Inuit arfinillit sapaatip akunnerata naanerani imminut toquttut

Politiit nunatsinni sumiiffinni assigiinngitsuni sapaatip akunnerata naanerani imminut toqussimasunut ornigupput. Pisimasut imminnut attuumassuteqanngitsut, politiit tusagassiuutinut nalunaarummi allapput.

Allattoq Nicole Sander Bertelsen

decembarip 23-at 2025 11:37

Nutserisoq Medea Olsen

Kalaallit Nunaanni Politiit sapaatip-akunnerata naanerani pisunut assigiinngitsunut arfinilinnut imminut toqunnernut tunngassutilinnut ornigussimanertik, tusagassiuutinut ataasinngornermi unnukkut nalunaarutigaat.

- Pisut nuna tamakkerlugu sumiiffinni assigiinngitsuni pisimanerat imminnullu attuumassuteqanginnerat, politiit tusagassiuutinut nalunaarutiminni allappaat.

TUSAANNGA

Kiserliorpit aamma oqaloqateqarnissannik pisariaqartitsivit?

Kisimiinngilatit. Piffissani inuunermi pisumiluunniit artornartorsiorfimmi, nammineq sapikkaminnik pisoqaraangat, inuit amerlanerpaat tusaaneqarnissartik pisariaqartittarpaat.

Tusarnaarnissamut piffissaqarpugut. Tusaanngap siunnersortai tusarnaartarput, unammilligassavillu oqaasertalernissaanut ikiorsinnaallutit. Aamma illit inuuninni pissutsit artornartut qanoq iliuuseqarfiginissaanut sakkussannik tunisinnaavaatsit.

Oqarasuaatikkut siunnersuisarneq tassaavoq kinaassutsimik isertuussilluni illit siunnersuisullu akornassinni inuttut oqaloqatigiinneq, tassani oqaloqatigiinnerup imaa illit aalajangissavat.

Meeqqat, inuusuttut inersimasullu tamarmik oqaloqateqarnissamik allaqateqarnissamilluunniit pisariaqartitsisut Tusaannga attavigisinnaavaat. Tusaanngamut attaveqarneq kinaassutsimik isertuussisinnaaffiuutigaluni akeqanngilaq – aamma Tusassit imaqanngikkaluarpalluunniit sianersinnaavutit allallutilluunniit.

Telefon: 80 11 80

SMS: 1899

Tigusiffik: Tusaannga

Politiit tamanna tusagassiuutinut nalunaarutiminni inuiaqatigiinni ajornartorsiutaanerarpaat, erseqqissaatigalugulu oqartussaasut - peqqinnissaqarfik politiillu - imminut toquttarneq pinaveersaartinniarlugu sapinngisartik tamaat iliuuseqartartut.

- Imminut toqunnissamik eqqarsaateqarlutik saaffiginnissuteqartut tamarmik sullinneqarnissaat politiinit qulakkeerneqartarpoq.

- Saaffiginnittup ikiorserneqarnissaanut oqartussaasunukaanneqarnissaa, tassanilu amerlanertigut peqqinissaqarfimmit ikiorneqarnissaa politiinit isumagineqartarpoq, taakkua allapput.

Toqusoqarneranut atatillugu pinerluttoqarsimanngitsoq misissuinerup takutikkaa

Politiit toqusoqarsimaneranut atatillugu pinerluttoqarsimaneranik misissuinerat, KNR-imi sapaatip-akunnerata naanerani allaaserineqarpoq.

Suliaq sapaatip akunnerata naanerani pisimasut arfinillit ilagigaat suliamullu tassunga tunngatillugu pinerluttoqarsimannginnera politiit KNR-imut marlunngornermi ilisimatitsissutigaat.

Politiit tusagassiuutinut nalunaarummi marlunngornermi ima uppernarsaapput:

- Pinerluttoqarsimannginnera politiit misissuinerannit paasinarsivoq, misissuineq taamaattumik naammassineqarpoq. Qanigisaasut kalerrinneqareerput, taakkua allapput.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.