Tusagassiorfik: Milliarderip Trumpimut qanimut attaveqartup Nuummi borgmesteri ataatsimeeqatigigaa
Aningaasaatilissuaq, Trumpimut tapersersuisoq, Ronald Lauder USA-p Kalaallit Nunaannik pisisariaqarneranik isumassarsiamik Trumpimut eqqarsaatiginnilersitseqqaartoq Amerikamiut nunatsinni inuussutissarsiornissamut soqutiginnittut akornanni takussaaleqqippoq.
Ronald Lauder kalaallit suliffeqarfiutaanni marlunni piginneqataalersimasoq Politikenip siusinnerusukkut allaaseraa, ukunani:
Greenland Water Bank, Qeqertarsuarmi puilasumit imermik maqitsisartoq, Imivimmillu meqqilimmik tuniniaasartoq, aamma;
Greenland Investment Group, Tasersiami erngup nukinganik nukissiorfiliornissamut suliarinnittuuniarnissamik pilersaaruteqartoq.
Suliffeqarfiit Jørgen Wæver Johansenimit aamma Svend Hardenbergimit pigineqarput.
Ataatsimiinneq 'aningaasaliinissamut' tunngassuteqartoq
Tusagassiorfiup Finansip Amerikamiup milliarderip, Ronald Lauderip aamma Sermersuup borgmesteriata, Avaaraq S. Olsenip (IA) akornanni ataatsimiinneq, tusakkat naapertorlugit aningaasatigut aningaasaliissutissanut tunngassuteqartoq maannamut ilisimaneqarsimanngitsoq sapaatip akunnerata naanerani saqqummiuppaa.
Finansip mailikkut allakkat pissarsiarisimasani tunngavigalugit tamanna saqqummiuppaa.
Ataatsimiinneq oqaluuserisanik allaatiginniffiunngitsoq, 2025-mi novembarip 20-anni malunnanngitsumik pivoq, minutsinillu 30-nik sivisussuseqarluni.
Borgmesteri, Sermersuup attaveqatigiinnermut pisortaa, Ole Jakobsen kiisalu Lauderip inuussutissarsiornermi suleqataa Josette Sheeran Ronald Lauderilu ataatsimiinnermi peqataapput.
Suliffeqarfiup iluani allagaatit naapertorlugit ataatsimiinneq ataatsimiinnermi peqataasut imminnut ilisaritinnissaannik aamma Amerikamiup aningaasaatilissuup Trumpillu qanimut peqatigisaata najukkamiittunut sunniuteqartumik qanoq aningaasaliissuteqarnissaanik ilaatigut sinaakkusiinissamik oqaluuserinninnermik siunertaqartoq 'inussiarnisaarnermi pulaarnertut' nassuiaatigineqarpoq.
Trumpip soqutigisaanut attuumassuteqartoq
Immikkut ilisimasallit Finansimit oqaloqatigineqartut Amerikamiup aningaasaatilissuup – pinnersaataarniarfissuarmillu Estée Lauderimik kingornussisup, USA-llu præsidentiata ilinniartooqatigisimasaata – inuussutissarsiornermi nammineq soqutigisani pillugit politikerit siuttunik ataatsimeeqatiginnikkiartornera uissuumminartuusoraat.
Ingerlatseqatigiiffiit marluk pineqartillugit aningaasat annikitsut pineqarput, taassumali aningaasaqarnikkut soqutigisai Kalaallit Nunaannullu tikeraarnera pingaaruteqarpoq, taannami Trumpip allattoqarfiata Kalaallit Nunaannik tiguaarusunneranut ukiorpassuarni tapersersuisuuvoq.
Taassuma qeqertami angalanerani præsident Trumpip Kalaallit Nunaannik aqutsilerusunneranit avissaartikkuminaatsoq immikkut ilisimasallit aamma oqaatigaat.
Oqaloqatigiinnneq nangeqqinniaraat
Kommuneqarfik Sermersooq Laudersip inuussutissarsiornermi suleqatigisaanit Josette Sheeranimit ataatsimiinnermit sapaatip akunnera qaangiuttoq allagarsivoq, taassuma ataatsimiinnertik aamma eqqumiitsuliat, kulturip, timersornerullu kalaallinut qanoq pingaaruteqartigineranik toqqaannartumik tusarfiginnissinnaanertik qujassuteqarfigaa.
Taassuma nammineq Lauderillu kalaallit politikeriinik oqaloqatiginninnerik nangeqqikkusukkitsik aamma qanoq tapersersuisinnaanerlutik aamma suleqatiginnissinnaanerlutik takorluukkami ineriartornermi misissuiffiginiaritsik allakkaa, Finans allappoq.
KNR-ip kalaallinik inuussutissarsiuteqartunik naalakkersuisunilu siuttunik aningaasaliinissamut periusissiornissamik ineriartortitsinermik ukiorpassuarni qanimut suleqateqarsimanerarluni New York Postimi aliikkutassiani oqaaseqarfimmi siorna allagaqartumut pisoorsuarmut tunngatillugu saqqummiussaq malinnaaffigaa.
