Nunanut allanut naalakkersuisup, Vivian Motzfeldtip maanna naligiissaarisup pissutsit ilungersunarluinnarnerat qularutiginngilaa.

Taassuma Amerikamiut nunanut allanut ministeriat, Marco Rubio sapaatip akunnerata tulliani ataatsimeeqatigissavaa. Amerikamiut nunanut allanut ministeriata Danmark Kalaallit Nunaat pillugu sapaatip akunnerata tulliani ataatsimeeqatigerusullugu, tusagassiortunik pingasunngornermi katersortitsinermi oqaatigaa.

Tamanna Amerikamiut præsidentiata, Donald Trumpip aammaarluni USA-p Kalaallit Nunaannik tiguserusunnera oqaatigereeraalu pivoq.

- Siullertut isumaqarpunga pissutsit assut ilungersunartut. Nunatsinninngaanniit ersareqqissaartumik

 inissisimaffipput oqariartuutigeqattaareerparput, taanna oqarpoq.

Vivian Motzfeldtip sumi qaqugulu ataatsimiittoqassanersoq saqqummiussinnaanngilaa. Ataatsimiinnissaq Danmarkimi nunanut allanut ministereqarfimmit suli uppernarsarneqanngilaq.

Nunattali ataatsimiinnissami tassani qanoq oqariartuuteqarnissaa maanna qularutissaajunnaareerpoq.

- Tassa soorunami siullerpaatut Nunarput nioqqutaanngitsoq, Nunarput inoqartoq, innuttaasut toqqissisimanissaat aatsaat taamak pingaaruteqartigivoq.

- Aqqutit eqqortut aamma inatsisit, nunat tamalaat inatsisaat, inuit pisinnaatitaaffii, nunatsinnilu nunatta inuisa namminneq siunissaminnik aalajangiisussaanerat ataqqillugu suliat ingerlanneqassasut, Vivian Motzfeldt Københavnimi ulluni makkunani ataatsimiigiartoq oqarpoq.

Taassuma tamatuma saniatigut Nunatta USA-p pitsaasumik suleqatiginissaa pisariaqartikkaa USA-llu aamma tamanna pisariaqartikkaa uteqqissallugu pingaaruteqartoq erseqqissaatigaa.

- Tamatta soqutigisassaraarput Issittumi toqqissisimanartumik inuusoqarnissaa. Taannalu tunngavigalugu oqaloqatigiinnerit inatsisinik ataqqinniffiusut, taakku pisariaqartippagut. Taama iliornikkut pissutsit nalinginnaasut siuliani ilisimasagut utersaarfigisinnaaqqullugit, tassanngaanniillu suli annerusumik suleqatigiinnerit inerisarsinnaaqqullugit. Kisianni tassa apeqqutaalluinnarpoq tassunga ikaarsaartoqassappat tunngaviit pingaarnersaat tassaavoq ataqqeqatigiinneq.

Nammineq aalajangiisinnaatitaaneruneq

Nunanut allanut ministerit pingasut, Vivian Motzfeldtip, Danmarkimit Lars Løkke Rasmussenip aamma Amerikamit Marco Rubiop ataatsimiinnissami taaneqartumi Kalaallit Nunaat oqaluuserissavaat.

Tunngaviusumik Inatsisini danskit naalakkersuisui naalagaaffeqatigiit sinnerlugit nunanut allanut politikkimik ingerlatsisuussasoq allassimavoq.

Uanili Kalaallit Nunaata oqaaseqartuunissaa pingaaruteqartoq, Vivian Motzfeldt oqarpoq.

- Nunarput pineqarpoq. Nunatta inissisimanera. Taannalu pingaaruteqartorujussuuvoq nunatsinninngaanniit oqariartuutigineqarnissaa. Taamaammat ataatsimiinnerit ingerlanneqartussat nunarput pineqartillugu nunatsinninngaanniit oqaasertalersorneqarnissaa pingaarutilerujussuuvoq.

- Nunatsinniit alloriaqqinnissaq annerusumik oqartussaassuseqarnitsinni naqissusiinissaq ukiuni kingullerni ineriartortipparput. Piffissallu massumap takutippaa qanoq pingaaruteqartigisoq oqartussaaffiup taassumap annerujussuarmik oqartussaaffeqarfigalugu aquummik tigummiaqataaffiginissaa.

Nalinginnaasumik uteqqinnissaq

Donald Trumpip Kalaallit Nunaannik tiguserusunnini aamma sooq illersornissamut isumaqatigiissut pioreersoq, USA-p Kalaallit Nunaanni sakkutooqarfeqarnissaanut periarfissiisoq, New York Timesimit sisamanngornermi apersorneqarnermini oqaasertalerneruai. 

- Misigisimagama eqqarsartaatsikkut iluatsilluassagaanni tamanna pisariaqartoq.

- Piginninneq allakkatigut atsiornikkut pissarsiarineqarsinnaanngitsunik tunissuteqartarpoq, Trump New York Timesimut oqarpoq.

Taamaakkaluartorli pissutsit eqqissisimanerulingajannissaat aamma Rubio ataatsimeeqatiginerata inerneqarluarnissaa Vivian Motzfeldtip neriuutigaa.

- Innuttaasut nunatsinni pisariaqartipparput tamatta, utoqqarniit meeqqanut ullut nalinginnaanerusut toqqissisimanartullu utersaarfigeqqissallugit, taakkulu piumasaqarput oqaloqatigiinnerit ingerlanneqassasut. Massakkullu oqaloqatigiinnerit pisussanngormata assorujussuaq neriulluarlungalu qujamasuppunga.