USA-p Kalaallit Nunaanni sakkutuuliinerusinnaanissaa Folketingimi akuersissutigineqartoq
Isumannaatsuunissaq illersornissarlu pillugu isumaqatigiissutip Folketingimi akuersissutigineqarneratigut USA Kalaallit Nunaanni sakkutuuliinerusinnaalerpoq.
109-t akuersipput akerliusoqarnanilu.
USA-p Narsarsuarmi Mestersvigimilu sakkutuuliisinnaanissaa, Danmarkip, Kalaallit Nunaata USA-llu isumaqatigiissusiornerisigut ammaanneqarpoq. Isumaqatigiissut nutaaq illuatungeriit illersornissaq pillugu 1951-imi isumaqatigiissusiannut allannguinerullunilu ilassuteqarfiuvoq.
Isumaqatigiissutip atuunnissaata sivisussusissaa ullulerneqanngilaq, naalakkersuisullu siulittaasuannit Jens-Frederik Nielsenimit(D), ministeriunermit Mette Frederiksenimit(S) USA-llu præsidentianit Donald Trumpimit atsiorneqarluni.
Isumaqatigiissut inatsisarutni novembarimi siusinnerusukkut akuersissutigineqarpoq, Folketingimilu sisamanngornermi akuersisutigineqarluni.
USA-p Kalaallit Nunaanni sakkutooqarfinnik nutaanik marlunnik pilersitsisinnaanissaa isumaqatigiissutaavoq, “Kunngeqarfiup Danmarkip oqartussaassusia nunataatalu ataatsimuussusia ataqqineqartariaqartoq, aamma kalaallit inuiaat nunat tamalaat inatsisaat naapertorlugit namminersulernissaminnut pisinnaatitaaffeqartutut inuiaqatigiittut akuersaarneqartut.”