Løkkep Trumpip isumaqatigiissummik saqqummiussinera usorsisimaarnertut isigigaa
USA-p, Kalaallit Nunaata Danmarkillu isumaqatigiissusiorsimanerat USA-p præsidentiata Donald Trumpip tallimanngormat nammineq saqqummiunniarlugu aalajangeraa Lars Løkke Rasmussen (M) oqarpoq.
USA-llu isumaqatigiissusiap immikkuualuttortaanik iluarisimaarinninnerannut tamanna takussutissaasoq nunanut allanut tunngasunut ministeri isumaqarpoq.
- Qaffasissumi inissisimasut isumaqatigiissusiorluarsimanerattut præsidentip isigigaa isumaqarpunga, Lars Løkke Rasmussen, nutaarsiassaqartitsivimmut Ritzauimut USA-mut unnuaq tikikkami oqarpoq.
Nunanut allanut tunngasunut ministeri Naalagaaffiit Peqatigiit sapaatit akunnerata massuma ingerlanerani ataatsimeersuarnissaannut atatillugu ministeri ataatsimiinnernut assigiinngitsunut aamma peqataassaaq.
Lars Løkke Rasmussen, nunanut allanut taamanikkut naalakkersuisoq Vivian Motzfeldt peqatigalugu USA-mi, Kalaallit Nunaanni Danmarkimilu qaffasissumi inissisimasunik suleqatigiissitaliortoqarnissaanik Amerikamiunik isumaqatigiissusiortoqarmalli qaammatit kingulliit arfineq-pingasut ingerlaneranni maanna isumaqatigiissusiortoqarnera Lars Løkke Rasmussenip nuannaarutigaa.
Isumaqatigiissut pillugu oqaaseqarumanngitsoq
Donald Trumpip Kalaallit Nunaannik aqutsilerusunnini ukiortaami oqaatigeqqereeraalu atorfilittatigut ataatsimiittarnerit aallartinneqarput.
- Isumaqatigiissut aatsaat atsioreerutsigu soorunami nuannaarutigissavara. Naalagaaffeqatigiinnermilu tamanna aamma nuannaarutigineqartariaqarpoq. Tassa massakkorpiaq oqaatigisinnaasakka, Løkke oqarpoq.
Isumaqatigiissut suli atsiorneqanngilaq, taamaattumillu suli aalajangerneqanngilaq. Amerikamiulli tusagassiuutaat nutaarsiassiineri naapertorlugit, New Yorkimi marlunngornermi atsiorneqarnissaa naatsorsuutigineqarpoq.
USA-p præsidentia tallimanngormat oqarpoq, USA Kalaallit Nunaat pillugu isumaqatigiissut tunngavigalugu, Kalaallit Nunaanni sakkutooqarneruleriartussasoq.
Tamanna pillugu Danmarkimi nunanut allanut ministeri ima oqarpoq:
- Isumaqatigiissut oqaaseqarfiginavianngilarput. Kisianni, USA-p sillimaniarnerup tungaatigut soqutigisaanik naapertuuttunut akuersaarsinnaanerput aallaqqaammulli oqaatigereerparput, soorlu kunngeqarfik ukiorpassuarni aamma taamaalioreersoq.
- USA-p Kalaallit Nunaanni sakkutooqarfii 17-iusimagaluarput. Maanna ataasiinnaavoq, taamaattumik tamanna aallaavigaarput. Neriuppungali ullualuit qaangiuppata isumaqatigiissuteqassalluta, Lars Løkke Rasmussen oqarpoq.
Tiguaanissamut sioorasaarineq ilungersortitsisoq
USA-p præsidentiata sioorasaarinera Kalaallit Nunaannut sunniuteqarpoq. Naalakkersuisut siulittaasuat, Jens-Frederik Nielsen, januaarimi oqarpoq, kalaallit tiguarneqarnissamik ulluinnarni sioorasaarneqaqattaarmata ilungersunartoq.
Danmarkip nunanut allanut ministeriata, Kalaallit Nunaata pisariaqartitaanik toqqissisimalersinneqarnissaa erinisuutigaa.
- Isumaqatigiissutip kingunerisaanik pissutsit eqqissiallannarsissapput, tamannalu pingaartumik Kalaallit Nunaanni ernumassutaasimaqaaq, tamannalu nammineq Kalaallit Nunaannut angalaninni aamma kalaallit politikeriinik Danmarkimilu kalaallinik oqaloqateqarninni misigaara.
- Isumaqarpunga tamanna pingaarnerpaajungajattoq, tassa atortussatigut tungaatigut imarisaata avataatigut, tamakkumi uterfigisinnaavagut, nunanut allanut ministeri oqarpoq.
/ Ritzau.
