Nanortalimmiut nunaqarfimmiuilu taasisut
Nanortallip, Narsarmijit, Aappilattup, Ammassiviup Alluitsup Paallu Kommune Kujallermiiginnassanersut ullumikkut taasissutigineqarpoq.
Nanortallip nunaqarfiisalu Kommune Kujallermiikkunnaarnissaat pillugu atsiornernik 2024-mi katersisoqarpoq.
’Ulloq angisoorujussuaq’
Malik Serano Frederiksen atsiornernik katersinermik aallartitseqataasut ilagaat, taassumalu ulloq angisoorujussuunerarpaa.
- Kiisami piviusunngorpoq una taasititsinissaq. Taamanikkut taasititsinitta kingunera ullumikkut takusinnaanngorparput.
Sooruna nammineq kommuneqalernissaq pisariaqartikkissi?
-Taamanikkut kommunerujussuit kattussuummata immaqa nunarput tamarmi iluatsippallaarneqanngilaq. Pingaartumik maani isorliunerusut, Nanortalik nunaqarfittagullu kinguussaasutut inissisimavugut massakkut ukiorpanni. Kisianni periarfissanngorpoq nutaamik nammineq kommuneqaqqilernissarput.
Taasisorpassuaqarnissaa neriuutigineqartoq
Malik Serano Frederiksenip Nanortalimmi taasititsineq soqutigineqartorujussuunerarpaa, nunaqarfimmilu aamma taama amerlatigisut taasinissaat neriuutigalugu.
Taasititsineq qanoq neriulluarfigitigiviuk illit?
-Pissanganarpoq soorunami taasititsineq. Uani taasinnaavara taamanikkut atsiornernik katersigatta, innuttaasorpassuit aamma atsiornikuupput. Naatsorsuutigivara ullumikkut silageqimmat nunaqarfittagut ilanngullutik taasiartukaassasut. Tassa kissaatigivara soorunami nammineq kommuninngoqqinnissamut innuttaasut amerlanerit kissaatigissagaat.
Septembarip 11-anni taasititsinerup inerneri politikkikkut aalajangiisartunut (Inatsisartunut, aaqq.) nassiunneqassapput. Kommune Kujalleq inernerit tunngavigalugit qanoq ingerlaqqittoqarnissaanik aalajangiisinnaanngilaq, suliap Inatsisartunit suliarineqarlunilu aalajangiiffigineqartussaanera pissutaalluni, Malene Vahl, taasititsinissaq pillugu nutaarsiassaq juulimi saqqummiunneqarmat oqarpoq.
