Najaaja Lyberth Heilmann arnat nunanut allanut unammisartuini unittoq
Assammik arsartartup, Najaaja Lyberth Heilmannip unammisartuunini unitsinniarlugu aalajangerpaa. Kalaallit Assammik Arsartartut Kattuffia tusagassiuutinut nalunaarummi allappoq.
Assammik arsartartup uninnissaminik aalajangiinera eqqarsarluaqqaarnikkut pisoq tusagassiuutinut nalunaarummi aamma allassimavoq. Aalajangiineq tamanna siullertut ilaquttaminik salliusserusunneranik pissuteqarpoq.
- Aalajangiineq oqittuinnaasimanngeqaaq. Sivisuumik suna tamaat ataqatigiissariniarsarigaluarpara, suli pimoorullugu nunanut allanut unammisartoorusukkama saniatigullu ilaqutamaarniarlunga. Kisianni isumaqarpunga maannakkorpiaq aalajangiinera uannut ilaquttannullu eqqortuusoq, Najaaja Lyberth Heilmann oqarpoq, erseqqissaallunilu:
- Tulluusimaarnaqaaq Kalaallit Nunaat sinnerlugu unammisarsimanikka, aammalu tulluusimaarutigiuaannassavara kiat atorlugu nunanut allanut unammigaangatta. Nivissat maqaasissaqaakka, ataatsimoortarnigut ataatsimullu misigisarpassuagut maqaasissaqaakka. Qujanarujussuaq piffissamut nuanneqisumut puigunaatsunullu.
Maqaasineqassasoq
Timersoqatigiit Assammik Arsartartut Kattuffiata – TAAK-ip – Najaaja Lyberth Heilmannip unammisartuunerminik unitsitsinera aamma oqaaseqarfigaa. Assammillu arsartartoq ukiorpassuarni aalajaalluni pimoorussisimanera pillugu qujassuteqarfigaa.
- Kalaallit Nunaat sinnerlugu ukiorpassuarni arsartartoq uninniarluni aalajangerpat, soorunami tamanna malugissavarput. Najaaja arnani nunanut allanut unammisartutut pingaaruteqarsimaqaaq, ataatsimoornerni Kalaallit Nunaanilu assammik arsarnermi ineriartortitseqataasimavoq, Timersoqatigiit Assammik Arsartartut Kattuffiat oqarpoq.
Kattuffiup siulittaasuat, Carsten Olsen tamatuma saniatigut ima oqaaseqarpoq:
- Ilaquttani salliutinniarlugit aaliangiinera ataqqeqaarput. Unammisarfimmi, aammalumi avataani tunniussaqarsimaneranut qamannga pisumik qutsavigeqaarput. Najaaja nunanut allanut unammisartut oqaluttuassartaaniittuassaaq.
Kalaaleq nunanut allanut unammisartunut sungiusaasoq, Jakob Larsen assammik arsartartup uninnera aamma attortissutigaa, ilaatigullu oqarluni:
- Najaaja ilaqutaalu siunissamik ajunnginnerpaamik kissaappakka, ilanngullugulu ukiorpassuarni suliniutaanut qujangaarlunga. Kalaallit assammik arsarlutik arnani nunanut allanut unammisartuusunut oqaluttuarisaanerannut ilusilersueqataalluni tamanna ataqqisassaavoq, maqaasinassaqaaq.
Aalajangernerup peqatigisaanik tamanna Najaaja Lyberth Heilmannip Canadami nunarsuatsinni 2026-mi decembarimi pissartanngorniunnissamut anngunniunnermi peqataassannginneranik tamanna aamma isumaqarpoq. Naalli Najaaja Lyberth Heilmann nunanut allanut unammisartuunini unitsikkaluarlugu assammik arsartarnini ingerlatiinnassavaa.