-anni nalulluni, sikkilerlunilu arpassaaq.
Timersoriaaseq Triathlon tassaavoq timersuutit nalunneq, sikkilerneq aamma arpanneq ataatsimoortillugit timersoriaasiuvoq.
Tuutu nunatsinni Danmarkimilu timersornermi misilittagaqareerpoq, siullermeerlunilu Danmarkimi Triathlonimi 2014-nimi peqataavoq, nunatsinni 2012-mi pissartanngorniunnermi arpalluni marathonimi nunatsinnilu oqaluttuarisaanermi pissartanngorluni.
Tuutu aasaru juulip 25-anni 3,8 kilometerisut isorartutigisumik nalussaaq, 110 kilometerisut isorartutigisumik nunakkut sikkilissaaq aamma 50 kilometerisut isorartutigisumik nunakkut arpassalluni.
- Nalunnissara ilungersunarnerpaassaaq. Nalunngilarput nunatsinni tatsit nillertuusartut, taamaammat masarlisimik, masassiummik atugassannik peqalereerpunga.
Niels 'Tuutu' Berthelsenip Danmarkimiinnermini triatlonertalerpoq, taamaalillunilu isumassarsilluni:
- Assut eqqarsaatigisarakku soormitaavaana nunatsinni taamaaliortitsineq ajortugut, taanna oqarpoq, nangillunilu:
- Uagut ilaqutariit kræftimik nalaanneqangaatsiaqigatta. Periarfissaq taanna atorluarlugu inuiaqatitsinnut iluaqutaalluarniassammat, assut taanna eqqarsaatigisarakku.
Peqatigiiffimmik suleqateqartoq
Ajunngitsumillu siunertaqarluni katersuiniarusulluni Siku Cross attavigisimallugu, taanna oqarpoq.
- Aningaasat eqqarsaatigalugit ajunngitsumik ingerlaqqinniassammata Neriuffimmut, Anguteeraq Grønvoldip pikkoriffigimmagu peqatigiiffeqarlutillu taanna atorluarpara, Niels 'Tuutu' Berthelsen oqarpoq.
Siku Cross peqatigiiffiuvoq Uummannami timersornermut sunngiffimmilu sammisanut ilinniartitsinermut suliaqartoq.
Siku Cross Uummannap sulluani sikukkut 2023-miilli marathonertitsarpoq, Ice Marathonimik taallugu, ukioq manna marathonertitsineq marsip 21-anni ingerlanneqarpoq.
Siku Crossip akunnerni 24-ni nappaat kræft akiorniarlugu katersuiniartitsilluni arpatitsisarnini ileqqorilersimavaa. Tuutulli ingerlaarnissaa Siku Crossip naliginnaasumik arpatitsisarnerani akunnerni 24-ni ingerlassanngilaq, namminerli piffissani aqussavaa.
Niels 'Tuutu' Berthelsen triathlonileruni inuit namminneq piumassutsiminnik ikiuukkusuttut tamaasa tikilluaqqullugit, taanna oqarpoq:
- Piumassutsiminnik ikiuukkusuttut soorunami tikilluaqquakka, anguniagaqarninnut iluaqutaaginnassapput, taanna oqarpoq.
