Eqqaaniut: Nathan Biilmann toquvoq

Tupannarlunilu aliatsannangaartumik KNR-mi sulisuusugut arfininngornermi ullaap tungaa ilisimatinneqarput ataqqineqarluni nuannarisaallunilu KNR-mi suleqataasoq Nathan Biilmann toqusoq. Nathan Biilmannip nalunngisarpassui qularnanngilaq aamma taamatut misigisimassasut.

Nalunngisarpassuaqarneratigut takuneqarsinnaavoq inuttut, teknikeritut namminerlu piumassutsimik timersoqatigiiffilerinermi suliarpassuaqartoq.

Nathan Biilmann Maniitsumi 1947-mi inunngorpoq atuartuuninilu Nuummi realskolemi naggaserlugu. Realskolemiinnermilu ikinngutitaarpoq ukiorpassuit ikinngutigisaminik toqussi tikillugu attavigisaminik.

Reaskole sioqqullugu meeqqat atuartut angajoqqaarsiaqarlutik ukiillutik Danmarkiliartut siulliit ilagalugit apersorteriitsiaannarluni ukiivoq.

Nathan Biilmann KNR-mi teknikeritut 1966-mi ilinniartunngorpoq.

- Taamanili KNR-mut iserama suli aneqqinngilanga, Nathan Biilmann ilisaritinneqarluni radiomi aallakaatitassiarineqarnermini qungujulluni oqarpoq.

Taamaattoq ukiut pingasut Danmarksradiomiiluni Aarhusimi DR-ip immikkoortoqarfiani sulivoq radiomi aallakaatitassioriaatsit assigiinngitsut ilikkagaqarfigilluarlugit. Aamma DR-mi Aarhusimi sulinermini KNR-mut sullissisarpoq.

Nathan Biilmann aallarnisaasunut ilaavoq KNR-TV 1982-mi aallartinneqarmat Nunatsinni tv-mi aallakaatitassiani siullerpaani suleqataasarluni. Pisunut immikkuullarissut assiliiviup isaatigut takunnillaqqissutsimigut sineriammi aallakaatitassuarpassuit pitsaassusaasigut kivitseqataaffigisarpai.

Nathan Biilmann eqqissisimasumik pissuseqarpoq. Pissuseq taanna teknikeritut kingusinnerusukku teknikerinut pisortatut sulinermini iluaqutigisaqaa.

Timersullaqqissoq

Eqqissilluni pisut ilungersunarsigaluartut qulaaniit takunnilluarsinnaanera suliaani assigiinngitsorpassuarni iluaqutaasarsimaqaaq. Tupinnanngitsumik aamma suleqataasa pissuseq taanna toqqissisimassutigisarpaat.

Nathan Biilmann timersullaqqissuuvoq. Nuummi realskolemi atuartuunermini atletikkertarpoq. Ilisimaneqarneruvorli arsaatillaqqissutut ukiorpassuarni NÛK sinnerlugu arsaattartuugami toqussi tikillugu tapersersortuarlugu.

Taktikkimut paasinnittaasaa arsaaffimmiinnaq pineq ajorpoq. Kalaallit Nunaanni arsaattartut kattuffiat GBU-mik taaguuteqarluni 1971-mi pilersinneqarmat Nathan Biilmann siulersuisuni siullerni ilaasortaavoq.

Nathan Biilmann kattuffilerillaqqissuunermigu kingusinnerusukkut Kalaallit Nunaanni timersoqatigiit kattuffianni GIF-mi siulersuisuni ilaasortaavoq.

- Inuuninni pingaartitaraara tatigisinnaasannik ikinnguteqarneq. Qujanartumik taamaattoqarpoq. Asorsuaq nuannerpoq aalajaatsunik ikinnguteqarluni, Nathan Biilmann radiomi ilisaritinneqarnermini oqarpoq.

Pingaartilluinnagaalu tassaapput panini ernuttanilu assut tulluusimaarutigalugit oqaluttuarisarlugit.

Nathan Biilmann 2013-mi soraarninngoraluarpoq. Sivitsorianngitsorli KNR-mut uterpoq. Ukiorpassuit kingulliit KNRip toqqorsiviani minnerunngitsumillu digitalinngorsaanermi suleqataavoq aallakaatitassiat nalunaaquttap akunnerpassuinik sivisussuseqartut digitalinngorsarlugit. Taamaasilluni videot atorlugit toqqorterisoqartarsimaneraniit aallakaatitassiarpassuarnik tammatsaaleeqataavoq.

Nathan Biilmann maqaasineqalereerpoq assorsuarlu qujassutissaqarfigineqarpoq KNR-mi timersornerullu silarsuaani sulisimanerminut.

Nathan Biilmannip qimatarai panini pingasut ernuttanilu.

Eqqaaneqarnera ataqqinartuuli.