Tusagassiuutit: EU-p Nuummut tikeraarnissaq kinguartikkaa – Milliardinik isumaqatigiissut nutaaq utaqqineqartoq

Europa-kommissionip siulittaasuata Nuummut tikeraarnissani piffissaligaanngitsumik kinguartippaa. Milliardit koruuninik aningaasaliinissamut nutaamik isumaqatigiissuteqartoqarsinnaavoq.

Allattoq Markus Valentin

apriilip 07-at 2026 14:32

Nutserisoq Connie Fontain

Europa-Kommissionip siulittaasuata, Ursula von der Leyenip nunarput marsimi tikeraarniarlugu pilersaarutigigaa tusagassiorfiup Bloombergip februaarimi saqqummiuppaa.

Taassumali tikinnissaa piffissaligaanngitsumi kinguartinneqartoq, Euracticip maanna allaaseraa.

Tamanna Danmarkimi naalakkersuisunik suli pilersitsisoqannginneranik pissuteqarpoq.

Aamma atuarukEuropa-kommissionip nunatsinnut tapit milliardilikkaat marloriaatinngorlugit qaffanniaraat

Europakommissionip oqaaseqartartuata tikeraarnissamut atatillugu Danmark suleqatigigitsik Euractivimut oqaatigaa.

Naalakkersuisut ministeriuneqarfilluunniit Euractivimut oqaaseqarumanngillat.

KALAALLIT NUNAATA EU-LLU SULEQATIGIINNERAT

EU-p nunatsinnut tapiissutigisartagai nunatta aningaasaqarneranut tulliullutik tapersiisuupput. Aningaasanut ukioq maannamut inatsit naapertorlugu nunatta aningaasaqarneranut ukioq maanna tapiissutai 250 million koruunit sinneqqavaat.

EU-p Kalaallit Nunaatalu akornanni isumaqatigiissutit aningaasaqarnermut tunngasut arlaqarput, aningaasaliinermut uku ukkatarineqarlutik; ilinniartitaaneq, aammali aalisarneq silallu pissussaa.

EU-p Ataatsimiititaliarsuata Kalaallit Nunaannut 2028-mit 2024-mut missingersuusiani takuneqarsinnaavoq tapiissutigisartakkani marloriaatinngortinniarai. Missingersuusiarli suli akuerineqanngilaq.

Kalaallit Nunaat Issittumi nunani kisiartaalluni EU-mik suleqateqarnermik isumaqatigiissuteqarpoq.

Kalaallit Nunaat EU-mit, taamani EF-imik ateqartumit, 1985-imi ilaasortaajunnaarpoq.

Allisiguk

Millioninik isumaqatigiissut nutaaq

Aningaasaliisarnermut atatillugu siunissami suleqatigiinneq qanoq iluseqassanersoq, Naalakkersuisut EU septembarimili isumaqatiginninniarfigaat.

Europakommissionip Nuummut aningaasaliinissamik isumaqatigiissuteqarsinnaaneq 1,1 milliardit koruuninik – tassa 150 millionit euronik naleqartoq oqaluuserisimagaa Euractivip allaaseraa.

EU nunatsinnut 250 millionit koruuninik ukiumoortumik ullumikkut aningaasaliissuteqartarpoq.

Aamma atuaruk Aaja Chemnitz: EU-mit milliardilikkaat aalaakkaatitsinermik qulakkeerinnipput – isumalluutigiuaannassanngilagulli

Aningaasaliinissamut isumaqatigiissutip nutaap saqqummiunneqarnerata saniatigut EU-Kommissionip missingersuutinut isumaqatigiissut nutaaq, tassa Kalaallit Nunaannut tapiissumminnik marloriaatinngortitsiniarnertik siorna septemberimi saqqummiuppaa.

EU taamaalilluni katillugit 4 milliardit koruuninik – tassa 530 millionit euronik – nunatsinnut 2028-mit 2034-mut tunniussaqarniarpoq.