Dragstedip Løkke isumaqatiginninniarnissaminut piumassuseqaqqullugu kajumissaaraa

Enhedslistenimi politikkikkut oqaaseqartartup, Pelle Dragstedip, USA-p præsidentiata Donald Trumpip Kalaallit Nunaat eqqaaqqereeraalu, “naalakkersuisunik ivertitsipallannissaq” kissaatigaa.

DR-ip nutaarsiassiinera naapertorlugu ministeriunerup allaffianut naalakkersuisunik marlunngornermi ullaakkut isumaqatigiinniariartornermini taama oqarpoq.

Tamannali anguniarlugu "tamatta isumaqatigiinngissuteqaraluarlutaluunnit isumaqatigiissuteqarsinnaanissatsinnut piumassuseqartariaqarpugut“, nangilluni oqarpoq.

TV 2-p ilanngutassiaa naapertorlugu Pelle Dragsted Moderaternenut politikkikkullu siuttuusumut Lars Løkke Rasmussenimut kajumissaaruteqarpoq.

- Uagut Løkkemik isumaqatiginninniaqateqarnissaq mattussimanngilarput.

- Tamattali, aamma Lars Løkke, isumaqatigiinngissuteqaraluarlutaluunniit isumaqatigiissuteqarsinnaanissatsinnut piumassuseqartariaqarpugut immitsinnullu naleqqussarusussuseqarluta, Dragsted oqarpoq.

Piumassuseqarpianngitsutut nalilerai

Kunngikkormiut misissuisartuata Mette Frederiksenip (S) Socialdemokratit, SF aamma Radikale naalakkersuisussatut sapaatit-akunnerini marlunni kingullerni misissorpai.

Partiilli taakku pingasut amerlanerussuteqarsinnaanngillat, taamaattumik partiinit arlalinnit tapersersorneqartariaqarput - tassanilu isumaqatiginninniarnerit Alternativetimut, Enhedslistenimut Moderaternemullu tunngatinneqarsimapput.

Lars Løkke Rasmussenilli Enhedslistenip naalakkersuisuutitani taamaattuni pingaarutilimmik inissisimalernissaa isumalluarfigaa.

Taassumap Socialdemokratit, Venstre Konservativillu peqataanissaannut kajumissaarpai. 

Pelle Dragstedip Mette Frederiksenip Venstrep Konservativillu naalakkersuisooqatigilernissaat takorlooruminaassoraa.

- Allatut periarfissaqarsinnaaneq takujuminaatsillugu nassuerutigisariaqarpara. Venstrekkut De Konservativekkullu Mette Frederiksenip ministeriuninngortinneqarnissaannut imaluunniit Lars Løkkep nunanut allanut ministeritut atorfinitsinnissaanut piumassuseqarpianngitsutut nalilerpakka, Dragsted marlunngornermi Mette Frederiksenimik ataatsimeeqateqareerluni oqarpoq.

/ritzau/