Naalakkersuisut siulittaasuat Jens-Frederik Nielsen (D) marlunngornermi ullaakkut aliasullunilu qujamasuppoq.

Taanna USA-p præsidentiata Donald Trumpip nunatta tiguarnissaanik kissaateqarnini marlunngornermut unnuaani oqaatigeqqimmagu, Facebookimut allappoq.

- Oqaatsimigut Nunarput ataqqinagu illersornissamut pissaanermullu kisimi tunngatillugu eqqartuivoq. Taamaattussaannartut imminut isiginngilagut, Nunarpullu taamaattussaannartut eqqartorneqassanngilaq, Jens-Frederik Nielsen allappoq.

Tamatumunnga ilanngullugu, Nunatta siunissaa nammineerluta aalajangissavarput, namminerlu aaliangiisinnaassuseqarnissarput avaqqutaarneqaannassanngitsoq erseqqissaatigaa.  

Tapersersuisunut qujamasunneq

- Taamaattumik aamma qujamasuuteqarpunga, taanna allappoq.

Nunatsinni politikeriniit kisianni nunarsuup sinneraniit aamma tapersersorneqarnermigut.

Ataatsimuussusermik takutitsiniarlutik Franskit præsidentiat, Tyskit illersornissamut ministerip tullia nunallu allat politikerii ukioq manna tikeraarput. 

- Nunattalu avataaniit siuttut suleqatigisallu ersarissumik nunatsinnut, inuiaqatigiiusugut demokratiillu maani atuutsinneqarneranut inuit pisinnaatitaaffiini aaliangiisinnaassuseqarnissatsinnut ataqqinnillutik tapersiisut qujaffigerusuppakka. Tapersersuineq tamanna kisimiinngitsugut ersersiinnarpaa.