Naalakkersuisoqarfik: Innuttaasunik ataatsimiititsinissat aalajangiusimanerat ileqqorissaarneruvoq
Kuannersuarni aatsitassanik piiaanissamik pilersaarut pillugu innuttaasunik ataatsimiititsinissat kinguartinneqaqqullugit oqallinneqaleruttorpoq.
Kommune Kujalleq Siumullu siulersuisuunertaavi kinguartitseqqusipput.
Kuannersuarni aatsitassarsiorfik pillugu paasissutissat piviusut:
- Kuannersuit Narsap kilometerinik 7,5-inik ungasitsigisumi avannarpasissortaaniippoq.
- Aatsitassarsiorfik asimi 700 meterinik qutsitsigisumiipppoq.
- Greenland Mineralsip aatsitassarsiorfk ukiuni 37-ni piiaaffiginiarpaa.
- Aatsitassarsiorfiup piiaaffigineqarnerani nunaqavissunik 328-nik suliffissaqartitsisoqarsinnaassasoq naatsorsuutigineqarpoq.
- Aatsitassarsiorfik qaqutigoortunik ilaatigut uranimik thoriumimillu saffiugassaqarpoq.
- Aatsitassarsiorfik saffiugassiassamik ukiumut millionit tonsit pingasut missaannik piiaaffiusassaaq.
- Ukiuni 37-ni aatsitassarsiornermit sinnikut 111 millionit tonsiussapput qaarsorlu (qaarsumit piiarneqartumit sinnikut ) 111 millionit tonsiussalluni.
Tusarfik: Pinngortitaleriffik aamma Nationalt Center for Miljø og Energi, IPN-iliaq.
Naallu aatsitassanut inatsit kinguartitsinissamik periarfissiigaluartoq, naalakkersuisup ataatsimiititsinissat kinguartikkumanngilai - aamma naak nammineq peqataassanngikkaluarluni.
Narsap eqqaani aatitassarsiorfissarsuartut suliniut ilumut piviusunngussanersoq Greenland Mineralsip akissutissarsissallugu ukiorpassuarni utaqqereerpaa.
Suliniut ukiut 14-it missaanni aallunneqareerpoq, teknikkikkullu naliliinerit tamanut maanna tusarniaassutigineqarput.
AAMMA ATUARUK Politiit nunatta kujataani innuttaasunik ataatsimiititsinermi isumannaassuseqartoqarnissaa neriorsuutigaat
Naalakkersuisut tusarniaaneq sapaatit akunnerinik sisamanik sivitsoreerpaat aqutsinermilu ileqqut pitsaasut eqqarsaatigalugit sivitsueqqinnissamut periarfissat killeqarput.
Aatsitassanut naalakkersuisoqarfimmi pisortaq, Jørgen T. Hammeken, KNR-imut allakkatigut akissuteqarluni taama paasissutissiivoq.
- Uagut naliliinerput naapertorlugu tusarniaanermi ataatsimiinnerit taamaammat piffissamit naammaginartutut isigineqartumit sivisunerusunngorlugit kinguartinneqartariaqanngillat, taanna allappoq.
Taamaammat innutaasunik ataatsimiititsinissat pilersaarutaareersutut naammassineqarnissaat aalajangerneqarpoq.
Inatsit taama oqarpoq
Tusarniaanerit qanoq sivisutigissanerannik qanorluunniit sivitsortigineqarsinnaanerannik aatsitassanut inatsimmi allassimasoqanngilaq.
Allassimavorli Naalakkersuisut tusarniaanermi ataatsimiititsinernut peqataasinnaanngippata kujataanisulli ittunik aatsitassarsiorniarluni suliniutit pillugit tusarniaanerit sivitsorneqartassasut.
Tassalu tamannarpiaq matumani atuuppoq.
Tassali nammineq naalakkersuisulluunniit allat ataatsimiititsinissatut pilersaarutaareersunut sioorasaarisoqarsimanera peqqutigalugu peqataassanatik, Naalakkersuisoq Jens Frederik Nielsen (D) nalunaarnikuuvoq.
AAMMA ATUARUK Naalakkersuisut Kuannersuit pillugit qaartartumeerinissamik siorasaarinermik tigusaqartut
Taamaakkaluartoq innutaasunik ataatsimiititsinerit pilersaarutaasutut tallimanngorpamiit aallartittumik ingerlanneqassasut oqartussat aalajangerput.
- Inatsisit naapertorlugit pisussaaffigaarput tusarniaatitsissalluta. VSB - inuiaqatigiinnut tunngasut - avatangiisinullu tunngasut naammattumik pisortaniit allaffissornikkut naammassineqartutut nalilerneqarpata. Taannalu toqqammavigalugu tusarniaatitsisussaavugut. Inatsisit napertoqqissaarlugit taanna iliuuseraarput.
Aatsitassanullu naalakkersuisoq aamma Demokraatit siulittaasuat, Jens Frederik Nielsen, Qanoruumut tallimanngornermi taama oqarpoq.
Innuttaasunik ataatsimiititsineq Narsarsuup akunnittarfiani februaarip tallimaani pissaaq.
Tassanili Namminersorlutik Oqartussanit atorfilittat kisimik taavalu Greenland Mineralsimeersut peqataassapput, tassalu Naalakkersuisut peqataasortaqaratik.
