NATO-p aaqqissuussaanera Trumpip nutaanngilinerarpaa: Maannali muminganik isummerpoq
USA-p præsidentiata Donald Trumpip illersornermut suleqatigiiffik NATO pillugu politikkikkut isummani allanngoraa, tuluit nutaarsiassaqartitsiviat BBC allappoq.
Illersornissaq pillugu suleqatigiiiffik nutaanngilinerarlugu siuliani isummeraluartoq isumaa allanngorpoq.
-Naagga, isumaqarpunga NATO akerliata tungaanut ingerlasoq peqqutigalugu, iligiinnermi aningaasartuutaasut nammineq akilersorneqarput, Donald Trump BBC-mut oqarpoq.
Siuliani anguniagaa tassaasoq europap NATO-mi ilaasortaasa illersornissamut aningaasartuuteqarnikkut qaffaanissamik anguniaaneq, sivisuumik noqqaassutigereerlugu qaffaasoqarpoq.
Nunat isertitaasa 5%-ii illersornissamut atorneqassasut Trumpip noqqaassutaannut ilaavoq, NATO-milu nunat ilaasortaasut qullersaasa kingullermik noqqaassutaasoq junimi akueraat.
Nunat mikinerit NATO-mut ilaasortaarnermikkut nunat anginerusunit navianartorsiortinneqaratarsinnaanissaat pinaveersaarlugu taama anguniaalluni, BBC-mit apeqqarissaarneqarami oqarpoq.
Ruslandip sorsunneq unitsissagaa
Præsidentip illorsuani Washington D.C-mi pukkitsormiumit NATO-milu qullersamit Mark Ruttemit Trump ataasinngormat tikeraarneqarpoq.
Ataatsimiinnermi USA-mit igeriuttakkanut illersuutit Patriotinik taagorneqartut Ukrainemut nassiunneqassasut tamannalu NATO-mit aningaasalerneqassasoq eqqartorneqartoq paasinarsivoq.
Nutaarsiassaqartitsiviup AFP-p allaatigisaa naapertorlugu sakkutuut atugassaat milliardinik dollarinik naleqarnerarlugit -tassa matumani koruuninngorlugit 6,39 millionit koruuninik naleqarnerlugit-, Trump oqarpoq.
Aamma ataasiaannarani Russit præsidentiata Vladimir Putinip iliuusai isornartorsiorlugit marlunngornermi BBC-mut oqaqattaarpoq. Putinnip Ukrainemut sorsunneq unitsissagaa, Trumpip kissaatigaa.
-Oqaloqatigiinnerput imaappoq: isumaqatigiissuteqarpugut, isumanni torralllaavugut, kinguninngua inissiarsuit Ukrainep illoqarfiisa pingaarnersaaniittut sequmissavai, Trumpip Putin oqaloqatigisimanera pillugu oqaluttuarpoq.
Ullut 50-it ingerlaneranni sakkuaakkunnaartoqanngippat, Ruslandimut akitsuusersuiniarluni Trump ippassaq ataasinngornermi russit præsidentiannut siorasaaruteqarpoq.
