Naalakkersuisup Trumpip iliuusaa isornartorsioraa: - Tatigeqatigiinnermut innarliivoq

Vivian Motzfeldt naapertorlugu, USA-p "tusagassiuutitigut suleqatigiinnissamut ajoqutaasunik oqariartuuteqaqattaarnera” tatiginninnermut innarliivoq.

Allattoq Ann-Sophie Greve Møller

decembarip 23-at 2025 10:09

Nutserisoq Karla Heilmann

Nunanut allanut tunngasunut Naalakkersuisoq Vivian Motzfeldtip USA-p aallartitaa Ken Howery Nuummi tusagassiortunut sassarnermi sapaatip-akunneri marluk matuma siorna nikorfaqatigaa, illugiilluni ataqqeqatigiinnissaq suleqatigiinnissarlu pillugit oqaluullutik.

USA Kalaallit Nunaannut ‘immikkut aallartitamik’ toqqaasoq ataasinngornermi paasinarsivoq. Naalakkersuisut – inuiaallu sinneri assigalugit – tusagassiuutitigut tamanna paasivaat. Vivian Motzfeldt tusagassiuutinut nalunaarummi paasissutissiivoq.

Nuummi tusagassiortunut sassarnermi Motzfeldtip præsident Trumpip oqaaserisai toqqissisimannginnermik pilersitsinera pillugu oqaaseqarpoq. Trumpi naapertorlugu, USA-p nunat allat akornanni sillimaniarnermut Kalaallit Nunaat atorfissaqartippaa.

KALAALLIT NUNAANNUT IMMIKKUT AALLARTITAQ

Amerikap præsidentiata Trumpip guvernøri Jeff Landry Kalaallit Nunaannut immikkut aallartitatut toqqarpaa.
Landry “Kalaallit Nunaata USA-mut ilanngunnissaa”-nut suleqataanissani qilanaaralugu inoqatinut attaveqaammi X-imi allappoq.
Tamanna Naalakkersuisuniit danskillu naalakkersuisuiniit isornartorsiorneqangaatsiarpoq. Danskit nunanut allanut ministeriata Amerikap aallartitaa Ken Howery pisoq pillugu oqaloqatiginiarlugu Nunanut allanut Ministeriaqarfimmut aggersarpaa.
Immikkut aallartitaq tassaavoq diplomati qaffasissumik atorfilik aalajangersimasumik suliassinneqartartoq. Suliassaa aalajangersimasuuvoq atorfillu killeqarluni.
Nunani sorsuffiusuni akerleriiffiusuniluunniit kiffartortarput, tassanilu isumaqatigiinniartitsisarput pissutsinullu aaqqiiniarsarisarlutik.
USA nunarsuaq tamakkerlugu arfineq-marlunnik immikkut aallartitaqarpoq.
USA-mi isumannaallisaanermut tunngatillugu USA-p Kalaallit Nunaat aqulernissaa pisariaqartikkaa decembarip 23-annut unnuaani tusagassiortunut sassarnermi Trumpip oqaatigeqqippaa.

Allisiguk

Trumpip Kalaallit Nunaat ukkataralugu ‘immikkut aallartitamik’ toqqaanera tatiginninnermut innarleeqqinneruvoq, Motzfeldt oqarpoq.

- Inuiaat Kalaaliuvugut. Nunarput pigaarput allat aqulernavianngilaat pigilernavianngilaallu, Vivian Motzfeldt tusagassiuutinut nalunaarummi oqarpoq.

Trumpip aallartitaa Kalaallit Nunaannik ukkatarinnittussaq tassaavoq guvernøri Jeff Landry. Taanna atorfittaaminut qujalluni “Kalaallit Nunaata USA-mut ilanngunnissaa”-nut suleqataanissani qilanaaralugu inoqatinut attaveqaammi X-imi allappoq.

Tatiginninnermut innarliisoq

Issittumi sillimaniarneq illersornissarlu eqqarsaatigalugit Nunatta USA-lu suleqatigiinnissaq pisariaqartippaat, Vivian Motzfeldt oqaqqippoq.

Tamanna pissaaq politikikkut immitsinnut kiinnerluta ataqqeqatigiillutalu, taanna oqarpoq.

- Tusagassiuutitigut suleqatigiinnissamut ajoqutaasunik oqariartuuteqaqattaarneq tatigeqatigiilluni nunatta akornanni suleqatigiinnerulernissamik kissaammut innarliivoq.

- Uagut politikikkut naapissinnaavugut naatsorsuutigaarpulli USA-p demokratiskimik ingerlatsineq ilisimaarilluaraa ilisimassagaalu nunatta politikikkut inissisimaffia suullu pingaartitarinerivut.

- Naatsorsuutigaarput angusaqarfiusussamik ataqqinnittumillu oqaloqatiginnittoqarumaartoq. Naatsorsuutigaarpullu piffissami aggersumi Amerikamiut akunnerminni ataqatigiissaakkamik oqariartuuteqartassasut, Naalakkersuisoq oqarpoq.

Aamma atuarukTrumpip Kalaallit Nunaat pigilerumallugu oqaatigeqqikkaa

“Ataatsimut killeqarfitta ataqqineqarnissaa naatsorsuutigaarput” Jens-Frederik Nielsenip ataasinngornermi aamma erseqqissaatigaa.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.