Naalakkersuisut nutaat aaku
Nunatsinni politikerit upernaakkut ataatsimiinnerup aallartinnissaanut Nuummi ullumi katersuupput.
Pisarnittut ataatsimiinnerat KNR 2-kkut malinnaavigineqarsinnaavoq danskisullu Inatsisartut nittartagaani isiginnaarneqarsinnaalluni.
Kim Kielsenimit Siumumit ukioq manna siusinnerusukkut anisumit siulittaasuuffigineqartumut Inatsisartuni siulittaasumik toqqaanissaq naalakkersuisunillu nutaanik sisamanik saqqummiinissaq oqaluuserisassanut ilaapput.
Naalakkersuisut nutaat sisamat ullumi saqqummiunneqartut, Mads Pedersen (IA), Bentiaraq Ottosen (A), Naaja H. Nathanielsen (IA) aamma Vivian Motzfeldt (attaviitsoq) taarserlugit atuutilissapput, taakku naalakkersuisoqatigiit siorna apriilimi atuutilerneranniilli assigiinngilluinnartunik tamarmik pissuteqarlutik naalakkersuisutut tunuarnikuupput.
Inatsisartunut siulittaasoq
Inatsisartut siulittaasuat siulliullugu saqqummiunneqarpoq. Demokraatit Kim Kielsen innersuussutigaa, taamaalillunilu siulittaasutut ingerlaqqittussaarpasilluni.
Kim Kielsen Siumumi ukiuni 41-ni ilaasortaareerluni partiip naalakkersuisoqatigiinnermit tunuarniarluni aalajangerneranut isumaqataanani partiimit qaammatip siuliani anivoq, tamannali siulittaasutut ingerlaannarsinnaaneranut allannguinngilaq. Tamanna Kim Kielsenip Vivian Motzfeldtillu naalakkersuisoqatigiinni partiinik suleqateqarnissaq isumaqatigiissutigisimammassuk periarfissaavoq. Kim Kielsenip Vivian Motzfeldtillu naalakkersusioqatigiit tapersersorniarpaat.
Vivian Motzfeldt Inatsisartut siulittaasuannut sinniisussatut innersuunneqarpoq.
Naleraq Siumullu Inatsisartunut siulittaasumik toqqaanissamut taaseqataanianngillat. Naleraq naak taaseqataanianngikkaluarluni Kim Kielsenip siulittaasutut ingerlaqqiinnarnissaa siunnersuutigaa.
Kim Kielsenip siulittaasuuginnarnissaanut Vivian Motzfeldtillu sinniisussaanissaanut 18-it akuersipput. Akerliusoqanngilaq, qulillu taaseqataanngillat.
Mimi Karlsen, Pipaluk Lynge, Aki Mathilda Høegh-Dam aamma Kuno Fencker siulittaasoqarfimmi ilaalerput.
Naalakkersuisut nutaat sisamat
Jens-Frederik Nielsen (D) naalakkersuisunut ilaalertussanik arlalinnik innersuussuteqarpoq.
Atit nutaat tassaapput Mariane Paviasen Jensen (IA), Jørgen Rosbach (D), Iddimanngiiu Bianco (IA) aamma Maritha Broberg (A).
Naleraq naalakkersuisunik nutaanik taasineqataanianngitsoq, Jens Napãtôk oqaaseqartarfimmit oqarpoq.
Erik Jensen assinganik oqaaseqarpoq:
- Ilaasortassanik Danmarkimut suliffissarsiortunik innersuussuteqartoqarnera eqqumiilaarpoq, taanna Jens Napãtôk tulleralugu oqarpoq. Siumumit oqaaseqartup taamaammat partiip naalakkersuisunik nutaanik taaseqataanianngitsoq aamma oqaatigaa.
Naalakkersuisut nutaat aaku
Inatsisartut nittartagaanni naalakkersuisuni ilaasortaaffiit akisussaaffiillu allattorsimaffiat nutaaq allassimavoq.
Naalakkersuisut Siulittaasuat: Jens-Frederik Nielsen (D)
Nunanut allanut, Inuussutissarsiornermut, Aatsitassanullu Naalakkersuisoq: Múte B. Egede (IA)
Aningaasaqarnermut Naalakkersuisoq: Aqqaluaq B. Egede (IA)
Ilinniartitaanermut, Kultureqarnermut, Timersornermut Ilageeqarnermullu Naalakkersuisoq: Nivi Olsen (D)
Avatangiisinut, Pinngortitamut, Nukissiutinut, Ilisimatusarnermullu Naalakkersuisoq: Jørgen Rosbach (D)
Meeqqanut, Inuusuttunut, Inatsisit Atuutsinneqarnerannut Naligiissitaanermullu Naalakkersuisoq: Mariane Paviasen Jensen (IA)
Peqqissutsimut inunnullu Innarluutilinnut Naalakkersuisoq: Anna Wangenheim (D)
Ineqarnermut, Attaveqaasersuutinut Isorliunerusunut Upalungaarsimanermullu Naalakkersuisoq: Iddimanngiiu Jensen Bianco (IA)
Aalisarnermut, Piniarnermut, Nunalerinermut Imminullu Pilersornermut Naalakkersuisoq: Peter Borg (D)
Isumaginninnermut, Suliffeqarnermut Ilaqutariinnut Nunamullu Namminermut Naalakkersuisoq: Maritha Broberg (A)
Akisussaaffinnik nutaanik agguaaneq
Naalakkersuisut nutaat nutaamik agguaanneqarput. Múte B. Egede taamaalilluni Vivian Motzfeldt taarserlugu nunanut allanut naalakkersuisuulerpoq. Taassuma oqartussaaffiit inuussutissarsiornermut aamma aatsitassanut naalakkersuisuuffiit Naaja H. Nathanielsenimit nangippai.
Múte B. Egedep parteeqataata Aqqaluaq B. Egedep Múte B. Egedep aningaasanut naalakkersuisuuffigisaa nangippaa.
Meeqqanut inuusuttunullu oqartussaaffik Mads Pedersenimit naalakkersuisuuffigineqarsimasoq naalakkersuisunut nutaamut Mariane Paviasen Jensenimut aamma inatsisit atuutsinneqarnerannut naligiissitaanermullu naalakkersuisuulersumut tunniunneqarpoq.
Tamatuma saniatigut isumaginninnermut suliffeqarnermullu oqartussaaffiit naalakkersuisumut nutaamut Maritha Brobergimut tunniunneqarpoq. Bentiaraq Ottosenip taakku novembarimi tunuarnissani tikillugu akisussaaffigai.
Naalakkersuisut nutaat taasissutigineqarneranni 18-it akuersipput, akerliusoqanngilaq. Naalakkersuisut nutaat taamaalillutik pisortatigoortumik akuerineqarput.
- Qinersinissinnut qujanaq, naalakkersuisut siulittaasuat, Jens-Frederik Nielsen, oqaaseqartarfimmit oqarpoq.
Naalakkersuisut nutaat:
Naalakkersuisut nutaat:
Inatsisartut Ataatsimiinnerat aallartinngilaataani:
