Naaja H. Nathanielsenip naartunaveersaasersuisimanermut inatsisissatut siunnersuut allanngortikkusukkaa
Allaaserisaq Naaja H. Nathanielsenip oqaaserisaanut ilanngussinikkut juulip 17-iani nalunaaqutaq qulinut nutarterneqarpoq.
Inuit Ataqatigiinneersup Folketingimi ilaasortap Naaja H. Nathanielsenip spiralilersuisimaneq pillugu arnanut taarsiissuteqartarnissaq pillugu inatsisissatut siunnersuummi immikkoortut pingaarutillit arlallit allanngortinneqarnissaat kissaatigaa.
Taamaattumik Danmarkimi peqqinnissamut ministerimut maanna apeqqutit 18-it nassiuppai.
Assersuutigalugu sooq taarsiiffigineqarnissamut aaqqissuussaq arnanut Kalaallit Nunaanni najugaqarsimasunut kisimi atuunnersoq paaserusuppaa. Arnat pinngitsaaliissummik kinguaassiorsinnaajunnaarsitsisarnermut ataasiakkaanut tamanut immikkut taarsiiffigineqarsinnaanersut, kiisalu 2028 kingorna aamma qinnuteqarnissamut periarfissaqarnissaa pillugu inatsit allanngortinneqarsinnaanersoq, Folketingimi ilaasortap apeqqutit pineqartut nassiuppai.
- Alloriaqqinnerput pitsaasuuvoq, kisianni inatsisissatut siunnersuummi inaarutaasumi allanngortinneqartariaqartunik immikkoortoqarpoq, Naaja H. Nathanielsen oqarpoq.
Inatsisissatut siunnersuut Folketingimi sukumiinngitsumik juunip naanerani suliarineqarpoq.
Arnat 1960-imiit 1991-imut spiralimik, p-stavimik imaluunniit Depo-Proveramik akuersiteqqaarnatik ikkussivigineqarsimasut Danmarkimit taarsiiffigineqarnissamik juulip aallaqqaataa aallarnerfigalugu qinnuteqarsinnaapput.
Naartusinnaajunnaarsimasut inatsimmi ilanngunneqartariaqartut
Naaja H. Nathanielsen naapertorlugu inatsit inaarutaasumik atuutilinnginnerani pissutsit arlallit erseqqissarneqarnissaat pingaaruteqarpoq.
Aamma Kalaallit Nunaanni angalallutik arnanik taarsiiffigineqarnissamut qinnuteqarusuttunik ikiuisussat pillugit apeqquteqarpoq.
Angalallutik sullissisussat Patienterstatningimit -tassa napparsimasut taarsiiffigineqartarnerat pillugu ataatsimiititaliamit- pilersinneqarput, tassani qinnuteqaatit suliarineqartarlutik.
Angalallutik sullissisussat septembarip ulluisa 28-anniit oktobarip ulluisa 22-ata tungaanut Ilulissani, Uummannami, Aasianni, Qeqertarsuarmi, Qasigiannguani, Maniitsumi Nuummilu paasissutissiissasut, Patienterstatningip siusinnerusukkut KNR-imut oqaatigaa.
Aamma Tunumut kiisalu Kitaanut Kujataanullu angalanissat marluk ukiup tulliani upernaakkut pilersaarutigineqartut ilagaat.
Ilitsersuinerit qinnuteqaammillu paasissutissat Kalaallit Nunaanni oqaatsit atorneqartut tamaasa atorlugit pissarsiarineqarsinnaassasut, Naaja H. Nathanielsenip pingaaruteqartutut isigaa.
- Eqqaamaneqassaaq nunatsinni oqaatsit arlaqarnerat. Kalaallisut saniatigut Tunumiusut aamma atorneqarput, suliallu amerlasuut Tunumi pisimapput. Taamaattumik paasissutissat aamma tunumiusut kiisalu najukkani oqaatsit allat atorlugit saqqummiunneqarnissaat pingaaruteqarpoq, taanna oqarpoq.
Folketingimut ilaasortaq tamanna ilutigalugu isumaqarpoq, kalaallit arnat akuersiteqqaarnagit naartusinnaajunnaarsinneqartut aaqqissuussamut aamma ilanngunneqartariaqartut.
- Danskit naalakkersuisuisa tamanna ilanngunniarnagu sooq aalajangersimanersut naluara. Immaqa naalakkersuisoqatigiit Danmarkimi arnat amerlaqisut danskit inatsisigisimasaat naapertorlugit naartusinnaajunnaarsinneqarnikuunerisa nassuerutiginissaa piareersimaffiginnginnamikku.
Taamaattumik Naaja H. Nathanielsenip danskit naalakkersuisuisa naartusinnaajunnaartitsineq inatsisissatut siunnersuummi ilanngunneqarpat, tamanna arnanit danskinit issuarneqalernissaa isumakuluutigineraat, eqqarsaatigaa.
- Kisianni arnat kalaallit naartusinnaajunnaarsinneqarnerat inatsimmi piumasaqaatit ilaattut soorunami ilanngunneqartariaqarpoq, Naaja H. Nathanielsen nangippoq.
Isornartorsiuisoq
Inuit Pisinnaatitaaffii pillugit Siunnersuisoqatigiit (IPPS) aamma Stenbroens Jurister - tassa ilaatigut pisinnaatitaaffiit pillugit inatsisilerituut - inatsisissatut siunnersuummut tusarniaanermi akissuteqarnerminni ernummatit arlallit saqqummiutereerpaat.
Assersuutigalugu taarsiissutit aalajangersimasumik 300.000 koruuninut aalajangersarneqarsimanerat isornartorsiorpaat.
Stenbroens Juristerimi inatsisilerituup Sina Parbst Frederiksenip oqarnera naapertorlugu, arnat assigiinngilluinnartunik misigisaqarsimagaluartut akuerseqqaaratillu kinguaassiorsinnaajunnaarsinneqarnermik assigiinngitsorujussuarnik kingunerlutsitsigaluartut, amerlanerusunik taarsiiffigitinnissamut qinnuteqarnissamut periarfissaqannginnerulersinnaapput.
Arnat timikkut tarnikkullu assigiinngitsutigut eqqugaasimasut, ilai meerartaarsinnaajunnaarsimasut, siusinnerusukkut KNR-imut nassuiaatigaa.
Taamaattumik inatsisitigut ikiuuttunit (Stenbroens Juristerimeersunit), inatsimmi 300.000 koruunit arnat inuit pisinnaatitaaffiinik unioqqutitsiffigineqarsimanerannut taarsiissutitut kisimik tunniunneqassasut erseqqissumik allassimasassasoq kissaataavoq.
Aningaasat amerlassusiisa allanngortinneqarnissaat 'ajornakusoortoq'
Naaja H. Nathanielsenilli taamatut aaqqiissuteqarnissaq qanoq ilusilerneqassanersoq takujuminaatsippaa.
- Maannakkut qanoq aaqqiisoqarsinnaanersoq takujuminaatsippara, kisianni suliap ingerlanerani tamanna soorunami apeqqutigissavarput, taanna oqarpoq.
Ukioq naatinnagu 1992-ip kingorna – Kalaallit Nunaata peqqinnissaqarfik akisussaaffigilernerata kingorna – akuerseqqaaratik kinguaassiorsinnaajunnaarsinneqarsimasut nunatta naalakkersuisuinut taarsiiffigineqarnissamik qinnuteqarsinnaapput. Arnat 100-t sinnerlugit qinnuteqareerput.
Tassani taarsiissutit 300.000 koruuninit pallillugit amerlassuseqarput.
Naaja H. Nathanielsen siornatigut inatsisinut naalakkersuisuusimasoq spiralilersuisimanerlu pillugu naalakkersuisut oqaaseqartartuat, aaqqissuussap kalaallisuunngortinneqarneranut ilusilersueqataavoq.
Qinnuteqaatit maanna Frederiksen Law-imit suliarineqarput.
Danmarkip taarsiissutit 300.000 koruunit sinnerpagit, Kalaallit Nunaat aamma taamaaliorneqassava?
-Tamanna Naalakkersuisut aalajangissavaat. Aningaasat annertussusaat allanngortinniarlugu ajornakusoortoq isumaqarpunga. Immaqa immikkoortut allat allanngortinneqarsinnaapput, Naaja H. Nathanielsen oqarpoq nangillunilu:
- Naalakkersuinikkut inissisimaneq suliallu ajornakusoortuunera eqqarsaatigalugit aningaasat annertussusaasa allanngortinnissaat ajornarnerussasoq naatsorsuutigaara.
IPPS-ip Stenbroens Juristerillu tunngavilersuutaat paasilluarsinnaallugit, Naaja H. Nathanielsenip ilanngullugu oqaatigaa.
- Naalakkersuinikkut suliassarput tassaavoq: inatsisissatut siunnersuutip maannamit pitsaanerulersinnissaa. Naalakkersuinikkulli anguneqarsinnaasut eqqarsaatigalugit oqimaaqatigiissaarisoqartariaqarpoq, Naaja H. Nathanielsen oqarpoq.
Inatsisissatut siunnersuut Folketingimi aggustip ulluisa 14-anni siullermeerneqassaaq.
